ISAIA 31

1 Hekaha idavarina totona Aigupto e laomu bona hosi e abidadama henidiamu taudia, madi ihabaidia! Idia ese kariota e abidadama henidiamu, badina be momo; bona hosi-gui taudia danu, badina be gogoada heherea, a Israel ena Helaḡa Diravana asie heḡerea, bona Iehova ena hahealo asie hetahulaia. 2 Ḡau tamona, ia na mai aonegana, bona e hahebua tarimu, ena hereva se haloudiamu; a kara dika taudia edia ruma ihadikana totona baine tore isi, bona kara havara taudia e durudiamu taudia ihadikadia totona danu. 3 Aigupto taudia na taunimanima mo, dia Dirava; edia hosi na hidio mo, dia lauma. Iehova ese ia imana baine toi roro negana ai, hekaha tauna baine hetutuhi, bona e kahaiamu tauna baine moru, bena raruosi bae mase hebou. 4 Badina be Iehova ese ini e hamaorogu toma: leona eiava leona natuna na damuna latanai e ḡiḡimu, bona mamoe ireḡudia taudia oreana ta ia ihadikana totona e boiridiamu negana ai ia na edia lolo dainai se garimu bona edia heloḡo-heloḡo dainai damuna se rakataniamu, una heḡereḡerena ai Iehova Sabaota baine diho, Siona Ororo ororona latanai baine tuari. 5 Iehova Sabaota ese Ierusalem baine manua tao, bona baine gimaia; ia ese baine gimaia bona baine hamauria, baine bogaia hisi bona baine harohoa mauri. 6 Israel taumui e, vada o daḡedaḡe henia bada Diravana ma ba lou henia. 7 Badina be una dina ai iboumui ai ese emui silver kaivakukudia bona emui gold kaivakukudia do ba negedia, hari imamui mai dikadia ese emui vada e kara ḡaudia. 8 Bena Asuria tauna na dare ai baine mase, a dia taunimanima edia dare; dare, dia taunimanima ena, ese baine alaia mase; bena dare amo baine heau oho, bona ena eregabe taudia na hahedua ḡaukaradia ai bae haḡaukaradia. 9 Ena nadi-gini baine puki, gari dainai; bona ena tuari biagudia ese pepe bae heautania, laḡaḡa dainai, Iehova, ena lahi na Siona ai bona ena amu na Ierusalem ai Diravana, unu e gwau tomamu.