Zabbuli 26

¹ Onnejjeereze, Ayi Mukama, kubanga obulamu bwange tebuliiko kya kunenyezebwa; nneesiga ggwe, Ayi Mukama, nga sibuusabuusa.

² Neetegereza, Ayi Mukama, ongezese; weekalirize ebiri mu mutima gwange ne mu mmeeme yange.

³ Kubanga okwagala kwo kwe kunkulembera, era mu mazima go mwe ntambulira.

⁴ Situula na bantu balimba, so siteesaganya na bakuusa.

⁵ Nkyawa ekibiina ky’aboonoonyi; so situula na bakozi ba bibi.

⁶ Naaba mu ngalo zange okulaga nga bwe sirina misango; ne ndyoka nzija ku Kyoto kyo, Ayi Mukama;

⁷ ne nnyimba oluyimba olw’okwebaza, olwogera ku bikolwa byo ebyewuunyisa.

⁸ Ennyumba yo mw’obeera njagala, Ayi Mukama, kye kifo ekijjudde ekitiibwa kyo.

⁹ Tombalira mu boonoonyi, wadde mu batemu,

¹⁰ abakozesa emikono gyabwe okutegeka ebikolwa ebibi, era abali b’enguzi.

¹¹ Naye nze ntambula nga siriiko kye nnenyezebwa; nkwatirwa ekisa, Ayi Mukama, ondokole.

¹² Nnyimiridde watereevu. Nnaatenderezanga Mukama mu kibiina ky’abantu ekinene.