सभोपदेशक 10

¹ मरी हुयी माखी को वजह अत्तर को सड़नो अऊर बास आवन लगय हय; अऊर थोड़ी सी मूर्खता बुद्धि अऊर मान सम्मान ख घटाय देवय हय।

² बुद्धिमान को मन उचित बात को तरफ रह्य हय पर मूर्ख को मन ओको खिलाफ रह्य हय।

³ जब मूर्ख रस्ता पर चलतो हुयो जावय हय, तब ओको चलनो सीच ओकी मूर्खता दिख जावय हय, जेको सी हर व्यक्ति देख लेवय हय, कि ऊ मूर्ख हय।

⁴ यदि शासक को गुस्सा तोरो पर भड़के, त अपनी जागा मत छोड़जो, कहालीकि धीरज धरनो सी बड़ो बड़ो अपराध रुकय हय।

⁵ एक बुरायी हय जो मय न धरती पर देखी, या बुरायी शासक की भूल सी होवय हय :

⁶ मतलब मूर्ख बड़ी मान सम्मान की जागा म ठह्यरायो जावय हंय, अऊर धनवान लोग खल्लो बैठय हय।

⁷ मय न गुलामों ख घोड़ा पर जातो देख्यो हय, जब की शासक गुलामों को तरह पैदल चल रह्यो होतो।

⁸ जो दूसरो लायी गड्डा खोदय हय ऊ खुद ओको म गिरेंन अऊर जो दीवार तोड़य ओख सांप डसेन।

⁹ जो गोटा फोड़ेंन, ऊ गोटा सीच घायल होयेंन, अऊर जो लकड़ी काटेंन, ओख लकड़ी सीच डर रहेंन।

¹⁰ यदि टंगिया बोथड़ हो अऊर आदमी ओकी धार ख पैनी नहीं करेंन, त ओख उपयोग करनो म ज्यादा ताकत लगानो पड़ेंन; पर सफल होन लायी बुद्धि सी लाभ होवय हय।

¹¹ यदि मंत्र सी पहिले सांप डसेन, त मंत्र पढ़न वालो ख कुछ भी लाभ नहीं।

¹² बुद्धिमान को शब्द को वजह अनुग्रह होवय हय, पर मूर्ख अपनो शब्द को द्वारा नाश होवय हय।

¹³ मूर्ख को मुंह सी निकल्यो शब्द सुरूवात सी आखरी तक मूर्खता सी पूरो होवय हय, ओकी बात को अन्त दुष्टतापूर्ण पागलपन होवय हय।

¹⁴ मूर्ख आदमी बहुत बाते बढ़ाय क बोलय हय, तब भी कोयी आदमी नहीं जानय कि का होयेंन, अऊर कौन बताय सकय हय कि ओको बाद का होन वालो हय?

¹⁵ मूर्ख को परिश्रम ओख थकावय हय, इतनो कि ओख वापसी लायी नगर की रस्ता भी नहीं जानय हय।

¹⁶ हे देश, तोरो पर हाय जब तोरो राजा बिना अनुभव वालो सेवक आय अऊर तोरो शासक प्रात:काल भोज करय हंय!

¹⁷ हे देश, तय धन्य हय जब तोरो राजा अच्छो वंशज सी हय, अऊर तोरो शासक समय पर भोज करय हंय, अऊर ऊ भी मतवालो होन ख नहीं, बल्की ताकत हासिल करन लायी!

¹⁸ आलस को वजह छत गिर जावय हय, अऊर सुस्ती सी घर चुनो लगय हय।

¹⁹ भोज हसी खुशी लायी करयो जावय हय, अऊर अंगूरीरस सी जीवन ख आनन्द मिलय हय; अऊर रुपया सी सब कुछ हासिल होवय हय।

²⁰ अपनो मन म भी राजा की निन्दा मत करो, अऊर न अपनी आराम की जागा म रईसों की बुरायी करो। आसमान को पक्षी तोरो शब्द लिजायेंन, अऊर कोयी उड़न वालो जीव जन्तु खबर कर देयेंन।