SAM 20

1 Ibodi Guyau bimapu m dou avai tuta kuboda mwau! Ibodi Yekobe la Yaubada bikolaim! 2 Ibodi biwitali pilasi metoya ola Bwala Kwebumaboma, deli bisakaim kam pilasi metoya makwaina Koya Saiyoni. 3 Ibodi bikabwaili komwaidona m lula deli bimwamwasila nanola paila komwaidona m semakavi. 4 Ibodi bisakaim avaka magim, deli bivigaki komwaidona m nanamsa bikalota. 5 E bakagovasi deli mwasawa paila m tomgwaga, deli bakayakawolaisi ma Yaubadasi e baisa bivigaki pakala m tomgwaga. Ibodi Guyau bimapu komwaidona m kwapuloki. 6 Lagaila bogwa lanikoli Guyau ivigaki guyau matauna einagi bitomgwaga mokwita. Immapu la dou metoya ola valu kwebumaboma wa labuma, deli metoya ola peula ivigaki matauna bitomgwaga mokwita. 7 Mimilisi idubumaisi wala si waga kaibibiu paila kabilia, mimilisiga si wosa. Mitaga yakidasi tadubumaisi wala Guyau da Yaubadasi la peula. 8 Tomota makawala matausina igau bisilibeibeusi deli bikapusisi, mitaga yakidasi bitatomalaulasi e bitatomlilasi. 9 Mwa Guyau! Kuvigaki ma guyausi bitomgwaga, e kuvitakaulokaimasi avai tuta bakadousi.