A Umana Kakailai 65

1 God, di tar vaninara ma ra pite varpa piram ta ra gunan Sion; Ma da pait ot pa ra vavalima piram. 2 U, u toratorom ta ra niaring, A tarai par diat a tadav u. 3 A lavur varpiam dia tur bat iau, Ma una ga pun vue diat. 4 I ti doan ra tutana ba u pilak pa ia, ma u ora upi na maravai piram; Upi na ki ra kubam; Avet a maur ma ra bo na magit ta ra kubam, Ta kaum gomgom na pal tabu iat. 5 Una ga torom ta vevet, ma una pait ra umana enana magit na bunurut ure ra takodo na maukuam, U God, u vuna ta kaveve varvalaun; U ba ra rakarakan a gunagunan i nurnur tam, Ma diat bula dia ki na ta aro vailik. 6 U vungvung vapadikat ra lavur lualuana ma ra dekdekim, U vi pit ma ra niongor; 7 U vango ra roro na ta, a roro na bobol tana, Ma ra urung kai ra lavur vuna tarai bula. 8 Diat bula dia ki ta ra langlangun aro iat dia burut ta kaum lavur vakilang; U vagugu pa diat ta ra matana taubar ma diat ta ra matana labur. 9 U tar laume ra gunan, u tar puk vabilim ia, U tar manga vauviana; A mata na tava kai God i lubu; U tabar diat ma ra kon, tago damana u vaninare ra gunan. 10 U vabilim ra nga na niipuk, U ap kana lualuana, U vamaumau ia ma ra bata, U vadoane ra lavur mangana i gol. 11 U vatoke ra kilakilala ma ra lavur bo na magit piram, Ma ba u vanavana, u imimire ra ngala na varvadoan. 12 I bura tar ta ra pia na vura ta ra bil; Ma ra umana ilil dia mal ma ra gugu. 13 A pia na vura i kor ma ra kikil na sip, Ma ra kon i tup ia ta ra umana male; Dia ngenge ma ra gugu, maia, dia kabila kakailai.