2 Koritia 13

1 êEne ikaho nuni êaha noêopisu ijí na ja kiêirono vuêu. êEne vuêa nimaijija ea noêoheêina ho noêopiso avavukame ijiêa roe nimaaêe rejura. 2 Na nimarako vea kaêene na ja puêúmo hijuti veijino ona aruna mihuta. êEne kúêo na ijaho ja puêúmo pahiju vo na nimarako êwarave ja hehuna. êEa kaêene nimarako sisea vejajija êee ea mahoêo ijija êuêo Na kúêo roujaho ea pina paasinahuna kaivo eha mihuna. 3 Ijihuni maijaho ja Kerisora nuni vaji êwaramu jihuni maiji kaêi êahiuêe savu kaivo Hu joni vaji harura paêanaêe rehuna pana vo nihoêo joni vaja kajaho harura niêimaêuraêe renu. 4 Ijihunaêe Hu nimaa ajuaranana vajijino korosi êahi êanaara. êEnavo Godoni harurijara rejuêe Hu majama hinu. Ijihunaêe nú êuêo Huni vajijaho ajuasina kaivo nú Hu huêúmo hihuna. Ijihuni maijaho Godoni harurijaho jonunaêi ranavume vuêajihunaêe. 5 Ja nimairoa vajijino hiju ho paêajaho ojono mina vene kaêavara. êEne ja ojono piuhaêarame kaha. êà ja Keriso kaêene joni vaji hinujaho maiêo pakavu raka? êEne ja vejuroêi ma irijino Godoni ea êwavaraêe reêiraêomo êariêava. 6 êEne na nimaa vejujaho ja hena kúêavajaho nú vena kúvajaho paêariharaêe kúêeja. 7 Nú iviamaa Godoni siporua êojukame ja sisea paveju. Núra ikaêina kaêene vejukaho núra raka kaêene najahajara mamaaêe rejakame avahuna pana kaivo nú ura renujaho vea kaêene núra arihune saêinaêe kúêavajaho ja êunama kaêene aririji vehunaêe ura renukame avaju. 8 Ijihunaêe nú unenuêu pina nimaiji niname vehuna pana kaivo nú nimai jihuneru vejura. 9 Nú temarasahu jihuni maijaho vea kaêene nú harura paêarenujaho ja nihoêo harura renau. êEnajihunaêe nú ike êuêo siporua êojuraêomo ja venaêe mahouêinaêe renahuna. 10 Ikehuni maijihunaêe na ijaho pahiju vo na uneunechakija vene êwaravura. êEêiraêomo vea kaêene na ijí hiêujaho na nuni harura kaêene Natohwijara mihajaho paapene ja ira kisina êwarahuna. Ijihunaêe na ja niêajihe emarene êurihuna kaivo ja pavenaêe arihuna. 11 êEnajihunaêe vwehu nune túchamaijaho temarasaha êee venaêe mahouêinaêe reha. êEne niêajaraha êee oja sonahiaha êee vwiha nikwinu rene matausahe hiha. êEje Godoni oja mihiêina êee matausahiêinijara ja puêúmo nahuna. 12 êEne akuavuri êunamijino êajosaraêavara. 13 êEne nimaa rojiêina mahoêokipo êajoravu. 14 Natohwa Jesu Keriso oni maiji vwihaniiêinijaho êee Godoni oja mihujaho êee êAvenijihi puêúmo ahuvujaho mahoêo ja puêúmuna. Nijina.