A Umana Kakailai 26

1 Luluai, una kure maravut iau, Tago iau vanavana ma ra dovot na balagu; Iau tar nurnur bula tai ra Luluai, ma pa iau malmaliara. 2 Luluai, una gire iau, ma una valar ot pa iau; Una valar ra balagu ma ra nuknukigu. 3 Tago kaum varmari i tur ta ra luaina matagu, Ma iau tar mur kaum dovotina. 4 Pa ave ki varurung ma ra tarai vakuku, Ma pa ave varait bula ma ra umana tena vartuam. 5 Iau milikuane ra kivung kai ra umana tena varpiam Ma pa ave ki varurung ma ra umana bilak. 6 Ina gi ra limagu ma ra gomgom na mangamangana, Ma damana ina vana pire kaum uguugu na vartabar, Luluai, 7 Upi da valongore kaugu tinata na pite varpa, Ma ina varvai ure kaum lavur enana papalum. 8 Luluai, iau manane ra kubam, Ma ra pakana ba kaum minamar i ki tana. 9 Koko una vung guve avet ma ra umana tena varpiam, Ma koko kaugu nilaun na panie varurung ma ra umana tena vardodoko, 10 Nina ba ra lima i diat i pait ra kaina, Ma ra lima i diat tuna i vatur ra ngala na kul varbat. 11 Ma iau, iau vanavana ka ma ra dovot na balagu, Una valaun iau, ma una mari iau. 12 A kakigu i tur ta ra gunan i tamataman; Ta ra lavur kivung ina pite pa ra Luluai.