Korasia 1
SPP1 Na Poru kaêene Jesu Keriso oni pwea Godoni ura ijino rejujara Timoti kaêene núni vweijiêi veju. 2 Godoni ehija akuaviêina êee vwehu nuna kaêene Keriso oni vaji pauchaviêina kaêene Korasi hijujihi punaêe veju. êEnakúne maiji vwihanie êee vivinui matauma hijiêina kaêene Godi núni Omijihunaêi rena roajaho ja puêúmuna. 3 Nú naêia mapokaêe siporua êojujaho Godi Amo kaêene núni Natohwa Jesu Kerisoho jonijihunaêe teimani êwavura. 4 Ijihuni maijaho Jesu Keriso oni vaji joni nimaaroa êee jara Godoni ea kaêene akuaviêiniji oja mihuji henareêe avajura. 5 Ijihuni maijaho iraka kaêene ja nimaarojura kaêene akúpi êahi navujiêina. êEne nimarako ja vuêa nimaa kaêene vuêa maa maiuêina vajijino hejajina. 6 Ijà vuêa maiuêina kajara joni roajaêinaêe êuêo êeêune kwaa ararakino vaêe hine majaa êina renu êee rausahe emarenu. êEne ni areri vea kaêene ja Godoni maiji vwihanie ijihuni nimaiji hene kavume renajaêinaêe renu. 7 êEne ja Epaporasi naêi vuêa kajaho hene kavara. Hu nú puêúmo kaukara vejiêine êee ea pina kaêene nú oja mahujina. Hu Keriso oni pwea pina kaêene núni ijihunaêe pauchaviêinijina. 8 êEne jara Godoni êAveni jihuni vaji ea oja mihujaho hura êwarumana. 9 Ijihuni hahi nú êuêo vea kaêene ijà hejaji rene ojuta pahweêi hine joni siporua êona êwaravakame joni henaka vaja areri rene êee Huni ura ijaho hene êee êavena huni vwiha mahoêo hena kama parahuna. 10 êEne ja êunama mamaa kaêene Natohwiji ura renujaêinaêe one êee Huni hura veêavara. êEne kaukara mamaa kaêene ja vejujija êina rukinaêe rene êee Godoni henaka vajijino emareêavara. 11 êEne ja Huni hanajiêina vajijino harura mahoêone êee vivinui matauma hine êee ata kairasahe hihunijaho êekakame nihoêo temarijara joni vaji rarenaêe paraniêamana. 12 Nú Amo teimani êwavujihuni maijaho Hu venume nú Godoni ea akuaviêina kaêene hanajiêini hijujihi puni aachijija ahuma êekahuna. 13 Ijihuni maijaho Hu nú nututa huni ara kwaijino vahanume siriramúe êekue Huni Hariha kaêene Hu oja mahujihuni ara kwai irechamúana. 14 êEne Huni vaji nú kúêo êimenue êekuana êee Huni vaji sisea vwihane arevume paêarenana. 15 êEne Hu Godia kaêene nia pakaviêinijihu vareêine êee maiêo uneunecha mahoêo reêavarono Hu amuraêe ijà hinajina. 16 Ijihuni maijaho uneunecha kivura ho pakivujaho mahoêo mweêa êee akúpa êahi navujaho Hura venana. êEne Hura kiniepo êajoahuri ara kwaa êee êajohaiêina êee Huni harura hari hijujija irechamie êee uneunecha mahoêo kija Hura venarena Hunaêe venana. 17 êEne uneunecha kija mahoêo parejiêini Hu iji hinana. êEne Hura uneunecha kija mahoêo êuninamiuêe ahuma navu. 18 Hu êuêo sosia ikehuni húmata êee sosijaho Huni haha. Hu uneunecha mahoêo ikihi puni húmata. êEne Hura amura kwama êurinana. 19 Ijihuni maijihunaêe Omaha teamavume Huni kara ijaho mahoêo Keriso oni vaji namu. 20 êEne na Huni vaji êwaravu. Godiho uneunecha mahoêo kehi puêúmo êunama vene kúêo napura venana. Huni êaa kaêene korosia êahi hirama arihajara uneunecha mahoêo kaêene mweêi navura ho akúpa êahi navujija venaue matauvu. 21 êEne ja nimarakuêijaho apiora êee nakaêe rene vwiha sisea vwihane sisea vejiêi hijara. 22 êEnakaivo Hura hahijiêi kwamana vajijino ja venaume êunama Hu huêúmo napura vejara. êEnarena aherume roe Godoni unaêi irechamiuêe ja iviêa akuaviêinaêe êee panamahiêina êee nihoêo sisea pina paêanaêe namiju. 23 êEnakúne ike nimaaroakaho hena vene êee ija kisi êuname namiha. êEne ja pakiêeje vuêa maiuêina kara iraka kaêene rehuna êwaravume hejaji raname arema vaêava. Ijihuni maijaho ike vuêa mamaa maiuêinakaho kwaa ara mapoka kaêene ike akúpa hari navukipo heêavarono êwaravara. êEnajihunaêe na Poruho ijà veêurono iji pijihana. 24 Na teamanimu jihuni maijaho na jonijihunaêe haha hianimu. êEne Kerisora Huni haha kaêene sosijihunaêe sisei hinajihuni pwina ijaho nara sisei hijuêe paêarenu. 25 êEjume Godira kaukara kaêene sosiaêe êajoahe êee Godoni ira mahoêo niêajihe najaêurono iji pijihana. 26 êEne nitama rene juara juara paêarene êee ea tuama apene roajaho hema kaho pavejume samaahiramana kaivo iviamaa Huni ea akuaviêinijihi najahana. 27 Ijihuni maijaho Godoni ura ijaho uneunecha mamaa kaêene ike hema vaji navujija veje Jenitaru hena kahuna. Ijà hema kajaho Keriso kaêene joni vaji hinujina. êEne nimaa rojiêinijija. Huni mamaijaho túnaêi êekahuna. 28 êEne nú ichihichano vaêujaho Keriso rone ea mapoka êwaravu. Nú pu niêajihe êwarame êee vwiha mamaiji najahura. Ijihuni maijaho nú ea kwinu kwino Keriso oni vaji marana areri rena paraêeje vajahuna. 29 Na êuêo ikehuni maijihunaêe kaukara nihoêo kisinaêe Huni harura natohwa kaêene nuni vaji namujara veniuêe veju.