ዒዮቤ ማፃኣፖ 23

¹ ዒዮቤ ሂዚ ጌይ ማሄኔ፦

² «ሃሢያ ታኣኮ ዖዪፃ ጫንቺኬ፤ ሜታዺ ሜታዺ ታ ዒላቴቴያ ፆኦሲኮ ኩጫ ታጊዳ ዴኤፂ ዴኤፂ ዓኣኔ።

³ ዒዚ ጴዻ ቤዞ ዎንዴ ታ ዔራያታቶ ዎዚ ታኣም ኮሽካንዳይ? ዒዚ ናንጋ ቤዞ ታ ሄሌቶ ዎዚ ታ ዎዛዻንዳይ?

⁴ ታኣኮ ዓኣ ሜቶ ታ ዒዛም ኬኤዛንዳንቴ፤ ታ ዒዛ ሞኦታ ሞኦቶዋ ፓይዲ ፓይዲ ታ ዒዛም ሺኢሻንዳንቴኬ።

⁵ ዎዚ ጌይ ዒ ታኣም ማሃቴያ ሃሣ ዒ ታኣም ዎዚ ጋዓቴያ ታ ዔራንዳንቴኬ።

⁶ ጎዖንቴ ፆኦሲ ፔኤኮ ዼኤፖ ዎልቆና ታና ሞኦታንዳኖ? ታ ሺኢቃ ባኮ ታኣም ዒ ዋይዛንዳፓዓቴም ዬያ ዒ ማዻዓኬ።

⁷ ዒኢካ ፒዜ ዓሲ ዒዛና ሞኦታንዳኔ፤ ታኣኮ ጌኤዞ ጌስታ ፆኦዛሢ ናንጊና ታና ሜታ ባኣያ ማሂ ኬሳንዳኔ።»

⁸ «ጋዓንቴ ዓባ ኬስካ ባንፆ ታ ዓኣዼቴያ ዒ ዬካ ባኣሴ፤ ጊንሣ ዓባ ጌላ ባንፆ ታ ማዔቴያ ዒዛ ዴንቃኒ ታ ዳንዳዒባኣሴ።

⁹ ዒዚ ኬዶ ዛሎና ማዾ ፔኤኮ ማዻኔ፤ ጋዓንቴ ታ ዒዛ ዴንቂባኣሴ፤ ዾኦሎ ዛሎ ታ ሺሬቴያ ዒዛ ዴንቃኒ ታ ዳንዳዒባኣሴ።

¹⁰ ዒ ታኣኮ ሄፆ ቢያ ዔራኔ፤ ዒ ታና ዎይታቴ ዛጌቶዋ ዎርቄጉዲ ጌኤሺ ማዔሢ ዴንቃዳኔ።

¹¹ ቶካ ታኣኮ ዒዚ ናሽካ ጎይፆ ዓኣዻኔ፤ ሻውላ ሚዛቂ፥ ሴካ ሃንጋ ታ ጎዑዋሴ።

¹² ቢያ ዎዴ ዒዛኮ ዓይሢፆ ታ ካፓኔ፤ ቃኣሎዋ ታ ዒዛኮ ዒና ካፒ ዓኣኔ።»

¹³ «ፆኦሲ ላኣሚንቱዋሴ፤ ዒዛም ዋይዚ ዒፃይ ባኣሴ፤ ዒ ናሽኬ ባኣዚ ቢያ ማዻኔ።

¹⁴ ታኣም ዒ ማሌ ባኮ ቢያ ማዺ ኩንሣንዳኔ፤ ዬያጉዴ ሚርጌ ማሊሢ ዒዛኮ ዓኣኔ።

¹⁵ ዬያሮ ዒዛ ቤርታ ዔቂፃ ኮሺ ታና ዒጊቻኔ፤ ዬያ ታ ማላዖ ጎጎጋይቃኔ።

¹⁶ ፆኦሲ ታኣኮ ዒኖ ባይዜኔ፤ ቢያ ባኮ ዳንዳዓ ጎዳ ታና ዲቃሤኔ።

¹⁷ ዎዚ ሻኔ ዹማ ዓኣፖ ታኣኮ ዓርቄቴያ ዹሞኮ ዎልቃዺፃ ጌስቲፆ ታና ባሺባኣሴ።»