Jemisi 5
SPP1 êEnakúne ja ea kaêene uneunecha rukimaêurakije sisea kaêene joni haha êahi reêi venujihunaêe iviamaa roe niramarume êee úchia eha. 2 Joni kukua uneunechijija sakarasa raname êee joni ateha tiriapo uhusa ranavara. 3 Joni korutia êee siriva tihejara. êEne ijà tiheja kajipo ja rone êwarahuna. êEne ijipo veje ja areri veni renau jaêinaêe renahuna. Ike vea túchamaa ikino ja joni uneunecha hine tamua vejara. 4 Heha! Ea kaêene oni juara meja jihipuni eha kaêene a pavajiêi êuninamie hinujihunaêe pu ninamaêe hine êumeju. êEne ea kaêene juara savajipo hine emavajujaho ajime Natohwa Sapaoti kaêene uneunecha mahoêo êAjohiêini jihuni ataa vaji arumu. 5 êEnakaivo ja ikino mweêi hijujaho uneunecha mamaa êee mapoka ani renavumakame ijihuni toi hami hine êee joni hiijaho joni hahijara ura renajaêinaêe vejiêi hijara. êEne ijihuni vei reje êanihuni jihunaêe joni oja siseiji piravume emarejara. 6 Ja ea arimaa kaêene ja patanuêurihujaho namahe êee êanaume kwamana. 7 êEnajihunaêe vwehu nune masuani ajuarasahe hina vaêeje Natohwijaho roêamana. Ea kaêene juara êojiêinijara huni uja mavarasaêina kaêene mweêa vaji irechavuêe navujipo nehi pine sonaêeje marasaêavarono masuani êajiha hinujaho kaha. 8 Ja êuêo masuani ajuarasahe joni oja veje harura renaêamana. Ijihuni maijaho Natohwijara rohuna nituranu. 9 êEnakúne vwehu nune pasuêarame ninakaraêavara. êEjakame ja panamaêavara. Heha! êOtua hejiêinijaho vwicha jiamai naminu. 10 Vwehu nune areri poropetiepo Natohwi jihuni iha toi vejajaêinaêe siseisei hiêavajaho masuani ajuarasahe pura vene najaha kajaêinaêe hiêavara. 11 Heha! Ea kaêene kirasahe vaêujija nú punijihunaêe teamanuhuna. Jopura kirane vaêajaho ja nihejura. êEne túnaêi roe icháêina kaêene Natohwijara venajaho nikavara. Natohwijaho nihoêo temuki rarejiêine êee numisarai rarejiêina. 12 êEnavo vwehu nune niêimaêurijaho akúpa êee mweêa ho unenuêu pina paêurahiêi ichutoa pikiêavara. êEnakaivo iêa êiêi veêavajaho iêa êiame êee pana êiêi veêavajaho pana êiêavara. êEêirakúne ja êotua vaja panamiêavara. 13 êà ja ea pina joni vaja ahijijiêi vi hino? Hu makaêeje siporua êoêamana. êEne ea irara oja sonama paraêeje hiêamajaho makaêeje javaa kaêene Godi taêarohujaho vejiêi hinama. 14 êà joni vaja vi ea pina atami êunaêejuêe hino? Ijinakú makaêeje sosi huni erutaêe êwarave roa êee makiêeje pu huni siporua êonaha êee Natohwi jihuni iha toi êwerua êonaha. 15 êEne siporua kaêene nimaa rojiêi êojujara reje ea kaêene atami êunamujaho marahuna. êEne Natohwijara veje êurihuna. êEne hu sisea venanaêe reêamajaho huni sisea vwihane areve paêarehuna. 16 Ijihuni hahi joni sisea êwame nahatiêaraêavara. êEne niêajarame siporua êojakame ja maraniêamana. Ea kaêene arimai jihuni siporuijaho harura rukimaêure êee maaru rejiêina. 17 Iraijaho emaa êee huni kara ijaho núnijaêina kaivo hu siporua nimaa nimaijino neha papiêamarono êojume mweêa neha papiêeme juara noêopisune êee masapa iropune kwinu paêarejara. 18 êEjume hu kúêo siporua êojume ichutoa neha roe pijume mweêa êiruma marasahara. 19 êEne vwehu nune ei pini joni vaja kajino êunama nimaiji areêikaêi vaêamajaho ei pini vaêe ahema apene roêamana. 20 Makaêeje ea kajaho hena kaêamana. Ea irara ea kaêene sisea vejiêiniji êwaravuêe huni êunama sisei jihuniji aremujaho hu huni êavena kaêene kwahuni êunamiji vaêajaho niêajahana. êEne huni sisea mapokijaho vahamana.