Zabbuli 6

¹ Ayi Mukama, tonnenya ng’ojjudde obusungu; so tombonereza mu kiruyi kyo.

² Onsaasire, Ayi Mukama, kubanga ndi munafu. Omponye, Ayi Mukama, kubanga amagumba gange gali mu bulumi.

³ Emmeeme yange ejjudde ennaku. Olirindirira kutuusa ddi olyoke onnyambe?

⁴ Onkyukire, Ayi Mukama, olokole omwoyo gwange; omponye okufa olw’okwagala kwo okungi.

⁵ Kubanga tewali ayinza kukujjukira ng’amaze okufa. Ani alikutendereza ng’asinziira emagombe?

⁶ Mpweddemu amaanyi olw’okusinda. Buli kiro obuliri bwange bujjula amaziga gange n’omutto ne gutoba.

⁷ Amaaso gange ganafuye olw’okunyolwa, tegakyalaba bulungi olw’abalabe bange.

⁸ Muve we ndi mmwe mwenna abakola ebibi; kubanga Mukama awulidde okukaaba kwange.

⁹ Mukama awulidde okwegayirira kwange, n’okusaba kwange akukkirizza.

¹⁰ Abalabe bange bonna baliswazibwa era balitya nnyo; bazzibwe emabega nga bajjudde obuswavu mangu ago.