निर्गमन 40

¹ तब परमेश्वर न मूसा सी कह्यो,

² “पहिलो महीना को पहिलो दिन ख तय मिलाप वालो तम्बू को निवास ख खड़ो कर देजो।

³ अऊर ओको म गवाही चिट्ठी को सन्दूक ख रख क बीच वालो परदा की आड़ म कर देजो।

⁴ अऊर मेज ख अन्दर लिजाय क जो कुछ ओको पर सजानो हय ओख सजाय देजो; तब दीवट ख अन्दर लिजाय क ओको दीयावों ख जलाय देजो।

⁵ अऊर गवाही चिट्ठी को सन्दूक को आगु सोनो की वेदी ख, जो धूप लायी हय ओख रखजो, अऊर निवास को दरवाजा को परदा ख लगाय देजो।

⁶ अऊर तय मिलाप वालो तम्बू को निवास को फाटक को आगु होमबलि वेदी ख रखजो।

⁷ अऊर मिलाप वालो तम्बू फिर वेदी को बीच गंगार ख रख क् उन्म पानी भर देजो।

⁸ अऊर तय चारयी तरफ आंगन बाड़ा बान्ध क आंगन को फाटक पर परदा लटकाय देजो।

⁹ तब तय अभिषेक को तेल ले क निवास जागा अऊर जो कुछ ओको म हय, सब को अभिषेक करजो अऊर ओख अऊर ओकी पूरी चिजे ख पवित्र करजो; तब वा पवित्र होय जायेंन।

¹⁰ अऊर तय होमबलि वेदी अऊर ओकी सब चिजे ख अभिषेक कर क् वेदी ख अर्पन करजो; तब वेदी परम पवित्र होय जायेंन।

¹¹ अऊर तय पाय समेत गंगार ख भी अभिषेक कर क् ओख पवित्र करजो।

¹² तब तय हारून अऊर ओको टुरावों ख मिलाप वालो तम्बू को फाटक पर लिजाय क पानी सी नहलाजो,

¹³ अऊर तय हारून ख पवित्र कपड़ा पहिनाजो, अऊर ओको अभिषेक कर क् ओख अर्पन करजो, ताकि ऊ मोरो लायी याजक होय क मोरी सेवा काम करेंन।

¹⁴ अऊर तय ओको टुरावों ख भी लायजो अऊर उन्ख कुरता पहिनाजो।

¹⁵ अऊर तय उन्को वसोच संस्कार करजो जसो उन्को बाप को संस्कार करयो होतो, कि हि मोरो लायी याजकीय सेवा काम कर सके; अऊर उन्को अभिषेक उन्की पीढ़ी सी पीढ़ी लायी हमेशा लायी याजक बन्यो रहेंन।”

¹⁶ मूसा न असोच करयो, जो आज्ञा परमेश्वर न उन्ख दी होती, ओको अनुसार उन्न सब काम करयो।

¹⁷ अऊर दूसरो साल को पहिलो महीना को पहिलो दिन को निवास ख खड़ो करयो गयो।

¹⁸ मूसा न निवास ख खड़ो करयो, तब पाया पर तक्ता रख क उन्म बेंड़ा डाल्यो, अऊर ओको खम्बों ख खड़ो करयो;

¹⁹ अऊर ओन निवास को ऊपर तम्बू ख फैलायो, अऊर तम्बू को ऊपर ओन ओढ़ना ख लगायो; जो तरह परमेश्वर न मूसा ख आज्ञा दी होतो।

²⁰ अऊर ओन गवाही चिट्ठी ख ले क सन्दूक म रख्यो, अऊर सन्दूक म डन्डा ख लगाय क ओको ऊपर प्रायश्चित को ढक्कन ख सन्दूक को ऊपर रख दियो;

²¹ अऊर मूसा न सन्दूक ख पवित्र जागा म रखवायो, अऊर बीच वालो परदा ख लटकाय दियो अऊर गवाही चिट्ठी ख सन्दूक ख अन्दर परदा की आड़ म करयो; जसो परमेश्वर न मूसा ख आज्ञा दी होतो।

²² तब मूसा न मिलाप वालो तम्बू म निवास को उत्तर दिशा म बीच को परदा को बाहेर मेज लगवायो,

²³ उन्न ओको पर परमेश्वर को जवर रोटी सजाय क रखी; जसी परमेश्वर न मूसा ख आज्ञा दी होतो।

²⁴ अऊर मूसा न मिलाप वालो तम्बू म मेज को आगु निवास को दक्षिन दिशा म दीवट ख रख दियो,

²⁵ अऊर ओन दीयावों ख परमेश्वर को आगु जलाय दियो; जो तरह परमेश्वर न मूसा ख आज्ञा दी होतो।

²⁶ तब मूसा न मिलाप वालो तम्बू को अन्दर बीच को परदा को आगु सोनो की वेदी ख रख्यो,

²⁷ अऊर ओन ओको पर सुगन्धित धूप जलायो; जो तरह परमेश्वर न मूसा ख आज्ञा दी होती।

²⁸ अऊर ओन निवास को दरवाजा पर परदा ख लगायो।

²⁹ अऊर मिलाप वालो तम्बू को निवास को दरवाजा पर होमबलि वेदी ख रख क ओको पर होमबलि अऊर अन्नबलि ख चढ़ायो; जो तरह परमेश्वर न मूसा ख आज्ञा दी होती।

³⁰ अऊर मूसा न मिलाप वालो तम्बू अऊर वेदी को बीच म गंगार ख रख क ओको म धोवन लायी पानी भर दियो,

³¹ अऊर मूसा अऊर हारून अऊर ओको टुरावों न ओको म अपनो अपनो हाथ पाय धोवत होतो;

³² अऊर जब जब हि मिलाप वालो तम्बू म यां वेदी को जवर जात होतो तब तब हि हाथ पाय धोय क जात होतो; जो तरह परमेश्वर न मूसा ख आज्ञा दी होती।

³³ अऊर मूसा न मिलाप वालो तम्बू अऊर वेदी को चारयी तरफ आंगन ख घेरा लगाय क अऊर आंगन को फाटक पर परदा लटकाय दियो। येकोलायी ओन पूरो काम खतम कर दियो।

³⁴ तब बादर मिलाप वालो तम्बू पर छाय गयो, अऊर परमेश्वर को तेज निवास-जागा म भर गयो।

³⁵ अऊर बादर मिलाप वालो तम्बू पर रूक गयो, अऊर परमेश्वर को तेज निवास-जागा म भर गयो, यो वजह मूसा ओको म सिर नहीं सक्यो।

³⁶ अऊर उन्की पूरी यात्रा म जब जब ऊ बादर मिलाप वालो तम्बू को ऊपर सी उठ जात होतो, तब तब इस्राएली आगु सी निकल जात होतो;

³⁷ पर यदि बादर नहीं उठत होतो, त हि ऊ दिन तक निकलत नहीं होतो जब तक बादर वहां सी उठत नहीं होतो।

³⁸ कहालीकि उन्की पूरी यात्रा म परमेश्वर दिन म मिलाप वालो तम्बू पर रूक्यो रहत होतो, अऊर रात म इस्राएली लोगों ख ओको म आगी दिखायी देत होती।