A Umana Kakailai 57

1 Una mari iau, God, una mari iau; Tago ra tulungeagu i rivarivan tam, Ma ta ra vavai na bebeam ina rivarivan, Tuk tar ta ra bung ba na ngo ra umana kaina magit. 2 Ina kail tadav God, ra Ngala Kakit, Tadav God nina i maramaravut iau. 3 Na vartuluai marama ra bala na bakut ma na valaun iau, Tago nina i mainge ba na konome iau i tar varvul. Sela. God na tulue vaarike kana varmari ma kana dovotina. 4 A tulungeagu i ki livuan ta ra umana leon; Ina va livuan ta ra umana ebar dia ngangap da ra iap, Maia, livuan ta ra tarai Ba ra ngie i diat i da ra rumu ma ra pu, Ma ra karamea i diat i da ra pakat na vinarubu i mangi. 5 Una vangala pa u mulai, God, Una ki ak ta mumur ma ra bala na bakut, Ma kaum minamar na ki ta ra rakarakan a gunagunan. 6 Dia tar vaninare ra ubene ure ra kaugu, A tulungeagu i bilua; Dia tar kal ra tung ure ian, ma diat iat dia tar bura tana. Sela. 7 God, a balagu i tur padikat, i tur padikat, Ina kakailai ma ina pite varpa. 8 Una tavangun, a tulungeagu; Amur a tavangun, a kaur ma ra pagol, Iau iat ina tavangun ta ra kavunvun iat. 9 Ina pite pa u, Luluai, livuan pire ra tarai; Ina kakailai piram livuan ta ra lavur vuna tarai; 10 Tago kaum bala na varmari i ngala ma i tuk tar ta ra lao, Ma kaum dovotina i tuk tar ta ra lavur bakut. 11 Una vangala pa u mulai, God, Una ki ak ta mumur ma ra bala na bakut, Ma kaum minamar na ki ta ra rakarakan a gunagunan.