Psalm 76

1 Digau Judah e iloo e ginaadou a God, di ingoo o Maa e hagalabagau huoloo i baahi digau Israel. 2 Di guongo o Maa la i Jerusalem, Mee e noho i tomo di Gonduu Zion. 3 Nia amu maalei o nia hagadaumee la gu hadihadi go Mee i golo, mo nadau mee abaaba mono hulumanu dauwa mo nia goloo dauwa huogodoo ala i golo. 4 E madamada huoloo behee Kooe, meenei God! E madamada huoloo behee go do hanimoi labelaa gi muli i tomo nia gonduu, i di gowaa dela nogo haga magedaa ai o hagadaumee Kooe. 5 Nia goloo digau dauwa maaloo dangihi la guu aau huogodoo gi daha, dolomeenei digaula guu kii di kii o digau mmade. Nia maaloo digaula mono hai mee gu ono hadinga ai. 6 Meenei di God o Jacob, do madagoaa ne wou gi digaula, gei nia hoodo digaula mo digau ala e hula nia maa guu tinga gi lala gi hongo di gelegele guu mmade. 7 Malaa, nia daangada huogodoo la gu mmaadagu i di Goe, meenei Dimaadua. Tangada e dahi e mee di duu i oo mua ai, i do madagoaa ma ga hagawelewele. 8 Goe guu hai dau hagi aga gi modongoohia mai i di langi, malaa, henuailala la gu mmaadagu guu noho deemuu, 9 Do madagoaa ne duu aga, nogo haga modongoohia aga di tonu o dau gabunga, belee haga dagaloaha digau huogodoo ala e noho daamaha ang gi ginaadou i henuailala. 10 Di hagawelewele o nia daangada gaa huli ga hagaamu Goe. Digau huogodoo ala ne dubu i tauwa ga daumaha adu gi di Goe. 11 Wanga ina gi Yihowah, go di godou God, godou mee ala ne hagababa gi Mee. Goodou go nia henua llauehe ala e hoohoo mai, goodou gaamai godou wanga dehuia gi Mee. God e hai nia daangada gi mmaadagu i de Ia. 12 Mee e haga menege iha nia dagi ala e hagamuamua, gaa hai nia king o henuailala gi mmaadagu.