SAM 30

1 Ayakawolaim Guyau paila lokukolaigu e kusilibodi agu tilaula mwada gala biyosokanaigusi. 2 Mwa! Guyau ulo Yaubada, ladou baisa yoku mwada bukupilasaigu, e yoku bogwa lokukwatumovaigu. 3 Yeigu bogwa layayaya bala okedala Tuma, mitaga yoku bogwa lokukwaliduboli agu laka. E bogwa kukwaimilivau ulo momova. 4 Yokomi la tomota tokimadagi kuwosisi yakaula baisa Guyau. Kululuwaisi avaka matauna Tobumaboma bogwa leivagi e kunokagutokisi baisa matauna! 5 Matauna la gibuluwa gala wala imomwa biwokuva, e la bobwailila isisu tubwa komwaidona. Kaina mitalogi ibodi bibubusisi wa bogi, mitaga eiyam kaukwau mwasawa biviloubusi. 6 Yeigu bogwa lalumkoli eiluva wala wowogu, e kawagu, “Gala wala availa bikalisauwaigu." 7 Mwa Guyau! Yoku lokumitukwaibwailigu. Lokukolaigu makawala kwaitala bolela kabilia wa koya bikoli tomota. Mitaga oluvi yoku kukwatupwanaim metoya baisa yeigu, e yeigu bogwa lakokola. 8 Mwa Guyau! Yeigu ladou baisa yoku e akayubabai paila bukupilasaigu, 9 e kawagu, “Avai vavagi bwaina bukubani metoya ogu kwaliga? Avaka tuvaila bukubani kidamwa yeigu bala wa laka? Ki, igagabila tokwaliga biyakawolaimsi? Kaina igagabila bikamitulaisi m bobwailila kwekanuvagasi ke? 10 Mwa Guyau! Kunakaigalaigu e bukunokapisaigu. Mwa Guyau! Kupilasaigu!" 11 Yoku lokuvigaki ulo ninamwau biwokuva, e akakaiwosi deli ulo mwasawa. Yoku bogwa lokuvisimolaigu, e kuvakasauwaiguga mwasawa. 12 Mapaila galaga bakapatu. Bausiwosi wala kam yakaula. Mwa Guyau! Yoku wala ulo Yaubada, e tuta komwaidona banokagutoki baisa yoku.