Zabbuli 95

¹ Mujje tuyimbire Mukama; tuyimbire waggulu n’essanyu nga tutendereza Mukama Olwazi olw’obulokozi bwaffe.

² Tujje mu maaso ge n’okwebaza; tumuyimbire ennyimba ez’okumutendereza.

³ Kubanga Mukama ye Katonda Omukulu; era Kabaka Omukulu asinga bakatonda bonna.

⁴ Enkonko ez’ensi ziri mu mukono gwe; n’entikko z’ensozi nazo zize.

⁵ Ennyanja yiye, kubanga ye yagikola; n’emikono gye, gye gyabumba olukalu.

⁶ Mujje tusinze tuvuuname mu maaso ge; tufukamire mu maaso ga Mukama, Omutonzi waffe.

⁷ Kubanga ye Katonda waffe, naffe tuli bantu ab’omu ddundiro lye, era tuli ndiga ze z’alabirira. Olwa leero bwe muwulira eddoboozi lye,

⁸ “Temukakanyaza mitima gyammwe nga bwe kyali e Meriba , ne ku lunaku luli e Maasa mu ddungu;

⁹ bajjajjammwe gye bangezesa; newaakubadde baali baalaba dda ebyamagero bye nakola.

¹⁰ Abantu b’omulembe ogwo ne mbasunguwalira okumala emyaka amakumi ana; ne ŋŋamba nti, ‘Be bantu abakyama mu mutima gwabwe, era tebamanyi makubo gange.’

¹¹ Kyennava ndayira nga nsunguwadde nti, ‘Tebaliyingira mu kiwummulo kyange.’ ”