निर्गमन 16

¹ तब इस्राएलियों की पूरी मण्डली एलीम सी निकल क, सीन नाम को जंगल म पहुंच्यो, जो एलीम अऊर सीनै पहाड़ी को बीच म हय, मिस्र देश सी निकल्यो हुयो दोय महीना पन्द्रह दिन हो चुक्यो।

² सुनसान जागा म इस्राएलियों की पूरी मण्डली मूसा अऊर हारून को विरोध म बड़ बड़ान लग्यो।

³ अऊर इस्राएली उन्को सी कहन लग्यो, “जब हम मिस्र देश म मांस अऊर बहुत सी हान्डियों को जवर बैठ क पेट भर जेवन करत होतो, तब हम परमेश्वर को हाथ सी मार डाल्यो भी जातो त सही होतो; पर तुम हम ख या जागा म पूरो लोगों ख भूख सी मार डालन लायी मिस्र देश सी हम्ख निकाल लायो हय।”

⁴ तब परमेश्वर न मूसा सी कह्यो, “देखो, मय तुम लोगों लायी स्वर्ग सी जेवन लायी भोजन बरसाऊं; अऊर यो लोग दिन भर पूरेंन इतनोच बाहेर जाय क हर दिन को भोजन जमा करेंन, मय इन्क जाचूं कि यो मोरो बतायो अनुसार वसोच करय का नहीं।

⁵ अऊर असो होयेंन कि छठवो दिन ऊ भोजन पहिलो दिनों सी दोय गुना होयेंन, छठवो दिन ख दोय दिन पूरेंन इतनो तैयार करो।”

⁶ येकोलायी मूसा अऊर हारून न पूरो इस्राएलियों सी कह्यो, “शाम ख तुम जान लेवो कि जो तुम ख मिस्र देश सी निकाल लायो हय ऊ योच परमेश्वर आय,

⁷ अऊर सुबेरे तुम्ख ओको महिमा को तेज दिखेंन, कहालीकि तुम जो परमेश्वर पर बुड़बुड़ावय हय ओख ऊ सुनय हय। अऊर हम का हंय कि तुम हम पर बुड़बुड़ावय हय।”

⁸ फिर मूसा न कह्यो, “या तब होयेंन जब परमेश्वर शाम ख तुम्ख खान लायी मांस अऊर सुबेरे पेट भर रोटी देयेंन; कहालीकि तुम जो ओको पर बुड़बुड़ावय हय ओख ऊ सुनय हय। अऊर हम का हंय? तुम्हरो बुड़बुड़ानो हम पर नहीं परमेश्वरच पर होवय हय।”

⁹ फिर मूसा न हारून सी कह्यो, “इस्राएलियों की पूरी मण्डली ख आज्ञा दे कि परमेश्वर को जवर आये, कहालीकि ओन उन्को बुड़बुड़ानो सुन्यो हय।”

¹⁰ जब हारून इस्राएलियों की पूरी मण्डली सी बात कर रह्यो होतो, कि अचानक उन्न सुनसान जागा की तरफ नजर कर क् देख्यो, अऊर उन्ख परमेश्वर को तेज बादर म दिखायी दियो।

¹¹ तब परमेश्वर न मूसा सी कह्यो,

¹² “इस्राएलियों को बुड़बुड़ानो मय न सुन्यो हय; उन्को सी कह्य दे कि हर शाम ख तुम्ख मांस अऊर सुबेरे पेट भर रोटी सी तृप्त होय जावो; अऊर तुम जान जाजो कि मयच तुम्हरो परमेश्वर आय।”

¹³ तब असो भयो कि शाम ख लावा पक्षी आय क पूरी छावनी पर बैठ गयी; अऊर सुबेरे छावनी को चारयी तरफ ओस गिरी।

¹⁴ अऊर जब ओस सूख गयी त हि का देखय हंय कि सुनसान जागा पर छोटो छोटो जमी ओस को जसो छोटो कन दिखायी दियो।

¹⁵ यो देख क इस्राएली लोग, जो न जानत होतो कि या का चीज आय, कहालीकि हि नहीं जानत होतो कि ऊ का आय। तब मूसा न उन्को सी कह्यो, “या उच जेवन आय जेक परमेश्वर तुम्ख खान लायी देवय हय।

¹⁶ जो आज्ञा परमेश्वर न दियो हय वा या आय : तुम ओको म सी अपनी जरूरत को अनुसार खान लायी जमा करजो, मतलब तम्बू म रहन वालो अपनो अपनो लोगों की गिनती को अनुसार, हर एक आदमी को पीछु एक एक ओमेर जमा करजो; जेको तम्बू म जितनो हो ऊ उन्कोच लायी जमा करे।”

¹⁷ अऊर इस्राएलियों न वसोच करयो; अऊर कोयी न अधिक, अऊर कोयी न थोड़ो जमा करयो।

¹⁸ जब उन्न ओको पायली सी नाप्यो, तब जिन्को जवर जरूरत सी जादा होतो ओको जवर अधिक नहीं, अऊर जिन्को जवर थोड़ो होतो उन्को जवर कुछ कम नहीं निकल्यो; कहालीकि हर एक न अपनो जेवन अनुसार जमा करयो होतो।

¹⁹ फिर मूसा न उन्को सी कह्यो, “कोयी भी येको म सी कल सबेरे लायी बचाय क मत रखो।”

²⁰ पर कुछ लोगों न मूसा की बात नहीं मानी; अऊर ओको म सी कुछ बाकी सुबेरे लायी बचायो, त ओख म कीड़ा पड़ गयो अऊर ऊ बास करन लग्यो; तब मूसा उन लोगों पर गुस्सा भयो

²¹ हि हर दिन सुबेरे अपनी जरूरत को अनुसार जेवन लायी मन्ना जमा करत होतो, अऊर जब सूर्य की कड़ी तपन होनो पर ऊ पिघल जात होती।

²² फिर असो भयो कि छठवो दिन उन्न दोय गुना, मतलब हर आदमी को पीछु दोय दोय पायली मन्ना जमा कर लियो, तब इस्राएली मण्डली को सब मुखिया न आय क मूसा ख बतायो।

²³ तब मूसा न उन्को सी कह्यो, “या वा बात आय जो परमेश्वर न असो कह्यो कि, कहालीकि कल परम आराम, मतलब परमेश्वर लायी पवित्रता को आराम दिन हय, अज तुम्ख जितनो पकानो हय, उतनो पकावों, जितनो उबालनो हय उतनो उबालो, अऊर येको म सी जितनो बचेंन ओख सबेरे लायी रखो।”

²⁴ जब उन्न मूसा की आज्ञा को अनुसार सुबेरे तक रख्यो, तब नहीं त ऊ बासो भयो, अऊर नहीं ओको म कीड़ा भयो।

²⁵ तब मूसा न कह्यो, “अज परमेश्वर को आराम दिन हय; येकोलायी तुम उच खावो, अज मन्ना मैदान म नहीं मिलेंन।

²⁶ छय दिन त तुम ओख जमा करजो; पर सातवों दिन आराम को दिन हय, ओको म ऊ नहीं मिलेंन।”

²⁷ तब भी लोगों म सी कोयी कोयी सातवों दिन भी जमा करन बाहेर गयो, पर उन्को कुछ नहीं मिल्यो।

²⁸ तब परमेश्वर न मूसा सी कह्यो, “तुम लोग मोरी आज्ञावों अऊर नियमों ख कब तक नहीं मानो?

²⁹ परमेश्वर न जो तुम ख आराम को दिन दियो हय, योच वजह ऊ छठवो दिन ख दोय दिन को जेवन तुम्ख देवय हय; येकोलायी तुम अपनो अपनो जागा पर बैठे रहना, सातवों दिन कोयी अपनो जागा सी बाहेर नहीं जावो।”

³⁰ येकोलायी लोगों न सातवों दिन आराम करयो।

³¹ इस्राएल लोगों न उच चीज को नाम मन्ना रख्यो, समार को दाना जसो सफेद होतो। अऊर ओको स्वाद शहेद सी बन्यो पुवा को जसो होतो।

³² फिर मूसा न कह्यो, “परमेश्वर न आज्ञा दियो कि ऊ यो आय कि येख म सी ओमेर भर ‘मन्ना’ अपनो वंश की पीढ़ी पीढ़ी लायी रख छोड़ो, जेकोसी हि जान कि परमेश्वर हम्ख मिस्र देश सी निकाल क सुनसान जागा म कसी रोटी खिलावत होतो।”

³³ तब मूसा न हारून सी कह्यो, “एक बर्तन ले क ओख म ओमेर भर मन्ना ले क ओख परमेश्वर को आगु रख देवो कि ऊ तुम्हरो पीढ़ियों लायी रख्यो रहें।”

³⁴ जसो आज्ञा परमेश्वर न मूसा ख दियो होती, ओको को अनुसार हारून न बर्तन ख साक्षी को सन्दूक को आगु रख दियो कि ऊ उत रख्यो रहो।

³⁵ इस्राएलियों लोग जब ऊ देश म नहीं पहुंच्यो तब तक, मतलब लोगों न चालीस साल तक मन्ना खातो रह्यो; हि जब तक कनान देश की सीमा पर नहीं पहुंच्यो तब तक मन्ना खात रह्यो।

³⁶ एक ओमेर मतलब पायली त एपा को दसवा हिस्सा आय।