Akas 8

1 Pǝlǝa aburana mala tàu mala Ifǝrem ɗì Gidiyon ama, «Palang sǝ a pakka sǝm anggo? Ace mana sǝ awu nǝ o a munǝo arǝ amǝ’Midiyan ngga a ginǝ tunǝ sǝm?» À munǝki arǝì kǝ̀rkǝ́r. 2 Sǝ yì ka banggia wia ama, «Mana ǝn pa ado mǝnana à nǝ̀ kārǝi arǝ wun ngga? Ɓakurikuri mala aɓǝla-anap mala Ifǝrem kútì pwan-gìrɓaban mala Abiyeza re? 3 Ɓakuli pana ayálu mala amǝ’Midiyan, yià Orep andǝ Zip a ɓabu wun; sǝ mana ǝn gandǝ pa mǝnana à nǝ̀ kārǝi arǝ wun ngga?» Pǝlǝa bumlulla malea arǝì sulǝo lang bang cau mǝnia ka. 4 Pǝlǝa Gidiyon andǝ aburana male mǝno gbǝman-tàrú ka, à yiu a Nggeasala Jodan sǝ à yàl a nkaring; sǝ kat andǝ aulǝa malea ka, à lidǝmba nǝ pǝrtau. 5 Lang à yiu a Sukkot ka, Gidiyon banggi amǝ Sukkot ama, «Ida, wu pè amǝ’lwa mem girlina; à gandǝna, sǝ mim ngga mǝ ndarǝ pǝrta Zeba andǝ Zalmuna, amurǝma mala amǝ’Midiyan piu.» 6 Sǝ aɓwana-mǝgule mala Sukkot bang ama, «A gbamina Zeba andǝ Zalmuna a ɓabuo sǝ sǝm nǝ̀ pè amǝ’lwa mô girlina le?» 7 Gidiyon bang ama, «Anzǝm mana Yahweh pana Zeba andǝ Zalmuna a ɓabuam ngga, mǝ nǝ yia koàkì wun nǝ zwe ɓabondo andǝ galamba.» 8 Gidiyon lo kano ka wari a Penǝwel sǝ zǝmbia wia kǝla mǝno ka; sǝ aburana mala Penǝwel nyesǝi wi kǝ cau mala amǝ Sukkot. 9 Sǝ ne amǝ Penǝwel ama, «Lang ǝn linamurǝm sǝ ǝn nyarna ka, mǝ nǝ yia arki mǝnia yì nda-mǝ’dāhre ka.» 10 Anggo ka, Zeba andǝ Zalmuna na a Karkor nǝ amǝ’lwa malea, aburana kǝla á-lum-bwamdǝ-tongno (15,000). À nda kǝ aburana mǝnana à ueo aɓalǝ amǝ’lwa mala aɓwana mana à yiu nǝ takuli ka; aɓwana á-gbǝman-mwashat nǝ á-lumi-ɓari (120,000) mala amǝ’lwa malea mǝnana à bwal nggeabyau ka, à walna-luia. 11 Gidiyon eau nǝ njargula mala amǝ’do aɓalǝ agumli, nǝ takuli mala Noba andǝ Jogbeha, sǝ yasǝlǝ amǝ’Midiyan a kàttì malea nǝ munǝo lang à nda aɓa do ɗwanyi-tsǝk’mǝsǝu ka. 12 Amurǝma mala amǝ’Midiyan ɓari, Zeba andǝ Zalmuna, tǝlli nǝ mire, sǝ yì ka pǝrtea yi bwalia, sǝ zurìmúr amǝ’lwa malea kat. 13 Anzǝm mǝno ka, Gidiyon muna-ɓwabura mala Johash nyarî kun-munǝo nǝ njar eauwe mala Heres. 14 Yi bwal ɓè mǝlagga a Sukkot sǝ ɗìkí, sǝ mǝlaggè gilǝî wi alullǝ amǝbuno andǝ aɓwana-mǝgule mala Sukkot, aburana lumi-tongno-nong-ɓari nǝ mǝsǝi tongno-nong-ɓari (77). 15 Pǝlǝa Gidiyon yiu aban aburana mala Sukkot sǝ banggia wia ama, «Wu sǝni, Zeba andǝ Zalmuna nya ka; yià mǝnana wu nam nggaro cau amúrià ama, <A gbamina Zeba andǝ Zalmuna a ɓabuo, sǝ sǝm nǝ̀ pè amǝ’lwa mô girlina le ka?> » 16 Pǝlǝa Gidiyon bwalki aɓwana-mǝgule mala lê, sǝ kasǝ zwe ɓabondo andǝ galamba sǝ koàkia nǝi, ace kania amǝ Sukkot gìrkànì. 17 Sǝ yi arki nda-mǝ’dāhre mala Penǝwel sǝ wal-lú aburana mala lê. 18 Sǝ pǝlǝa ɗì Zeba andǝ Zalmuna ama, «Aburana mǝnana wu wal-luia a Tabo ka, aya ulang aburana na?» Sǝ à pa eare ama, «Aburana na kǝla we, à pur amuna murǝm.» 19 Gidiyon pǝlǝia wia ama, «Amǝ’eambam, amuna mala nggem na. Mbak-kàngkàng Yahweh nakam ngga, ɓǝ̀ wu nyingŋǝnia nǝyilǝmu ka, ɓǝ́ pà mǝ nǝ wal-lú wun ɗàng.» 20 Sǝ pǝlǝa aban muna-dǝmba male, yì Jeta, sǝ ne wi ama, «Lo wal-luia!» Sǝama mǝlagge ka, kwetǝ nggeabyau male ɗàng, acemǝnana yì ka muna na piu, ɓangciu kǝ pakkì wi. 21 Pǝlǝa Zeba andǝ Zalmuna banggi Gidiyon ama, «Lo wàl sǝm nǝ nggearǝo; kǝla mǝnana ɓwabura pak ka, anggo sǝ rǝcandǝa male pǎ.» Nda Gidiyon lo wal-lú Zeba andǝ Zalmuna, sǝ pusǝki anjengǝlan mǝnana a myal akalakadambi malea ka. 22 Anzǝm mǝno ka, amǝ Isǝrayila banggi Gidiyon ama, «Duk murǝm amur sǝm, we wunǝ munio, andǝ mǝkeo gbal, acemǝnana a amsǝna sǝm a ɓabu amǝ’Midiyan.» 23 Sǝ Gidiyon banggia wia ama, «Pà mǝ nǝ duk murǝm amur wun ɗàng, sǝ munem pà nǝ̀ duk murǝm amur wun ɗàng. Yahweh na nǝ̀ duk murǝm amur wun ngga.» 24 Sǝama banggia wia ama, «Mǝ ndanǝ zǝmba aban wun; nǝma koya ɓwa atà wun ngga, ɓǝ̀ pam gìrkiru aɓalǝ agǝna-lwa mǝnana wu ea arǝ aɓiwun amǝbura ka.» (Aɓia-mǝbura ka amǝ’Ishmayel na, sǝ à kǝ oasǝ agirkiru mala bolo-njengǝlan.) 25 À pa eare ama, «Sǝm nǝ po wia nǝ banɓoarnado.» Pǝlǝa à sárǝ́ lagir, sǝ koya ɓwanani ka, túr agirkiru mala gǝna-lwa male aɓalǝi. 26 Sǝ dǝmbǝrya mala agirkiru bolo-njengǝlan mǝnana zǝm ngga nda, shekel á-mwashat nǝ gbǝman-tongno-nong-ɓari (1,700), tsǝa-amur anjengǝlan andǝ agirɓamyalu andǝ alagir mala amurǝma mǝnana amurǝma mala amǝ’Midiyan oasǝ arǝia ka, andǝ anlang-bolo mǝnana a myal akalakadambi malea ka. 27 Gidiyon pàk efot nǝi sǝ tsǝì aɓa Ofǝra nggea-là male. Sǝ Isǝrayila kat ka, à kùti a gyatàrǝia nǝ ká peri a baní kǝla nkúl, sǝ yi dupi Gidiyon andǝ amǝɓala male gbǝli. 28 Anggo sǝ amǝ Isǝrayila ɓùn amǝ’Midiyan aɓatea sǝ à loasǝ múrià ɗǝm ɗang. Sǝ nzali dum nǝ rǝpwala ba pǝlǝa lumi-ine a do-yilǝmu mala Gidiyon. 29 Jerub-ba’al muna-ɓwabura mala Johash nyar a là male kya dukam. 30 Gidiyon ngga, ndanǝ amuna-burana lumi-tongno-nong-ɓari (70) mǝnana à ɓǝli wi ka, acemǝnana ndanǝ amamǝna pas. 31 Mā-twala male mǝnana nda a Shekem ngga ɓǝli wi muna-ɓwabura gbal, mǝnana pe wi lullǝu ama, Abimale ka. 32 Sǝ Gidiyon muna-ɓwabura mala Johash ka, è kutsuk sǝ pàk-lú, sǝ à tsǝì a ɓembe-ɓa-tali mala tárrí Johash a Ofǝra, là mala nggurkwar mala Abiyeza. 33 Lú mala Gidiyon nda mǝkwane, amǝ Isǝrayila pǝlǝ ɗǝm à kùti a gyatarǝu atà aBa’al. À tsǝk Ba’al-berit duk ɓakuli malea. 34 À ɗenyinǝ Yahweh Ɓakuli malea, mǝnana amsǝia a bù ka aɓia-mǝbura a koya buì ka ɗàng. 35 Sǝ à lǝmdǝì ɓala mala Jerub-ba’al (yì Gidiyon) pěmǝɓoarne ace agir mǝɓoarne mǝnana pakkî Isǝrayila ka ɗàng.