Apocalipsis 20

1 Kìjtseè jngoaá àkja̱le̱ xi tínchrobájenâne ngajmiì. ‘Ya ibi̱ ts’e̱ ni̱tja̱n jñò. Kjiya tsja jngoò na’ñó ki̱cha̱ cadena xi ‘ñó je kji. 2 Jè àkja̱le̱ kitsobà’ñó jè ye̱ jchínga xi ti̱jèâne xi ‘mì Xi̱ta̱ Nei̱í ko̱ xi Satanás. Jngoò jmiì nó tsibít’aà’ñó. 3 Kisìkatje̱nâs’en ya̱ ni̱tja̱n jñò; tsibíchjoà’ñóâla̱ jè xotjoa̱; i̱kjoàn tsasíjnaâla̱ sello méâne nga mì yá skíx’a̱âne jè xotjoa̱ ni̱tja̱n. Ya̱á tsasíjnahi̱ya méâne nga mì ti̱ kiì ko̱ma skóna̱cha̱nâla̱ xi̱ta̱ i̱sò’nde, skanda k’e̱ nga kjoe̱het’aà xi jngoò jmiì nó. Xi ko̱ma i̱skan tjájnda̱’ñó ìjngoò k’aâne nga ko̱ma ko̱jmeèndei̱í chiba na̱chrjein ìsa̱. 4 Kìjtseè íxi̱le̱ ts’e̱ kjo̱tíxoma; títsa̱jnasòn jñà xi̱ta̱ xi kitjoéâla̱ kjo̱tíxoma nga jñà koi̱ìndaàjiìn. Ti̱koa̱ kìjtseè ini̱ma̱âla̱ jñà xi̱ta̱ xi kitiís’iìn, nga koi kjoa̱âla̱ ‘én kixi̱ xi kitsjaà i̱t’aà ts’e̱ Jesús ko̱ nga ‘énâla̱ Nainá kiìchja̱ya. Jñà xi̱ta̱ koi, mìkiì kijtseèxkón jè cho̱ je xi ch’o kji ko̱ i̱sén xkósònâla̱; ti̱koa̱ mìkiì kisit’aà chi̱ba̱âla̱ i̱tjòn tjenâla̱ ko̱ tsja. Xi̱ta̱ koi, ìjngoò k’a tsibítsa̱jnakon; jngoò jmiì nó tsatíxoma ko̱ Cristo. 5 Jñà xi̱ta̱ koi xi jaáya ítjònâla̱. Ta̱nga jñà mik’en xi i’nga, skanda k’e̱é jaáyaâla̱ nga ijchò jngoò jmiì nó. 6 Mé ta ndaàâla̱ jñà xi ko̱ko̱âla̱ nga kjoa̱áya ítjònâla̱; xi̱ta̱ koi, jyeé xi̱ta̱âla̱ Nainá ko̱ma; jè kjoa̱ biyaà xi maâne jò, ni̱mé nga’ñó tjínâla̱ i̱t’aà ts’e̱ xi̱ta̱ koi; mì ti̱ mé ma si̱ìko̱âne. Tà sa̱á no̱’miìâla̱ Nainá ko̱ma ko̱ ts’e̱ Cristo. Jngoò jmiì nó ko̱tìxomako̱. 7 K’e̱ nga kjoe̱het’aà xi jngoò jmiì nó, tjájnda̱’ñó ìjngoò k’aâne jè Satanás ya̱ ñánda tíjnahi̱ya ni̱tja̱n jñò. 8 Ki̱tjondei̱íâne nga skóna̱cha̱nâla̱ xi̱ta̱ na̱xa̱ndá xi tjín nga tíjtsa i̱sò’nde, jè Gog ko̱ Magog. Koi̱ìxkóya xi̱ta̱ méâne nga koi̱ìts’ia̱âne kjo̱jchán. Kjín jchán ko̱ma xi̱ta̱, k’oa̱á ngayaâla̱ koni tsomì xi jncha i̱ndiì ndáchikon. 9 Chinchimasòn kóho̱kji i̱sò’nde; chinchandiìâla̱ nga jngoò itjandiì ñánda títsa̱jna xi̱ta̱âla̱ Nainá ko̱ na̱xa̱ndá xi tsjakeè. I̱kjoàn kisìkasén ni’ín Nainá xi inchrobàâne ngajmiì. Jngoò k’a tsaká kóho̱tjín. 10 Jè xi̱ta̱ nei̱í xi kiskoòna̱cha̱nâla̱ xi̱ta̱, kinìkatje̱nâjiìn ya̱ i̱’nde ñánda títìjnga̱ ni’ín ko̱ azufre. Jyeé ya̱ títsa̱jna jè cho̱ je xi ch’o kji ko̱ xi kiìchja̱ya ‘én ndiso. Ya̱á si̱ìkjeiín kjo̱’in ko̱ na̱chrjein ko̱ ni̱tje̱n ni̱ta̱ kjéâne. 11 Kìjtseè jngoò íxi̱le̱ xi chroba kji ko̱ ‘ñó je kji nga ya̱ tíjnasòn jngoò xi tíhotíxoma. Nga nguixko̱n jè xi tíjnasòn íxi̱le̱, jngoò k’a kichijà nangui ko̱ ngajmiì. Ni̱ta̱ ñándaâne, mì ti̱ kiì ki’yaâla̱. 12 Kìjtseè mik’en xi i̱xti kjoàn ko̱ xi xi̱ta̱ jchínga kjoàn, ’ncha kixi̱ nguixko̱n Nainá. I̱kjoàn kitáx’a̱ jñà libro [ñánda tjít’aà mé xi kis’iìn nga jngó jngó xi̱ta̱]; koa̱ ìjngoò libro kitáx’a̱ ñánda tjít’aà ts’e̱ kjoa̱binachon. Jñà mik’en, k’oa̱á s’ín kisindaàjiìnâla̱ koni s’ín tjít’aà xo̱jo̱n ts’e̱ libro, mé kjoa̱ xi kis’iìn. 13 Jè ndáchikon kitsjaà jñà mik’en xi ya̱ k’enâjiìn. Jè kjoa̱biyaà ko̱ i̱’nde kjo̱’in ti̱koa̱á kitsjaà mik’en xi ya̱ títsa̱jna. K’oa̱á s’ín kisindaàjiìnâla̱ nga jngoò ìjngoò xi̱ta̱ koni tjín kjoa̱ xi kis’iìn. 14 Jè kjoa̱biyaà ko̱ i̱’nde kjo̱’in kinìkatsjoòjiìn ñánda títì ni’ín jnga̱. Ko̱ jñà mik’en xi mìkiì tjít’aà ‘ínâla̱ jè libro ts’e̱ kjoa̱binachon, ti̱koa̱á ya̱á kinìkatsjoòjiìn ñánda títì ni’ín jnga̱. Jè xi maâne jò kjoa̱biyaà.