SALAMO 142

1 Eregu amo Iehova na tai heniamu, eregu amo Iehova na noinoi heniamu. 2 Egu lalo-hisihisi na ia vairanai na herevalaiamu, egu lalo-hekwarahi na ia vairanai na gwauraiamu. 3 Laumagu e dauremu negana ai, egu dala oi mai dibamu. Na rakalaiamu dalana ai, iabigu rikirikina vada e hunia. 4 Idiba kahana na roha heniamu bona na henarimu, a ta ese se lalogumu; asi egu roho-mauri gabuna ta, asi tauna ta ese e dosigumu. 5 Iehova e, na tai henimumu, na tomu “Egu roho-mauri gabuna na oi, oi na lau ahugu, mauri taudia edia tano ai”. 6 Egu noinoi a kamonai, badina be vada e taogu tao. E daḡedaḡe henigumu taudia edia amo ba hamaurigu, badina be lauegu ai idia na gogoada heherea. 7 Dibura rumana amo ba hakaugu lasi, bena oi ladamu baina hanamoa. Kara maoromaoro taudia ese bae gegegu ahu, badina be oi ese ba harihari henigu.