2 Jon 1

1 Na Jon, Got nga rapa tenda ila rÊp wu ei ndi, enim Got nga kÊmp ropa titim amp ei kÊn, nim nga kangambuⱡa mbÊ kÊn, mon rop ngont. Na ik kupa ei, pilip tÊp enim kÊn, numan ngump mor. Ik kupa ei, pilik mbi ndui nandÊrmÊn wamp mbÊ ndi, enim kÊn numan ngurmin ku. 2 Ei nambuⱡ emel, ik kupa ei, tÊn kÊn pimba ei nga mint petÊm. 3 Got Tipam kÊn, elim nga KangÊm Jisas Kraist raⱡ nga wamp pol ti uⱡ na, wamp kont kul uⱡ na, moⱡpa kundi uⱡ ei kÊn, wote wamp numan nga uⱡ na, ik kupa ni uⱡ mbÊ, tÊn kÊn, kan piyangga! 4 Na numan kai ti, punt ei, nim nga kangambuⱡa mat ik kupa ei, pilik koip purmin mbÊ, Got Tipam nga man ik pilik tÊtmin. 5 Akup amp aiya, nim waldÊnt, tÊn kÊn wamp mbÊ kÊn, wamp numan ngui uⱡ ei kan piyangga! Ik ronduⱡ kont ti, nim kundÊp ni nanÊnt. Wote unt kuimp tepa pitmin ik ni ku kundÊp nÊnt. 6 Got nga keta teng ndui uⱡ ei ndi, wamp numan ngui uⱡ mbÊ etmba. Keta teng uⱡ ei, kuimp tek mondÊk pÊtÊng ei mel, teng nduk, wamp numan nguk muⱡÊi! 7 Nambuⱡ emel, wamp ik kol rui wu minal ekit ok puk, muⱡ uⱡ mbila andÊk kÊn, Jisas Kraist ei, mÊi kona mana omba, mbo wu rurum ni nga nÊk, para ndÊi nandÊk. Wamp mbÊ ndi, ik kol rok, Kraist nga el rui wamp rarmÊn. 8 En enim rÊp etÊi! Enim kongun etmin mel ei nga mel mbÊ, ti kawa ndui nÊndangga, wote enim nga mel mbÊ, kump kÊm ting. 9 Wamp nam ti ndi, Kraist nga ik mbo inditim ei, tÊpa mbuⱡ ngum ndam, Got kÊn muⱡi nambÊrÊm. Wote, wamp nam ti ndi, Kraist nga ik mbo inditim ei, pilpa tÊm ndam, Got Tipam kÊn, elim nga KangÊm raⱡ, tÊpa tepa morum. 10 Wamp nam ti ndi, nim nga mang kona ila, Kraist nga ik mbo inditim ik ei, mepa ui nawÊm ndam, wu ei, rawe etkÊn ti nÊti. Wote, moⱡpa kundi uⱡ ei, nim kÊn piyangga ni nÊni ku. 11 Wamp nam ti ndi, wamp ei nga kongun kit etÊm mbÊ kÊn, rawe etpa tÊm ndam, elim nga kongun kit mbÊ, tÊk tenda ndukÊⱡ itinggil. 12 Na ik ou ndup mat, nim kundÊp nimp. Mon rop ngump nint ik ei, peipa ila, kapⱡa iti natÊmba. Ei nga, pilip int omp nim kÊn, kuimp keta kandpÊⱡ rÊp ropÊⱡ moⱡpÊⱡ kÊn, ik mat nim kundÊp namba, tÊl nga numan ei wang minal nangga. 13 Nim nga numan mul amp angÊna ei nga kangambuⱡa mbÊ ndi, nim kÊn, rawe etÊk, ik kai mat nÊk mundÊnmin!