Matiu 15

1 Anzǝm mani ka aɓea amǝ Farisi andǝ amǝkani Nggurcau mala Musa pur a Urǝshalima, à yiu a ban Yesu sǝ à ɗì ama, 2 «Mana tsǝa sǝ alaggana mo kǝ yàl nzongcau mala aká sǝm? À kǝ̀ lak buia sǝ à nǝ̀ lili ɗang!» 3 Yesu pǝlǝia wia ama: Sǝ ace man ɗe sǝ wu kǝ yàl nzongcau mala Ɓakuli ace pakki akanìgìr ma’wun? 4 Ɓakuli ka bang ama, «Pè tárró andǝ nggo gulo, sǝ ɓwa mǝnana sáng tárrí ko nggè ka, dumǝna púp à nǝ̀ wali ɓǝ̀ wú.» 5 Sǝ wun ngga wu bang ama ɓǝ̀ ɓwa ne tárrí ko nggè ama, «Gìr mǝnana ɓǝ a wú nǝ́ kúmó a buam ace po gbasha ka, ǝn pani Ɓakuli ka,» 6 ɓwe nǝ̀ gandǝ ginǝ pe tárrí ko nggè gulo nǝi. Anggo ka wu nyesǝna cau mala Ɓakuli ɓà ace pàkkiagir ma’wun. 7 Wun amǝ’kúnɓárína! Ɓangna mala Ishaya amur wun ngga nda a njarì, mǝnana bang ama: 8 «Aɓwana mǝnia ka à kǝ pam gulo nǝ mburkunia, sǝ ɓabumia ka nda kuko nǝ mim. 9 Peri malea abanam ngga mǝɓane na; akanìgìr malea ka anzongcau mala ɓwapǝndǝa na à kaniki ka.» 10 Yesu tunǝ ɓwabundǝa sǝ banggia wia ama, «Wu kwaki kir wun ɓǝ̀ cau kpaka wun. 11 Gìr mana kǝ kutio a kun ɓwa ka nda kǝ pǝndǝkì ka ɗang, cau mana purkiyi a kúni ka, nda mana kǝ tsǝi sǝ kǝ pǝndǝki ka.» 12 Alaggana male pǝlǝa à yiu a baní sǝ à ɗì ama, «A sǝlǝ ama bum amǝ Farisi lúllô arǝ cau mana a ne ka?» 13 Sǝ Yesu pǝlǝia wia ama, «Ɓǝ̀ ya girpwala nani à pandǝi mǝnana Tárrám mana a kùli ka nǝ̀ pandǝi raka, à nǝ̀ ui. 14 Wu ɗekia; yia ka à nda ka ante mana à kǝ bwalì ante gara ka. Ɓǝ̀ nte bwalì nte gara ka, yia kǝm ngga à nǝ̀ kpa tūli.» 15 Bitǝrus ne wi ama, «Bǝla sǝm ɓá kanicau mana ama girlina na kǝ tsǝk ɓwa sǝ kǝ pǝndǝki raka.» 16 Yesu nea wia ama: Wun gbal ka cau kǝ kpaka wun re? 17 Wu sǝlǝ mbo ama gìr mana kat kutio a kun ɓwa ka kǝ o a bumi, sǝ nǝ̀ nggá pur a nza? 18 Sǝ agir mǝnana à kǝ pur a kun ɓwa ka à kǝ̀ yiu nǝ ɓabumi, sǝ à nda ka mǝnana à nǝ̀ tsǝk ɓwa nǝ̀ do nǝ pǝndǝkya ka. 19 Àkǝ̀ ɓabum ɓwa sǝ aɗenyicau mǝɓane kǝ puro; wal-lú, nongnǝban a nza nǝ doɓala, gyagung, ǝn’í, kùmsǝkûn, sǝ zalǝban. 20 Amǝnia ka à nda ka gir mǝnana à nǝ̀ tsǝk ɓwa nǝ̀ pǝndǝki ka. Lìli nǝ abu mǝnana à lea raka pà nǝ̀ tsǝk ɓwa nǝ̀ pǝndǝki ɗang. 21 Yesu nying ban mǝno sǝ o a nzali mala amǝ Taya andǝ amǝ Sidon. 22 Ɓè ɓwama Kan’ana mǝnana do a mǝno yì bu ban ngga, yiu a baní nǝ ɓua ama, «Mǝtalabangŋo, Muna mala Dauda , sǝn mǝsǝswatǝr mem! Ɓoarnsarilem ngga nda aɓa tanni kǝ̀rkǝ́r a ɓabù kukwar mǝnana kutia rǝì ka.» 23 Yesu pǝlǝi wi kǝ cau ɗang. Alaggana male yiu a baní sǝ à zǝmbi wi ama, «Sǝnbi ɓwama mǝnia ka ɓacau male ɓǝ̀ o. Ace mǝnana camarǝ gya atà sǝm nǝ ɓua.» 24 Yesu pǝlǝia wia ama, «Kǝ anzur mala amǝ Isǝrayila mana à ɓwarki ka nda à túrǎm abania ka.» 25 Ɓwame yiu yi kū`ndǝó a ɓadǝmbi, sǝ na ama, «Mǝtalabangŋo, bwalàm kàm!» 26 Yesu pǝlǝi wi ama, «Ɓoaro ɓǝà twal girlina mala amuna ɓǝà pè anvwa ɗàng.» 27 Ɓwame eare ama, «E, Mǝtalabangŋo, nggearǝ anvwa ka à kǝ tarki aɓwangina girlina mǝnana à kǝ kpaki a nzali a ban-li mala amǝtalea ka.» 28 Yesu pǝlǝa ne wi ama, «Ɓwama, paɓamuru mô ka nggea mǝgule na! Zǝmba mô ka à ongŋǝni.» Kara àkǝ̀ banì rǝ muni malâ. 29 Yesu nying ban mǝno sǝ gya a kun Garang mala amǝ Galili. Kya eauwe a bum ɓe nkono do akàm. 30 Ɓwabunda pas yiu a baní. À yiu nǝ aɓwana mana à su ka, ante, a gbakǝre, amǝ’talasǝuɓunna andǝ acilia pas, à yì nongsǝia a ɓadǝmbi; sǝ twalia wia ban akwánó malea. 31 Ɓwapǝndǝa ndali lang à sǝn amǝ’talasǝuɓunna aban nacau, aɓwan à su ka à lo tak, agbakǝre lo à kǝ gya, sǝ ante kǝ sǝnban. Pǝlǝa à ɓwangsǝki Ɓakuli mala amǝ Isǝrayila. 32 Yesu tunǝ alaggana male a baní sǝ nea wia ama, «Ən nggǝ sǝn mǝsǝswatǝr mala aɓwana mǝnia ka, acemǝnana à ndakani atàm nongŋo tàrú a dyan, andǝa nzala. Ɓǝa kǝa o anggo ɗang, ace mǝsǝpǝndǝa makkia a njar.» 33 Pǝlǝa alaggana male ne wi ama, «Ake sǝ sǝm nǝ̀ kum girlina a bondo mǝnia ka, mǝnana sǝm nǝ̀ linǝ aɓwana mǝnia pas ka?» 34 Yesu ɗia ama, «Agbatali bǝredi shen a bu wun ɗe?» À ear ama, «À nda tongno-nong-ɓari andǝ amǝnji bǝti.» 35 Pǝlǝa Yesu ne ɓwabundǝa ɓǝa do a nzali. 36 Sǝ twal abǝredi tongno nong-ɓari andǝ anji, lang pangŋǝni Ɓakuli yàwá ka, pǝlǝa ɓwanggia sǝ pe alaggana male. Sǝ yia gbal ka, à gaki aɓwana. 37 Ɓwabunda man kat ka lìli ɗǝmbǝo, nying cili. Alaggana male ramgi cili mana ueo ka, à pwano arǝ azace tongno-nong-ɓari. 38 Lakki mala aɓwana mana à lìli ka, aburana á-ine na. Amamǝna andǝ muna mana ateà ka à ɓallia ɗang. 39 Yesu pǝlǝa ne aɓwabundǝa ɓǝà o a la, sǝ kutio a waru o a bu-nzali Magadan.