Iob 16

1 Ma Iob i ga tata ma i ga biti: 2 Iau ga tar valongore ta mangoro na magit dari; Amutal a utul a tena varmaram vakuku. 3 Dave, na par ra umana tinata vakuku? Ava bar i vangangap u ba u bali ka iau dari? 4 Gala dor a tur varkia, Pa i dekdek pi ina tata da u tata; Na tale iau pi ina pit u, Ma ina loe ra ulugu ure u. 5 Ma iau, ina ga vapatuan u ma ra ngiegu, Ma ra ura bul na ngiegu dir a ga vamaram u ta kaum niligur. 6 Gala iau tata, kaugu niligur pa i panie; Ma gala ina ki mut, ina ngo dave tana? 7 Ma go God i ga vabiluane iau, Ma iau a lingling ika. 8 I ga tabe vake iau, ma nam ia ra vartakun ure iau; A palaur na pakagu i takun iau, i varvai kapa ta ra luaina matagu. 9 Ba i ga kankan i ga rada iau ma i ga vakaina iau bula; I ga varkakaratane ra pal a ngiene ure iau; Kaugu ebar i ga go iau ma ra kiau na matana. 10 A tarai dia ga panganga ure iau, Dia ga par ra pagupagu na ngiegu, Dia tut varurung ure iau. 11 God i nur tar iau pire ra umana tena varpiam, Ma i vue tar iau ta ra lima i diat dia bilak. 12 Iau ga ki na gugu ma i ga bubur varbaiane iau; I ga vatur vake ra kongkongigu, ma i ga bubur gigi iau. I ga vaki iau upi kana vakilang iat, 13 Kana umana tena panak dia tur kikil iau. I go ra balagu, ma pa i mari iau, Ma ra polo mapak ta ra katigu i lolonge tar ia ta ra pia. 14 I rada vartataurane iau, Ma i vutvut tadav iau da ra rangrang na tutana. 15 Iau tar ingit ra mal na tabun ta ra pal a pakagu, Ma ra dekdekigu i ki ta ra tobon. 16 A matagu i kalangar ta ra tinangi, Ma i maravai upi ina tapula; 17 Ma ra limagu pa i ga pait ra kaina, Ma kaugu niaring i ga gomgom. 18 Ea, u ra rakarakan a gunagunan, koko una punang ra gapugu, Upi kaugu tinangi pa na ngo ta ra gunagunan par. 19 Ma go ieri, nina ba na varvai kapa ure iau i ki arama ra bala na bakut, Ma ta tikai arama muka na varvai dovot ure iau. 20 A umana talaigu dia kulume iau; Ma iau kail tadav God ma ra lur na matagu, 21 Upi na varkurai takodo ure ra tutana pire God, Ma livuan pire ra tutana ma ra umana talaina. 22 A paupau kilala boko Ma ina vana, ma pa ina talil mulai.