Matiu 27
SPP1 Ijihuni súêuhijino pirisitia mamaêina êee êemapuni mamaêina mapokaêe ahuma Jesu icháêinaêe venareje êanaa kwahuniji piraêarame hina êwavara. 2 êEnareja pu Hu kamomareja ahema vaêe kwaa ara kaji êajohiêina kaêene Pairati mahara. 3 êEjumakame Jutasi kaêene nahamahajaho kiêeme pu Jesu sisea namahe êee siseêi êahaumakime hu nihoêo temuma parajume ijà monia siriva (30) kaêene hu êekajaho vukúêo êuname êeka roe pirisitia mamaêina êee emaapuni ea mamaêinijihi vajihana. 4 êEne ijá êiama Na nihoêo Ea kajaho êaa sisea paêamaaêe na Hu nahamahuta êiamana. êEjume pu hu ijá êwava Ijaho núni rake? Aêasu ijaho kama êwavara. 5 êEjume hu monia kajaho ijà Temiporu vaja kajino atoêaruêi kaivo va êeêuna vaêe jasi kwamana. 6 êEnakaivo pirisitia mamaêina kajipo monia kajaho nianaiêi ijá êwava Varapijara êwaramujaho ike moniakaho nú Temiporu moni ijiêi paahuma irechahuna. Ijihuni maijaho monia kakaho emaapuni êaa êimejara êwavara. 7 êEjume pu êwama pirahe monia kajaho êeke ea kaêene siêuara vejiêini jihuni mweêa êimenareja apiopuni euchaêe vejara. 8 Ijihuni hahi mweêa sisa kajaho êAa Mweêa êwama roe iviasi usevu. 9 êEjumakame poropetia Jeramaiara êwaramajaho nimaa renana. Hu ikaêina êwaramana êEne Isureri opo Huni haha êimehuni aneja monia siriva 30 ranavara. 10 Pu monia kajaho êeke ea kaêene siêuara vejiêini jihuni mweêa êimejara. Natohwijara najiêeme na êwaravuta. Godira na êwarimana êiamana. 11 êEêeme Jesuho ijà kwaa ara êajohiêina kajihuni unaêi namijume hura apome ijá êwama êà A Jua puni kinie? êwamana. êEjume Jesura ijá êwama A niêwarimu kajina êwamana. 12 êEnakaivo pirisitia mamaêina êee ema puni mamaêinijihi puêúmo Huaêe namahajaho Hu ira paêwaramana. 13 êEjumakame Pairatira Hu ijá êwama Uneunecha raka raka pu A namahujaho A nihino? êwamana. 14 êEnakaivo Hu nihoêo ira pina maêuakuêwi paêwaravumakame ijà kwaa ara êajohiêina natohwa kajaho nihoêo puruva rena paranana. 15 êEne vea kaêene ahaja ijuri veijino ara kwaa êajohiêina niêinijihuni tamanaêomo ea kaêene tipurai hijujaho ea mapoka kajipo ea ira ura renauji ranavuêe samai vaêuna. 16 êEnakaivo ea pina huni iha Parapasiho nihoêo sisemaa ea mapoka nihena kaviêina hu tipura hinana. 17 êEnaêomo vea kajino ea mapoka mapoka roe ahuvumakiviêi Pairatira pu ijá êiama Na ea irá ranave va êeêuêena? Parapasina ho Jesu kaêene Kerisone êwavujine? êiamana. 18 Pu Jesu êotua vetihuni jihuni maijaho Pairati nihena kamana. Ea mapoka Jesu ura renajihunaêe pu sena vena avajara. 19 êEêeme Pairatiho ruha kaêene êotua venajino asuma hiêeme naparahi ona vene ijá êwama Ea kaêene ariramaa kajihunaêi majihiêa unenuêu pina paveêamana. Ijihuni maijaho ivisi naêi kakino na navahi Huaêe kamarejo pivujuta êwamana. 20 êEnakaivo pirisitia mamaêinijija êee puni ea mamaêina ijipuhipo eaka mapoka kajijahija êejahie êwarave Parapasi ranaêikaêi Jesu êanaa kwaêamarono êwaravara. 21 êEnarena ijiêa vukúêo kwaa kajihuni natohwijara eha vene ijá êiama Ea iraka saêiniji na ranave vaêena? êiamana. êEjume pu ijá êwava Parapasina êwavara. 22 êEjume Pairatira pu ijá êiama êEnaêomo Jesu kaêene Kerisona êwavujaho na Hu ichá veêejo? êiamana. êEjume pura mahoêo hu ijá êwava Icha êahi êanaa! êwavara. 23 êEjume hu ijá êiama Irakijihunaêe? Hu sisea iraka venane? êiamana. êEnakaivo pu nihoêo ijà êumejajaho pasonananamie Icha êahi êanaa êumejara. 24 êEjumakame Pairatira kimajaho pu puni vwiha ijaho aniêina pavwihajara vo nikwinuêwi vwihajiêi êaraêiro vejuma kimarena hu toi êene apene puni unaêi ija soviêi ijá êiama Ea kakaho nihoêo sisea maêuakuêwi pavenanaêomo ja Hu êanaêavajaho Huni êaa ijaho nuni ahija panakúne ja ojono kaha êiamana. 25 êEjume pu ea mahoêo eha vene ijá êwava Nijinakúne makave Huni êaa núni haha êahi arihe êee sesahu núpuni haha êahi ariha êwavara. 26 êEêejume hu Parapasi ranavume vaêeme hura êwaravume Jesu apene hijahe êee apene ranavume icha êahi êanaêavarono vaêana. 27 êEêejume ea kwaa ara êajohiêina natohwa kajihuni sorutia kajipo Jesuho ahema kamati puni niêúhi vaêe aruêeme sorutia mahoêo Huaêe êoutihara. 28 êEnareja pu Huni ateha kajijahija êunirama jaheêi kaivo ateha amapuêura kaêene kwaa ara êajohiêini jipuhipo savujikano apene apúsamahara. 29 êEe êwija kaêene ehima piranavaji apenapi húmata êahi apúsamahe êee pijuha ija manaêinijaêi mahuma êunama namijumakaviêi pu nitupari satie nuana vetiêi matahe taêarohe ijá êwava Ese! Jua Puni Kinie êwavara. 30 êEne ijá vejiêi pu Hu cheri êotie êee pijuha kajino apene êuitejara. 31 Pu Hu matahume paêarejume ijiêa ateha kaêene jopatuêuraka apúsamaha kajaho êunama apene tasiomaêi kaivo ijà Huni ateha kaêene Hu marakoêa samajaho samahe ijiêa icha êahi êanaêiro apene vaêara. 32 êEjumakame pu vaiêi êunamutoi ea pina Saimani Sairini orijaho piunamareja êejahaume hura korosia kaêene Jesu êanahuna kajaho tapana vaêana. 33 êEjumakame pu Hu apena vaêe kwaa iha Korukata êwavujino vaêara. Ijà Korukata êwavujihuni maijaho Húmata êAta êwavura. 34 êEjumakame pu ijino ajina riha kisinaêe icha maritajiêi ahume amairiu vaêume Jesu mahume Hu maêuako ina henarena pataarorahana. 35 êEjumakame pu ijiêa ichi êahi êanaara. êEne Huni ateha pipi vene êekara êúmana. 36 Ijá vejuma parajumakaviêi pu asuma hine êaiha vejiêi hijara. 37 Pu Hu namaha jihuni maijaho Huni húmata huri icha êaha kajino asura venareja ikaêina êwaravara. Ikaho Jesu kaêene Jua puni Kinijina êwavara. 38 êEnareja vea nikwinuêina kajino ea noêoheêi nesa apejiêina Jesuni manaêinajaêi êanae êee pina anaêinijaêiji êanaara. 39 êEjumakame ea kaêene ijà rora kaji ro vaêajijahija Hu kame nuana achiachihiêi ira sisea kajino Hu êwaravara. 40 êEjiêi ijá êwava êà A ike Jua puni vuêa êwavuri sea kakaho veje tiraêusahakaviêi naêia noêopisu vajijikano veje kúêo êurine namiêena êiame ijá êwarumana. êEnakúne A Godoni Hariha reêamajaho iviêa orono niêajarame korosia êaha kajino rene ariha roa kava êwavara. 41 êEjumakame êunama nikwisuêina kajino pirisitia mamaêina êee Sikuraipia êee emaapuni ea mamaêina êuêo matahiêi ijá êwava 42 Hu areri ea êahoêa niêajiêena vo Hu oriêini niêajarahuna nihoêo areria paêamaa. Hu nimai Isureri Puni Kini ijà reêamajaho makaêeje ijà korosi êaha kaji ariha roakame nú ijiêa kamareja Hu nimaa roja. 43 Hu Godi nimaa ronunakúne areêeje Hu ura reêamajaho Hura niêajahe ijà rena ariha roa kava. Ijihuni maijaho Hu ijá êúmune Na Godoni Hariha êúmuna êwavara. 44 êEjume ea nesa rukina kaêene Hu huêúmo êania kajipo pu êuêo ira sisea ani ani Hu êwaravara. 45 êEêeme veêiriêa kajino mweêa kakaho niêaha kwino nutuma naêima namana. êEêeme naêima nama apena vaêu vaêume vaêe vea tahunaname hareha êaha karakaro naminuji êeêunana. 46 Vea hareha êaha karakaro ariha vaêe namiêeme Jesura ira ajira ijá êumena Irai Irai rama sapakatani êumenana. Ijaho Nuni Godi Nuni Godi A Rakijihunaêe Na Pataaroriho? êwama avanana. 47 êEjumakame ea kaêene Huni rori namija kajipo ijà hinareja ijá êwava Ooo ea kajaho Iraija êumenu êwavara. 48 êEjumakame ea kwinuêwi ninuma vaêarena icha kaêene êoasuna ijihuni toi amairiêinijaho apena roe ajina riha kisina vaji apúsame êenapene Hura iêamarono apena mahana. 49 êEnakaivo ea êahopo ijá êwava Areêeje Iraijara roareje Hu niêajahe kava êwavara. 50 êEjumakame Jesuho ira ajira êumeêi kaivo ijiêa kwamana. 51 Ijá veêeme niêaha kwinu Temiporu vaji ateha kaêene rira muêoijano pu uranavujaho niêaha kwinu kahe huriji rene ro vaêe kame hariji êonarene rira kaja puchaêusaharena ronu ronu ro vaêara. êEêeme mwevarivuri roarena muna kakija niêaha kwinu mutuusahe ronu ronu vaêara. 52 êEêeme euchi jaraêeme Godoni ea nimaa nimaa kaêene kwamasahajija êurijara. 53 Vea kaêene Hura kwama êurinani veiji ea kaêene nitama kwamasahajija ijà pu puêúmo êurinareja akuavuri ari ea mapoka puni unaêi vaêume kivara. 54 êEjumakame amia natohwa êee ea êahoêa kaêene pu puêúmo Jesu êajoha namijajipo mwevarivura êee uneunecha êahoêa kaêene rejajija kimareja tea junavume ijá êwava Nimaa! Ikaho Godoni Hariha êwavara. 55 êEêeme napara mapoka kaêene Karari Jesu niêajahura kaêene Hu êararihaa roajija kamakaru hinareja kaviêi hijara. 56 êEne napara êahoêa kaêene ijihipuni vaji hijajijahija Meri Matarini êee Meri kaêene Jemisiho êee Josapiho puni ohijaho êee Sepati oni harihiji jihipuni ohijaho ijá hijara. 57 êEa pina kukua rukimaêura Josapina hu êuêo Jesuni tisaiporuaêomo Arimatia rene nusireêeme roana. 58 Ea ikara hu Pairati oni vaêe Jesuni haha apeêiro jarimana. êEjume Pairatira hu mahuna êwamana. 59 êEjumakame Josapira vaêe ateha kaêene maiuêimaijino apene Jesuni haha kajaho mwamana. 60 êEnarena Hu apena vaêe Huni muna ara maiuêina kaêene amairiajikano haha kajaho ranaêikaêi hu muna niêimaêura tahuma apena vaêe ira kajikahi kunaêikaêi hu ijiêa vaêana. 61 êEêeme napara kaêene Meri Matarini êee vu Meri pinijaho ijano eucha ropunaêijaêi hijara. 62 Pura Pasova amairiaravari súêuhwijino pirisitia mamaêina êee Parasia Pairati puêúmo vaêe rira kwinu ahuvara. 63 êEnareja pu Pairati ijá êwava Natohwe nú iviêa vwihaju. Hu pakwaêikaêi maiêo hinani veijino pisivisaviêinakara ijá êúmane Naêia noêopisu paêareêeje Na kúêo êuriêeju êúmana êwavara. 64 êEnajihunaêe êwarave ea êahoêa irechamiakame vaêajimareje ijà eucha kajaho hami êajohe tanuma paraha. êEêeje vaêe naêia noêopisu paramama. Vejuroêi Huni tisaiporuepo roe Hu nesi apena vaêi kaivo pu ea ijá êwarahuna Hu kwamajaho niêurinana êiavakame Hura iviamaa pisimisamakara marakoêa pisimúsumajaho asisama paraêena êwavara. 65 êEjumakame Pairatira pu ijá êiama Joni ea êajohaêina ijà hiju. Ja icháêina vehunijaho nivwihaju. Vaêe tanume kuma pijuha paraêavara. 66 êEjumakame pu vaêe eucha kajaho nihoêo tanume kuma kisimaêura vene êee ea ijà êajoha namihuna irechamie muna tanuvume paranana.