यहेजकेल 19

¹ इस्राएल को मुखियावों को बारे म तय यो विलापगीत सुनाव :

² तोरी माय एक कसी सिंहनी होती! वा सिंहों को बीच म बैठत होती अऊर अपनो बच्चां ख जवान सिंहों को बीच म पालन पोसन करत होती।

³ अपनो बच्चा म सी ओन एक ख पाल्यो अऊर ऊ सिंह जवान भय गयो, अऊर ऊ शिकार करनो सीख गयो; ओन आदमियों ख भी फाड़ खायो।

⁴ राज्य राज्य को लोगों न ओको बारे म सुन्यो, अऊर ओख अपनो खोद्यो हुयो गड्डा म फसायो, अऊर ओको नाक म हुक डाल क मिस्र देश म ले गयो।

⁵ जब ओकी माय सिंहनी न देख्यो कि ओकी आशा पूरी नहीं भयी, ओकी आशा टूट गयी, तब ओन अपनो एक बच्चा ख पाल्यो अऊर ओख जवान सिंह बनायो।

⁶ तब ऊ सिंह जवान होय क सिंहों को बीच चलन फिरन लग्यो, अऊर ऊ भी शिकार करनो सीख गयो; अऊर आदमियों ख भी फाड़ खायो।

⁷ ओन उन्को भवनों ख नाश कर दियो, अऊर उन्को नगरों ख उजाड़ दियो, पूरो देश अऊर ओको म रहन वालो सब लोग ओकी दहाड़ सी डर गयो।

⁸ तब चारयी तरफ को राज्य राज्य को लोग अपनो अपनो प्रान्त सी ओको खिलाफ भय गयो, अऊर ओको लायी जार बिछायो; अऊर ऊ उन्को खोद्यो हुयो गड्डा म फस गयो

⁹ तब उन्न ओको नाक म हुक डाल क कठघरा म बन्द कर क् बेबीलोन को राजा को जवर ले गयो, अऊर किल्ला म पिंजरा को अन्दर बन्द कर दियो, ताकी ओकी दहाड़ इस्राएल को पहाड़ी देश म फिर कभी सुनायी नहीं दे।

¹⁰ तोरी माय जेकोसी तय पैदा भयो, वा किनार पर लगायो गयो अंगूर की बाड़ी म अंगूर एक बेला को समान होती, अऊर गहरो पानी को वजह फर अऊर डगालियों सी लदी होती।

¹¹ ओकी डगालियां मजबूत होती, अऊर एक शासन करन वालो राजा को राजदण्ड बनन लायक होती; अऊर ओकी ऊंचायी इतनी भयी कि वा बादलो तक पहुंच गयी; अऊर अपनी बहुत सी डगालियों समेत बहुतच लम्बी भय गयी।

¹² तब भी ओख क्रोध म भर क उखाड़ क जमीन पर फेक दियो गयो, अऊर ओको फर पूर्व की हवा लगन सी सूख गयो; अऊर ओकी मोटी डगालियां टूट क सूख गयी; अऊर ओख आगी म जलाय क नाश कर दियो गयो।

¹³ अब ओख निर्जन प्रदेश म एक सूखी अऊर प्यासी जमीन म लगायो गयो हय।

¹⁴ ओकी मुख्य डगाली म सी आगी निकली, जेकोसी ओको फर जर क भस्म भय गयो, ओको म अऊर कोयी मजबूत डगाली नहीं बची जो शासन करन वालो को राजदण्ड को लायी लायक हो, यो एक विलापगीत आय, अऊर यो एक विलापगीत को रूप म प्रचलित हय।