SAM 47
PNG1 Komwaidomi tomota bukukwatupatusi yumami deli mi mwasawa. E bukuwosisi yakaula kaigaveka baisa Yaubada. 2 Guyau Towalakaiwa Sainela isim kala kokola. Matauna Giyouveka iguguyoi komwaidona valu watanawa. 3 Matauna eivigakaidasi tatomgwagasi odubasi mabudosina tomota. Eivigakaidasi takaraiwagasi odubasi boda ituwoli ituwoli. 4 Matauna inagi da valusi, e baisa goli tasisikaisi. Makwaina goli da valusi viloumatabwaila, paila yakidasi la tomota, e yakidasi goli mina mbwailila. 5 Yaubada imweimwena bisili ola takaikaia. Guyau imweimwena, e tagovasi deli mwasawa, e deli tauya itagilulu. 6 Bukuwosisi yakaula baisa Yaubada. Bukuwosisi yakaula baisa da Guyausi. 7 Matauna iguguyoi komwaidona valu watanawa. Bukuyakawolaisi matauna deli wosi! 8 Yaubada isili ola takaikaia kwebumaboma. Iguguyoi odubasi boda ituwoli ituwoli. 9 Si gweguya mabudosina boda ituwoli ituwoli itogugulasi itotusi deli Yaubada la tomota, matauna Eberaam la Yaubada goli. Matauna saina Topeuligaga ikalisuwoli tokwabilia budumwaidosi. Matauna goli Giyoumatala.