ዓይኑሞ ማፃኣፖ 95

¹ ሃኒ ሙኩዋቴ፤ ዎዛና ኑ ናንጊና ናንጋ ጎዳም ዓይናዾም! ኑኡኮ ዻቂንቶ ላላሢም ኑ ዒላሾም!

² ዒዛም ማዓ ጋላታ ዓይኑሞ ዔኪ ኑ ዒዛ ቤርቶ ሺኢኮም! ዓይኑሞና ኑ ዒዛ ሄርሾም፤

³ ናንጊና ናንጋ ጎዳ ዼኤፒ ፆኦሲታሢሮ ሜሌ ፆኦዛፓ ዑሣ ዒ ዼኤፒ ካኣቲታሢሮ።

⁴ ሳዖ ዴማኣ ቢያ ዒዛ ኩጮ ጋራኬ፤ ዹኮኮ ቶኦካኣ ዒዛሲኬ።

⁵ ዒዚ ማዤሢሮ ባዛ ዒዛሮኬ፤ ኩጫ ዒዛኮ ሳዖ ኮሼኔ።

⁶ ሃኒ ሙኩዋቴ፤ ኑ ዒዛ ካኣሽኪ ዚጎም! ኑና ማዤ ናንጊና ናንጋ ጎዳ ቤርታ ኑ ጉምዓቶም።

⁷ ዒዚ ኑኡኮ ፆኦዛሢኬ፤ ኑ ዒዛ ኩጮ ካፒፆ ዴማ ዓኣ ማራቶ ኑና ዒ ሄንቃ ዒዛኮ ዴሮኬ፤ ዬያሮ ዒዚ ሃኖ ሂዚ ጌዒ ኬኤዛሢ ዋይዙዋቴ፦

⁸ «ዬያ ዓሳ ናንጉዋ ዳውላ ሜሪባና ማሳ ጌይንታ ቤዛ ዒንሢኮ ቤርታኣ ዓዶንሢ ማዼሢጉዲ ዒንሢያ ዋይዚ ዒፃያ ማዒፖቴ።

⁹ ዔያታ ማዾ ታኣሲ ዛጌያ ማዔያታቴያ ‹ታ ዎይታቴያ› ጌዒ ታና ዔያታ ዛጌኔ፤ ማሂ ማሂ ታና ዔያታ ዎይታቴያ ዛጌኔ።

¹⁰ ዬኖ ሾይንቶ ዖይዲታሚ ሌዔ ጉቤ ታኣኒ ሻኣኪንቴኔ፤ ዒማና ታኣኒያ፦ ‹ዒና ዔያቶኮ ታና ሃሼ ዴሬኬ፤ ጎይፆዋ ታኣሲ ዔያታ ዔሩዋሴ› ጌዔኔ።

¹¹ ዬያሮ፦ ‹ፔቴታዖ ታኣኮ ሃውሾይዳ ዔያታ ጌላዓኬ› ጌዒ ታኣኮ ዻጎና ታ ጫኣቄኔ።»