A Umana Kakailai 149

1 Avat a pite pa ra Luluai. Avat a kaile ra kalamana kakailai tadav ra Luluai, Avat a kakailai na pite varpa tadav ia ta ra kivung kai kana umana tena lotu. 2 Boina ba Israel na gugu ta nina i ga vaki ia; Boina ba ra umana natu i Sion diat a ga ta kadia King. 3 Boina ba diat a pite pa ra iangina ma ra malagene; Boina ba diat a pite pa ia ma ra papar kudu ma ra ubuubu pagol. 4 Tago ra Luluai i gugu ta kana tarai; Na mar diat i madu ra bala i diat ma ra niuvia. 5 Boina ba ra umana tena lotu diat a ga tuna ta ra minamar; Boina ba diat a manga kakailai ona dia va ta kadia vava. 6 A pite varpa tuna na arikai ta ra ngie i diat, Ma ra pakat na vinarubu ba i mangi vartalai na tur ta ra lima i diat; 7 Upi diat a pait ra varobo ta ra umana Tematana, Ma ra balbali ta ra lavur vuna tarai; 8 Upi diat a vi kadia umana king ma ra umana vinau na palariam, Ma kadia lavur luluai ma ra vivi na palariam; 9 Upi diat a pait ra varkurai ta diat, nina di ga tumu vake; Kana umana tena lotu diat a vatur vake ra variru tana. Avat a pite pa ra Luluai.