SAM 52

1 Mwa! Yoku todabala, avaka paila kukwaluvalova paila m mitugaga? Yaubada la bobwailila kwekanigaga. 2 Kuninanamsa paila bukuyogagi tuwoli tomota. Mayem makawala kutou kaikakata. Yoku tuta komwaidona kutamituli sopa. 3 Vavagi gaga kuyebwaili sainela mitaga vavagi bwaina kuyebwaili sitana wala, deli sopa kuyebwaili sainela mitaga kamokwita kuyebwaili sitana wala. 4 Yoku tosasopa! Kuyebwaili wala bukuyomiyuyu tomota metoya om biga. 5 Mapaila Yaubada biyogagaim tuta gala biwokuva. Matauna bilitakaim e bikatusobwaim metoya om bwala. Matauna bikatupalaim metoya osi valu tommomova. 6 Tomitukwaibwaila bigisaisi baisa e bikokolasi. Oluvi matausina bigigilaimsi deli bikaibigasi kawasi, 7 “Kugisaisi, tau matauna gala ikanuvateta baisa Yaubada paila bikwala, mitaga idubumi wala saina bidubadu la guguwa deli inevi la kabokwala metoya ola bubunela gaga." 8 Yeigu goli makawala kaitala makaina olibe isususina olumoulela Yaubada la bwala. Yeigu adubumi Yaubada la mitakwai tuta gala biwokuva wala. 9 Mwa Yaubada! Tuta komwaidona banokagutoki baisa yoku paila avaka bogwa lokuvagi. Yeigu bakamituli baisa omitasi m tomota mwada yoku Giyoubwaila.