2 Kórínti 8

1 kesí kwaásiyono. Másétóniyaa-marava’o naaó’-nao’a máyáawai Áánútuna kwaási kwemá kwétuwa’naa-in-aimba simátimenaumpo ísáaro. 2 anón-umbai-yantaa’a miwítópa’a téna kwétavisisasa íma ivátuwesa Áánútuntavena tirunkó kawe’á úmae íyísasa miwí kesáváí óísaniyaain-kwaasi máyáantavesa íma imáyáa ésa Yútiyaa-marava’a Ísóigona kwaási máyáawaiyavesa imáyáa ésa sáwíyan-oisamba makáampinkemba sáwíva-tantaa’a torupásuwesa túwa’naa uráawe. 3 árair-aimba simátimune. miwí sésa maarán-tántáá’á kanaán-umai timénaumpo ó’omba torupamái timénáe sésa miwítí imáyáavinkemba mirá ésa sáwíva’a tímakaawe. 4 kentááyávésa asiramái símae iyésa sésa Yútiyaa-marava’a Ísóigona kwaási máyáawai timénáe sétaamo únda aamoí kwéune siráawe. 5 imáyáawe su’maimo únda-yantaare su’mai íma tímakaavo ó’on-o’on-tantaakwara’a timésa aiva’á Ísóigontavesa sésa ená kwaási-i’a umáíya méta ená mayáíyá kwémayaumne sirésa Áánútuna imáyáavinkemba kentááyávésa sésa Áánútuna mayáí simásimiyata keinárawate mayánaumne sésa 6 maanká’á Másétóniyaa-marava’a máyáawai mirán-áímbá siráamba póta Táításimba simámeta séta Yútiyaa-marava’a Ísóigona kwaási túwa’naa ónááom-bayai Kórínti-naopa’a koááimba ásáre tayauweré kuré túwa’naa inasá torupamái maráíyana ánásaino Táításimba simámakaumne. 7 ó’on-o’om-bayai kawe’á umái kwémaraawai é’a Áánútun-aaiyave’a asiramái imáyáa kwée’a kwenáái kawe’á umái kwésimatime’a kwenááigona ááimba kawe’á umái kwéise’a karuwaa’á é’a kwétuwa’naa-e’a kentirumbá kwésime’a mirámó kwéon-kwaasi ontávéta simátimeta séta Yútiyaa-marava’a Ísóigona kwaási máyáawai túwa’naa ónááomba kawe’á umái timénááowe kwésune. 8 maanká’á Másétóniyaa-maravakewai Yútiyaa-marava’a Ísóigona kwaási máyáawaiyavesa imáyáa ésa kawe’á umái tímakaan-aimba timénaunda mirán-oro íma kwésumpo timénááo. íya timénááoo sé’a kentirunkómbá tísaa umai kwéisaumne. 9 kentáásí Ísóigo Ísu Káráísiti úwoi kwétuwa’naa-imba ísaraawe. kwíyómpa’a ó’oran-kawe’a umái máyomba keinárawatavena imáyáa éna kwíyómpa’a tuwéna kawe’á umái ménaaontavena úwoi-kwaasiraamba umái marapá’á kumbéraiye. 10 ké’naan-aimba kesí imáyáavinkemba súmpo ísáaro. ááéma Áánútuna kwaásivinkemba keinárawa’a aiva’á sé’a torupamái timénáe sé’a ááimba asé’a moórá-ima maisukáavo ívé’a mimbáyáí ánásasuwaaro. 11 ááéma karuwaa’á umái to’mayaa é’a ívé’a karuwaa’á é’a sáwíva-tantaa’o makáawai sáwíva’a maráíyasa sáwíyambo makáawai miráumai maráíyasa miráumai maráíyana ánásaino. 12 sáwíva-tantaa’o máráane sáwíyambo máráane Áánútu tuwánanivo timénáemo síyan-tantaa’a sáwíva-tantaapinkemba sáwíva’a maré’a sáwíyampinkemba sáwíyamba maré’a timénááomba Áánútu awánéna kanaán-iye síníye. 13 túwa’naa ónááomba íma amápa’a tu’mái ánáse’a kesávé’a kwémare’a oró. 14 ánivo ívé’a makáan-tantaa’a kwáyáintave’a mimpínkémbá timé’a naaémbo ímo maránááomba miwí keinárawa’a túwa’naa ónááomba mimbóráí’a umái ménaaowe. 15 miráumai naaóvá’á Áánútun-aai aúváívimba agaimaréna moórá-tonko áwí’a máána-tone séna toóntávéna séna sáwíva’a túkúmai kwénowai tímú’a vówasa íma aráá’a márówasa sáwíyamba túkúmai kwénowai tímú’a vówana íma táái tínkaraiye agaimaréna siráiye. miráumai ívé’a makáan-tantaa’a kwáyáintave’a mimpínkémbá timé’a naaémbo ímo maránááomba miwí keinárawa’a túwa’naa ónááowe. 16 Áánútu Táításimba imáyáa ámísana kemó túwa’naa úndantemba kwegwárá’á túwa’naa ónáe kwésisata mindáyave’a Áánútumpa’a súwi kwésune. 17 Táításimba simámeta séta kotúwa’naa inasá Yútiyaa-maravaken-kwaasi túwa’naa ónááontavesa évaka-tantaa’a torupamái maránááowe súndayavenaya aamoí éna kwená imáyáavinkenkwara’a séna ó’a miwísé koménaumne Táítási siráiye. 18 Táításimba ai’máráandara’a moórá-kwaasigwara’a ai’máráanana kwesé kwíníye. kwemá áséi-kwasai simátíma’mae kwénaaisasa naaó’-naokemba Ísóigona kwaási kwenáwí’a mósá kwémaraawai kwemá Táításiye kwíníye. 19 Ísóigona kwaási naaó’-naokemba kwembá usásinankesa sésa esé mimbáyáí mayaaó sewaná keséya kwénaaena túwa’naa únda-mayaiya kwémayaisasa kentáásí mayáígómbá awánésaya sésa toómbá íma makáan-kwaasi kwétuwa’naa-owe kwésesa Ísóigo áwí’a mósá kwémaraawe. 20 mimbáyáímó kwémayaundaya sáwí’an-owe seváíyé séta 21 Ísóigo aúrankare kwaási túrankare mimbáyáí kawe’á ónáe séta naaó’-nao’a kwénaaeta torupámáráan-ontantomba maimaéta ímo makáan-kwaasi túwa’naa ondayávéta kwénaaumne. 22 minkáé’náraimo ti’máráandara’a moóráwainkwara’a ai’máráanana kwéna kaumbosé koínímba kwembá sáwíva-tawai áísaa umai awánanae súndaya kwétuwa’naa-in-kwaasigo isatá awánaraumne. keinárawa’a kawe’ó umáímo máyáan-aimba iséna póna kotúwa’naa ónáe siráiye. 23 Táításin-aai súnda kesé tágárotamai ména túwa’naa índayavena kesé mayáí kwémayaiye. kwesémo koóyááoiyan-kwaasi táái súnda mimbáyáí mayáyááoiyantavesa naaó’-naokemba Ísóigona kwaási keinárai usásintinkaraayasarai Ísu Káráísiti áwí’a mósá kwémaraaiye. 24 mindárau kentópa’a komáyaiya’a kentirumbá tíméro. kentúmo maé kwéiyundayavesamo sésa árai’a kawe’á umái máyáawe kwésesa naaémba naaó’-nao’a Ísóigona kwaási kosimátíma’mae naaíyasa kentáái isánááowe.