उत्पत्ति 29

¹ याकूब न अपनी रस्ता पकड़ी, अऊर पूर्व को निवासियों को देश म आयो।

² ओन नजर कर क् देख्यो कि मैदान म एक कुंवा हय, अऊर ओको जवर शेरी मेंढियों को तीन झुण्ड बैठ्यो हुयो हंय; कहालीकि जो गोटा ऊ कुंवा को ऊपर रहत होतो, जेको म सी झुण्डों ख पानी पिलायो जात होतो, ऊ भारी होतो।

³ अऊर जब सब झुण्ड वहां जमा होय जावय तब चरावन वालो ऊ गोटा ख कुंवा को ऊपर सी गंडलाय क शेरी मेंढियों ख पानी पिलात होतो, अऊर फिर गोटा ख कुंवा को ऊपर जसो को वसो रख देत होतो।

⁴ तब याकूब न चरावन वालो सी पुच्छ्यो, “हे मोरो भाऊवों, तुम कित सी आयो हय?” उन्न कह्यो, “हम हारान नगर सी आयो हंय।”

⁵ तब याकूब न उन्को सी पुच्छ्यो, “का तुम नाहोर को नाती लाबान ख जानय हय?” उन्न कह्यो, “हव, हम ओख जानजे हंय।”

⁶ तब ओन उन्को सी पुच्छ्यो, “का ऊ खुश हय?” उन्न कह्यो, “हव, ऊ खुश हय अऊर तब, ओकी बेटी राहेल शेरी मेंढियों ख धर क चली आवय हय।”

⁷ याकूब न कह्यो, “देखो, अभी त दिन बहुत हय, जनावरों को जमा होन को समय नहीं आयो हय; येकोलायी शेरी मेंढियों ख पानी पिलाय क फिर सी लिजाय क चरावों।”

⁸ उन्न कह्यो, “हम अभी असो नहीं कर सकजे; जब सब झुण्ड जमा होवय हंय तब गोटा कुंवा को ऊपर सी गंडलायो जावय हय, अऊर तब हम शेरी मेंढियों ख पानी पिलाजे हंय।”

⁹ उन्की यो बात चीत होतच रह्य कि राहेल, जो जनावर चरायो करत होती, अपनो बाप की शेरी मेंढियों ख धर क आय गयी।

¹⁰ याकूब न अपनो मामा अऊर लाबान की बेटी राहेल ख, अऊर ओकी शेरी मेंढियों ख देख्यो त जवर जाय क कुंवा को ऊपर सी गोटा ख गंडलायो अऊर अपनो मामा लाबान की शेरी मेंढियों ख पानी पिलायो।

¹¹ तब याकूब न राहेल को चुम्यो, अऊर जोर जोर सी रोयो।

¹² अऊर याकूब न राहेल ख बताय दियो, कि मय तोरो फुफ भाऊ आय, मतलब रिबका को टुरा आय। तब राहेल दौड़ क अपनो बाप सी कह्य दियो।

¹³ अपनो भास्या याकूब को समाचार पातोच लाबान ओको सी मिलन ख दौड़्यो, अऊर ओख गलो लगाय क चुम्यो, तब अपनो घर ले आयो। याकूब न लाबान ख अपनो सब लेखा सुनायो।

¹⁴ तब लाबान न याकूब सी कह्यो, “तय त सचमुच मोरी हड्डी अऊर मांस हय।” अऊर याकूब एक महीना भर ओको संग रह्यो।

¹⁵ तब लाबान न याकूब सी कह्यो, “कुटुम्बी होन को वजह तोरो सी फुकट म सेवा करवानो मोरो लायी उचित नहाय; येकोलायी मोख बताव कि मय तोख सेवा को बदला म का देऊं?”

¹⁶ लाबान की दोय बेटियां होती, जिन्म सी बड़ी को नाम लिआ अऊर छोटी को राहेल होतो।

¹⁷ लिआ की आंखी धुन्धरी होती, पर राहेल बहुत अच्छी अऊर सुन्दर होती।

¹⁸ येकोलायी याकूब न, जो राहेल सी प्रेम करत होतो, ओन कह्यो, “मय तोरी छोटी बेटी राहेल लायी सात साल तोरी सेवा करूं।”

¹⁹ लाबान न कह्यो, “ओख परायो आदमी ख देन सी अच्छो तोख देनो अच्छो होयेंन; येकोलायी मोरो जवर रह्य।”

²⁰ तब याकूब न राहेल लायी सात साल सेवा करी; अऊर हि ओख राहेल को प्रेम को वजह थोड़ोच दिनों को बराबर जान पड़्यो।

²¹ तब याकूब न लाबान सी कह्यो, “मोरी पत्नी मोख दे, अऊर मय ओको जवर जाऊं, कहालीकि मोरो समय पूरो भय गयो हय।”

²² तब लाबान न ऊ जागा को सब आदमियों ख बुलाय क जमा करयो, अऊर बिहाव को खाना दियो।

²³ शाम को समय ऊ अपनी बेटी लिआ ख याकूब को जवर ले गयो, अऊर याकूब ओको जवर गयो।

²⁴ लाबान न अपनी बेटी लिआ ख अपनी दासी जिल्पा दी कि वा ओकी सेवा करे।

²⁵ सुबेरे ख मालूम भयो कि या त लिआ आय, येकोलायी ओन लाबान सी कह्यो, “यो तय न मोरो संग का करयो हय? मय न तोरो संग रह्य क जो तोरी सेवा करी, त का राहेल लायी नहीं करी? फिर तय न मोरो सी असो कहाली धोखा करयो हय?”

²⁶ लाबान न कह्यो, “हमरो यहां असी रीति नहाय कि बड़ी बेटी सी पहिले दूसरी को बिहाव कर दे।

²⁷ येको हप्ता त पूरो कर; तब दूसरी भी तोख ऊ सेवा लायी मिलेंन जो तय मोरो संग रह्य क अऊर सात साल तक करजो।”

²⁸ याकूब न असोच करयो, अऊर लिआ को हप्ता ख पूरो करयो; तब लाबान न ओख अपनी बेटी राहेल भी दी कि वा ओकी पत्नी हो।

²⁹ लाबान न अपनी बेटी राहेल की दासी होन लायी अपनी दासी बिल्हा ख दियो।

³⁰ तब याकूब राहेल को जवर भी गयो, पर ओन लिआ सी जादा राहेल सी प्रेम करयो; ओन सात साल अऊर लाबान की सेवा करी।

³¹ जब यहोवा न देख्यो, कि लिआ सी नफरत करी जावय हय, तब ओन ओख गर्भवती बनायो, पर राहेल बांझ रही।

³² तब लिआ गर्भवती भयी अऊर ओको एक टुरा पैदा भयो, अऊर ओन यो कह्य क ओको नाम रूबेन रख्यो, “यहोवा न मोरो दु:ख पर नजर करी हय, अब मोरो पति मोरो सी प्रेम रखेंन।”

³³ तब वा गर्भवती भयी अऊर ओको एक टुरा पैदा भयो; तब ओन यो कह्यो, “यो सुन क कि मोरो सी नफरत करी गयी हय, यहोवा न मोख यो टुरा भी दियो।” येकोलायी ओन ओको नाम शिमोन रख्यो।

³⁴ तब वा गर्भवती भयी अऊर ओको एक टुरा पैदा भयो; अऊर ओन कह्यो, “अब त मोरो पति मोरो सी मिल जायेंन, कहालीकि ओको सी मोरो तीन टुरा पैदा भयो।” येकोलायी ओको नाम लेवी रख्यो गयो।

³⁵ अऊर तब वा गर्भवती भयी अऊर ओको एक अऊर टुरा पैदा भयो; अऊर ओन कह्यो, “अब त मय यहोवा को धन्यवाद करूं।” येकोलायी ओन ओको नाम यहूदा रख्यो; तब ओकी कोख बन्द होय गयी।