ମାର୍କ 1
PWF1 ଇକା ଆଜିନାତ୍ ମାପୁରୁ ମାରିସି ଜିସୁ କ୍ରିସ୍ତଦି ନେଗି କାବୁର୍ ଆରାମ୍ ।
2 ଜିସାୟ ବାବବାଦିଦି ବଇଦୁ ଏଣ୍ତେସ୍ ରାସାତାମାନାତ୍, “ସୁଡ଼ୁଦୁ, ମାପୁରୁ ଇର୍ହାନ୍,” ମାପ୍ ମା ଦୁତ୍ତିଙ୍ଗ୍ ମି ଆଗ୍ଡ଼ି ପୋକ୍ନାପ୍, ୱାନ୍ ମି ସାରି ରସ୍ନାନ୍ ।
3 ମରୁବୁମିଦୁ ପେରିୱେୟୁଦାନ୍ ଆଉଲିଆଜିମାନି ଅରେନ୍ ୱାନି ବଲ୍, ପ୍ରବୁଦି ସାରି ରସ୍ଆ, ୱାନି ସାରି ସାଡ଼ୁକୁ କିଆ ।
4 ଆବେଟ୍କୁ ଏର୍ତୁ ଡୁବନ୍ ସିନି ଜୋହନ ବାଲିଭୁମିଦୁ ସର୍ହାନ୍ନୋ ୱେର୍ତାନ୍, ମାରି ଡୁବନ୍ ସିତାନ୍ । ୱାଣ୍ଡ୍ରୁ ପ୍ରଚାର୍ କିଜି ଲୋକାଙ୍ଗ୍ ଇନ୍ଡ୍ରେଙ୍ଗ୍ ଆସ୍ତାନ୍, “ପାପ୍ତାନ୍ ମନ୍ତିଙ୍ଗ୍ ଡ଼େପ୍ତୁ, ମାରି ଡୁବନ୍ ଅତୁ ଆବେଟ୍ ମାପୁରୁ ମି ପାପ୍କେମା କିନାନ୍ ।”
5 ଆବେଟ୍ ଯିହୁଦା ରାଜି ମାରି ଜିରୁସାଲାମ୍ତି ୱିଜୁ ଲୋକୁ ସତାରୋ ଯୋହନତି ଲାକ୍ତୁ ୱାଦେଙ୍ଗ୍ ଆସ୍ତାର୍ ମାରି ନିଜେ ନିଜେଦି ପାପ୍ ମାନାଜି ୱାନି ମାଣ୍କୁ ଜର୍ଦନ ଗାଡାଦୁ ଡୁବନ୍ ଅତାର୍ ।
6 ଜୋହନ ଉଟ୍ ବୁର୍ବୁସାଦାନ୍ ତିଆର୍ ଆତି ଆଙ୍ଗିଁ ଆରାଜି ମାର୍ଆନ୍ ମାରି ୱାନି ଜୁକିଦି ସାରିବେଡ୍ତି ତଲ୍ତି ନାସ୍ ତରାଜିମାର୍ହାନ୍, ମାରି ମାଡ଼ିମାଉ ନି ଗରନ୍ ପୁକି ତିନ୍ଜିମାର୍ଆନ୍ ।
7 ୱାଣ୍ତ୍ରୁ ଆଉଲି ଆଜି ଇଣ୍ତ୍ରେଙ୍ଗ୍ ଆସ୍ତାନ୍, “ଏନ୍କି ନା ମାଣ୍କୁ ନାଣ୍ତ ବପୁମାନାନ୍, ଆକାନ୍ ନା ୱେନ୍କା ୱାଜିନାନ୍; ନାନୁ ପାଡ଼୍ଜ ଜୁତେଙ୍ଗ୍ତି ଗାଟି ବା କୁତ୍ତେଙ୍ଗ୍ ଜଗ୍ ସିଲେ ।
8 ନାନୁ ମିଙ୍ଗିଁ ଏର୍ତୁ ଡୁବନ୍ ସିଜିନା, ମାତର୍ ୱାନ୍ ମିଙ୍ଗିଁ ପବିତ୍ର ଆତ୍ମାଦୁ ଡୁବନ୍ ସିନାନ୍ ।”
9 ନାସ୍ତିୱାଲେ ଜିସୁ ଗାଲିଲି ରାଜିଦି ନାଜରିତ ଦର୍ତି ନାଟାଣ୍କୁ ୱାଜି ଜର୍ଦନ ଗାଡାଦୁ ଜୋହନମାନୁ ୱାନ୍ ଡୁବନ୍ ଅତାନ୍ ।
10 ଜିସୁ ଏର୍ତାନ୍ ସହସି ୱାନିୱାଲେ ବାଦଡ଼୍ ରେଆତି ମାନିୱାଜା ମାରି ପବିତ୍ର ଆତ୍ମା ପାର୍ୱାଦି ୱାଜା ୱାଜି ୱାନି ମୁସ୍କୁ ରେତାନିକା ୱାନ୍ ସୁଡ଼ୁତାନ୍,
11 ନାସ୍ତିୱାଲେ ବାଦଡ଼୍ତାନ୍ ଉଣ୍ତ୍ରି ବଲ୍ ୱେଙ୍ଗିଁତାତ୍, “ନିନୁ ମା ଲାଡ୍ତି ମାରିନ୍, ନିବାନ୍ ମାପୁ ନାଣ୍ତ ୱେଡ଼ିକା ।”
12 ଆୟାଦାପ୍ରେ ପବିତ୍ର ଆତ୍ମା ଜିସୁଙ୍ଗୁଁ ଉଣ୍ତ୍ରି ସିମ୍ରା ବାଡିଦୁ ଅତାତ୍ ।
13 ଜିସୁ ସିମ୍ରା ବାଡିଦୁ ସାଲିସ୍ ଦିନ୍ ତେବାଜି; ସୟତାନ୍ତି ମାଣାନ୍ ପରିକା କିଆୟ୍ଆତାନ୍; ଜିସୁ ବନ୍ତି ଜାତୁଙ୍ଗାୱାଲେ ମାର୍ଆନ୍, ମାତର୍ ମୁସ୍କୁପୁର୍ତି ଦୁତ୍କୁ ୱାଜି ୱାନି ସେବାକିଜିମାରେଏ ।
14 ଯୋହନ ଜଇଲ୍ତୁ ସର୍ହି ୱେନ୍କା ଜିସୁ ଗାଲିଲି ରାଜିଦୁ ୱାତାନ୍ ନୋ ମାପୁରୁଦି ନେଗି କାବୁର୍ ପ୍ରଚାର୍ କିଦେଙ୍ଗ୍ ଆସ୍ତାନ୍ ।
15 ଜିସୁ ୱେର୍ତେଙ୍ଗ୍ ଆସ୍ତାନ୍, “ଦିନ୍ ଲାକ୍ତୁ ୱାତାତ୍ନି, ମାପୁରୁଦି ରାଜି ଇଗା ୱାଜିନାତ୍ ! ପାପ୍ତାନ୍ ମନ୍ତିଙ୍ଗ୍ ଡ଼େପ୍ତୁ ମାରି ମାପୁରୁଦି ନେଗିକାବୁର୍ତୁ ବିସ୍ବାସ୍ କିଦୁ ।”
16 ଜିସୁ ଗାଲିଲିଦି ସାମ୍ଦୁର୍ ପାଡ଼ି ସିଜି ସନିୱାଲେ ସିମୋନ୍ ପିତର ମାରି ଆନ୍ଦ୍ରିୟ ତଡ଼୍ ରିଏରିଙ୍ଗ୍ ସାମ୍ଦୁର୍ତୁ ମିନ୍କୁ ଜାଡ଼ି ପକ୍ନିକା ସୁଡ଼ୁତାନ୍, ଇରିଙ୍ଗ୍ ୱାର୍ ମିନ୍କୁ ଆସ୍ନିକାର୍ ମାର୍ଆର୍ ।
17 ଜିସୁ ୱାରିଙ୍ଗ୍ ଇର୍ଆନ୍, ନା ୱାଲେ ରାଦୁ, ନାନ୍ ମିଙ୍ଗିଁ ଲୋକାଙ୍ଗ୍ ମାପୁରୁ ଲାକ୍ତୁ ତାନିକା ଅଜାକିନା ।
18 ଆବେଟ୍ ୱାର୍ ଆୟାଦାପ୍ରେ ଜାଡ଼ି ଡ଼ିସ୍ତାରୋ ଜିସୁୱାଲେ ୱାଲେ ସର୍ଆର୍ ।
19 ମାରି, ଜିସୁ ଅଡ଼ପ୍ ଆଗ୍ଡ଼ି ସର୍ଆନ୍ନୋ ଜେବଦିଦି ରିଏର୍ ମାରିସିର୍ ଜାକୁବ ନି ୱାନି ତଡ଼ାନ୍ ଜୋହନତିଙ୍ଗ୍ ୱାରି ଡଙ୍ଗାଁଦୁ ଜାଡ଼ି ମଦାକିନିକା ସୁଡ଼ୁତାନ୍ ।
20 ଜିସୁ ୱାରିଙ୍ଗ୍ ସୁଡ଼ୁଜି ଦାପ୍ରେ ୱାନି ଲାକ୍ତୁ କୁକ୍ତାନ୍, ୱାର୍ ୱାରି ବୁବାସି ଜେବଦିଙ୍ଗ୍ ବୁତିକିନି ଲୋକାୱାଲେ ଡଙ୍ଗାଁଦୁ ଡ଼ିସ୍ତାରୋ ଜିସୁୱାଲେ ୱାଲେ ସର୍ହାର୍ ।
21 ଜିସୁ ମାରି ସିସୁର୍ କପର୍ନାହୁମ୍ ଇନି ଗାଡ଼୍ତୁ ସର୍ଆର୍, ଆୟାଦାପ୍ରେ ଜିସୁ ରୋମ୍ନି ନାଣ୍ଡିଙ୍ଗ୍ ଜିହୁଦିରି ପାର୍ତନା କିନି ଇଲୁ ଲୋଇ ସର୍ଆନ୍ନୋ ସିକିୟା ସିଦେଙ୍ଗ୍ ଆସ୍ତାନ୍ ।
22 ୱାନି ସିକିୟା ୱେନ୍ଜି ଲୋକ୍ଡର୍ କାବାଆତାର୍; ଇରିଙ୍ଗ୍ ଜିସୁ ସାସ୍ତ୍ରୀରି ୱାଜା ସିକିୟା ସିଏନ୍ଣ୍ତା ଅରେନ୍ ଅଦିକାର୍ ପଇତି ଲୋକ୍ତି ୱାଜା ସିକିୟା ସିଜି ମାର୍ଆନ୍ ।
23 ନାସ୍ତିୱାଲେ ଅରେନ୍ ଦୁବା କାସ୍ତି ଲୋକୁ ପାର୍ତନା କିନି ଇଲୁ ଲୋଇ ମାରାନ୍ ନୋ ଆଉଲି ଆଜି ଇର୍ଆନ୍ ।
24 “ଏ ନାଜରିତିୟ ଜିସୁ, ନିୱାଲେ ମା ଇନି ପାଣି ମାନାତ୍ ? ନିନ୍ନେ ମାଙ୍ଗିଁ ୱିସ୍ତେଙ୍ଗ୍ ୱାତି ? ନିନୁ ଏନ୍ ଆକା ନାନ୍ ନେସ୍ନା, ନିନୁ ମାପୁରୁତି ମାଣ୍କୁ ୱାତିମାନି ପବିତ୍ର ଲୋକୁ ।”
25 ଜିସୁ ତାନିଙ୍ଗ୍ ଆଦ୍ରିସ୍ କିଜି ଇର୍ହାନ୍, “ଆଲ୍ଜ ମାନ୍ଆ, ଇୟା ୱେନିମାଣ୍କୁ ସସି ସାଙ୍ଗ୍ଆ ।”
26 ତାନେ ୱେନ୍କା ଆୟା ତାଗ୍ଇଆତ୍ମା ୱାନିଙ୍ଗ୍ ଦୁକ୍ତା ପକ୍ତା ଦୋ ନାଣ୍ତ ପେରି ୱେୟୁଦାନ୍ ଆଉଲି ଆଜି ୱାନି ମାଣ୍କୁ ସତା ସର୍ଆତ୍ ।
27 ଆବେ ମାର୍ଇ ଲୋକ୍ଡର୍ କାବାଆତା ସର୍ଆର୍ନୋ ୱାରି ୱାରି ଲୋଇ ୱାର୍ଗିଜି ସାତାର୍, “ଇକା ଇନିକା ? ଇକା ତୋ ଉଣ୍ତ୍ରି ଅଦିକାର୍ ମାନି ପୁନି ସିକିୟା, ୱାନ୍ ତାଗ୍ଇ ଆତ୍ମେଆଙ୍ଗ୍ ବା ଆଦେସ୍ ସିନାନ୍, ମାରି ତାଗ୍ଇ ଆତ୍ମେଙ୍ଗ୍ ୱାନି ଆଦେସ୍ ମାନାନେ ।”
28 ଆୟାୱେନ୍କା ଜିସୁଦି ବିସୟତୁ ମାଟା ଦାପେ ଦାପେ ଗାଲିଲି ରାଜିଦୁ ୱିଜୁ ତରିନ୍ ୱେଙ୍ଗିଁତାସର୍ଆତ୍ ।
29 ତାନେ ୱେନ୍କା ଜିସୁ ମାରି ସିସୁର୍ ପାର୍ତନା କିନି ଇଲୁଦାନ୍ ସତାରୋ ଯାକୁବ ନି ଜୋହନ ୱାଲେ ଆୟାଦାପ୍ରେ ସିମୋନ୍ ମାରି ଆନ୍ଦ୍ରିୟରି ଇଲ୍ତୁ ସର୍ଆର୍ ।
30 ସିମୋନ୍କା ମିମ୍ସି ନବ୍ତି ଉଣ୍ତିଙ୍ଗ୍ ନିଙ୍ଗ୍ଦେଙ୍ଗ୍ ଆଟ୍ଏଜି ମାର୍ଆତ୍, ମାରି ସିସୁର୍ ଆୟାଦାପ୍ରେ ତାନେ ମାଟା ଜିସୁଙ୍ଗୁଁ ୱେର୍ତାର୍ ।
31 ଆବେଟ୍ ଜିସୁ ଲାକ୍ତୁ ସର୍ଆନ୍ନୋ ତାନି କିୟୁ ଆସ୍ତାନ୍ନୋ ତାନେଙ୍ଗ୍ ନିକ୍ତାନ୍, ଆବେଟ୍ ତାନିଙ୍ଗ୍ ନବ୍ ଡ଼ିସ୍ତାତ୍, ମାରି ୱାଦ୍ ନେଗେଣ୍ତ୍ ଆତାଦୋ ଜିସୁ ମାରି ସିସୁରି ଉଣ୍ତିଙ୍ଗ୍ ଖାଦି ସେବା ତିଆର୍ କିଦେଙ୍ଗ୍ ଆସ୍ତାତ୍ ।
32 ୱେଡାସର୍ହି ୱେନ୍କା ଲୋକ୍ଡର୍ ଜିସୁ ଲାକ୍ତୁ ୱିଜୁ ରକମ୍ତି ରୋଗ୍ ମାରି ଦୁବା କାସ୍ତି ଲୋକାଙ୍ଗ୍ ତାତେଙ୍ଗ୍ ଆସ୍ତାର୍ ।
33 ଆୟା ଗାଡ଼୍ତି ଲୋକୁ ୱିଜେରେ ୱାଜି ଆୟା ଇଲୁ ସେର୍ଲା ଲାକ୍ତୁ ଉଣ୍ତାତାର୍ ।
34 ଜିସୁ ନାନା ରକମ୍ତି ରୋଗ୍ ଲୋକାଙ୍ଗ୍ ନେଗେଣ୍ତ୍ କିତାନ୍ ମାରି ଏସ ଦୁବା କାସ୍ତି ଲୋକାଙ୍ଗ୍ ଡ଼ିସିସ୍ କିତାନ୍, ମାରି ୱାନ୍ଡ୍ରୁ ଦୁବେଆଙ୍ଗ୍ ୱାର୍ଗିଦେଙ୍ଗ୍ ସିଏତାନ୍, ଇରିଙ୍ଗ୍ ଦୁବେଙ୍ଗ୍ ଡର୍ ଜିସୁଙ୍ଗୁଁ ନେସ୍ସି ମାର୍ହେ ।
35 ମାର୍ନାଣ୍ଡିଙ୍ଗ୍ ୱେଡ଼ା ସନି ଆଗ୍ଡ଼ି ସାଲ୍ଦି ସିକାଟି ମାନ୍ବୁ ମାନ୍ବୁନେ ଜିସୁ ନିଂଇତା ସତା ସର୍ଆନ୍ ମାରି ଉଣ୍ତ୍ରି ସିମ୍ରା ବାଡିଦୁ ସର୍ଆନ୍ନୋ ଆବେ ପାର୍ତନା କିଦେଙ୍ଗ୍ ଆସ୍ତାନ୍ ।
36 ସିମୋନ୍ ମାରି ୱାନି ତଡ଼୍ ଲୋକୁ ଜିସୁଙ୍ଗୁଁ ପଇଦେଙ୍ଗ୍ ଆସ୍ତାର୍,
37 ଏସ୍ତିୱାଲେ ଜିସୁଙ୍ଗୁଁ ୱାର୍ ସୁଡ଼ୁତାର୍ ୱାନିଙ୍ଗ୍ ଇର୍ହାର୍, “ୱିଜେରେ ନିଂଇ ପଇଜି ଅସିନାର୍ ।”
38 ମାତର୍ ଜିସୁ ୱାରିଙ୍ଗ୍ ଇର୍ଆନ୍, “ରାଦୁ, ମାଡୁ ଇୟା ଲାକ୍ତୁ ମାନି ନାର୍କାଙ୍ଗ୍ଁ ସନାଟ୍ । ନାନ୍ ଆବେବା ପ୍ରଚାର୍ କିନା, ଇରିଙ୍ଗ୍ ଆୟା ଉଣ୍ତିଙ୍ଗ୍ ନାନୁ ସତା ୱାତାମାନା ।”
39 ଆୟାୱେନ୍କା ଜିସୁ ଗାଲିଲି ରାଜିଦି ୱିଜୁ ନାର୍କାଙ୍ଗ୍ଁ ବୁଲାଜି ବୁଲାଜି ୱାରି ୱିଜୁ ପାର୍ତନାକିନି ଇଲ୍କାଙ୍ଗ୍ ପ୍ରଚାର୍ କିତାନ୍ ମାରି ଦୁବେଙ୍ଗ୍ ଆସ୍ତି ଲୋକାଙ୍ଗ୍ ଡ଼ିସ୍ପିସ୍ତାନ୍ ।
40 ଜିସୁଦି ଲାକ୍ତୁ ଅରେନ୍ କୁସ୍ଟରୋଗ୍ ଆତି ମାରିକାନ୍ ୱାତାନ୍ ନୋ ୱାନି ଆଗ୍ଡ଼ି ମେଣ୍ତେଙ୍ଗ୍ ଗଟ୍ କିତାନ୍ନୋ ଇର୍ଆନ୍, “ନିନ୍ ଜଦି ବଦା କିନି, ନାଙ୍ଗିଁ ନେଗେଣ୍ତ୍ କିଦେଙ୍ଗ୍ ଆଟ୍ନି ।”
41 ଜିସୁ ଦୟା ତର୍ତାନ୍ନୋ କିୟୁ ପେର୍ଜି ୱାନିଙ୍ଗ୍ ମୁଟ୍ସି ଇର୍ହାନ୍, ନାନ୍ ବଦା କିଜିନା, “ନିନ୍ ନେଗେଣ୍ତ୍ ଆଆ ।”
42 ଆୟାଦାପ୍ରେନେ କୁସ୍ଟରୋଗ୍ ୱାନି ମାଣାନ୍ ଡ଼ିସ୍ତା ସର୍ଆତ୍ ମାରି ୱାଣ୍ତ୍ରୁ ନେଗେଣ୍ତ୍ ଆତାନ୍ ।
43 ଇୟା ୱେନ୍କା ଜିସୁ ୱାନିଙ୍ଗ୍ ଆଟ୍ୱାଦାନ୍ ଆଦେସ୍ ସିଜି ଆୟାଦାପ୍ରେ ପୋକ୍ସି ଇର୍ଆନ୍,
44 “ଜାଗାର୍ତା, ଏଙ୍ଗ୍ବା ଇନିକା ଇନ୍ମା, ମାତର୍ ସାଙ୍ଗ୍ଆ, ଜାଜକରିମାନୁ ନିଜେଦିଙ୍ଗ୍ ତର୍ଆ; ନିନ୍ ଜେ ନେଗେଣ୍ତ୍ କିଆଇଆତିମାନି ଇକା ଲୋକାମାନୁ ସାକି ସିଦେଙ୍ଗ୍ ଇଜି ମୋସାଦି ସିତିମାନି ନିୟମ୍ତାନ୍ ପୁଜା ସିଆ ।”
45 ମାତର୍ ଆକାନ୍ ସତା ସର୍ଆନ୍ ନୋ ଇୟା ମାଟା ୱିଜୁ ତରିନ୍ ଇଜି ବୁଲାତାନ୍ ଜେ, ଜିସୁ ମାରି ପ୍ରଚାର୍ କିଦେଙ୍ଗ୍ ତରାଜି ଏମେ ନାର୍ତୁବା ସନ୍ଡ଼୍ରେଙ୍ଗ୍ ଆଟ୍ଏତାନ୍, ମାତର୍ ଜିସୁ ଆତ୍ରେ ସିମ୍ରା ବାଡିଦୁ ମାନ୍ଜି ମାର୍ଆନ୍; ମାରି ୱିଜୁ ତରିଣ୍ତି ଲୋକୁ ଜିସୁ ଲାକ୍ତୁ ୱାଦେଙ୍ଗ୍ ଆସ୍ତାର୍ ।