HOSEA 4

1 Israel taumui e, Iehova ena hereva ba kamonai; badina be Iehova na mai ena hahebade, tano inoholaina taudia latadiai. Asi heabidadama bona asi hebogahisi ina tano ai, bona Dirava asi dibadia danu; 2 heuduguirai, koikoi, ala-ala, henao, heuda-hanai na mimia; ḡau ta asie laloamu; roroma murina murina. 3 Una dainai tano na e taitaimu, bona inoholaina taudia iboudiai na e manorimu, uda boromadia bona atai manudia danu; bona davara gwarumedia na e heabi ohomu. 4 Ta basine hepapahuahu, ta basine hahebade, badina be, hahelaḡa tauna e, egu hepapahuahu na oi ida. 5 Dina ai ba hetutuhi, hanuaboi ai peroveta tauna danu oi ida ba hetutuhi; bona lau ese sinamu baina alaia mase. 6 Asi edia lalo-parara dainai egu bese taudia vada e hebua tari, badina be oi ese lalo-parara vada o dadaraia dainai lau ese na dadaraimumu, egu hahelaḡa tauna daguna amo; bona emu Dirava ena taravatu vada o laloa boio dainai lau ese oi natumu baina lalodia boio. 7 Idia na e hutumava negana ai, idia ese lau e kara dika henigu bada danu; idia hairaidia na hemarai ai baina halaoa. 8 Egu bese taudia edia kara dika na edia aniani, edia kara havara na e ani mata ganiganimu. 9 Hahelaḡa tauna hanua taudia na heheḡereḡere; edia dala daidiai davadia baina henidia, edia kara daidiai ahudia baina henidia. 10 Idia na bae aniani, to bogadia basie kunu; ariara karadia bae kara, a besedia basie vara; badina be idia ese Iehova vada e rakatania, ariara karadia iabi-daedia totona. 11 Vine ranuna, ena be matamata, to ia ese lalo-parara e abia ohomu. 12 Egu bese taudia ese au amo e karaia ḡauna na e nanadaiamu, bona edia itotohi ese oru edia hereva e henidiamu. Badina be ariara karadia iura-henidia ese vada e hakaudia kerere; edia Dirava vada e rakatania, ariara karadia helaoreadia. 13 Ororo doridia ai boubou karadia e karamu, ororo komutadia ai boubou ḡaudia e hahelaḡadiamu, oak bona poplar bona terebinth audia henudiai, badina be unu au ikerukerudia na nanamo. Taunabunai, natumui hahinedia ese ariara karadia e karamu, bona ravamui hahinedia na e heuda hanaimu. 14 Natumui hahinedia ese ariara karadia e karamu eiava ravamui hahinedia na e heuda hanaimu negadia ai na matadia basina hakanidia; badina be tatau danu ariara hahinedia ida e raka sirimu, bona boubou ḡaudia e hahelaḡadiamu mai lebulebu karadia ida. Bese ta taudia bema asi edia lalo-parara, idia na bae dika vaitani. 15 Israel e, ena be ariara karadia o karamu, to Iuda na basioma hakererea. Gilgal ai basio raka vareai, Bet-avene ai basio dae kau; basio gwau hamata, basioto “Iehova na e maurimu heḡereḡerena”. 16 Boromakau hahinena e daḡedaḡemu na heto, Israel na e daḡedaḡemu. Harihari Iehova baine ubudia diba mamoe naluna rei gabuna badana lalonai na heto a? 17 Efraim na kaivakuku ediai e taomu; aine noho. 18 Idia na kekero oreana, ariara karadia e karamu; hemarai e ura henia badamu, hairaidia e ura henia maraḡimu. 19 Koe-hirihiri ese hanina lalonai vada e koedia, bena edia ihaboulaina patadia daidiai bae hemarai.