Zabbuli 149

¹ Mutendereze Mukama! Muyimbire Mukama oluyimba oluggya, mumutenderereze wamu n’ekibiina ky’abatukuvu.

² Isirayiri asanyukirenga eyamutonda; n’abantu ba Sayuuni bajagulize Kabaka waabwe!

³ Batenderezenga erinnya lye nga bwe bazina, bamutenderezenga nga bwe bakuba ennanga n’ebitaasa.

⁴ Kubanga Mukama asanyukira abantu be, n’abawombeefu abawa engule ey’obulokozi.

⁵ Abatuukirivu bajagulizenga mu kitiibwa kino; bayimbire ku bitanda byabwe olw’essanyu.

⁶ Batenderezenga Katonda waabwe, bakwate ekitala eky’obwogi obubiri,

⁷ bawoolere eggwanga, babonereze n’amawanga,

⁸ bateeke bakabaka baago mu njegere, n’abakungu baago babasibe amagulu n’ebyuma,

⁹ babasalire omusango ogwabawandiikirwa. Kino kye kitiibwa ky’abatukuvu be bonna. Mutendereze Mukama.