ମାତିଉ 24
PWF1 ଜିସୁ ମନ୍ଦିର୍ତାନ୍ ସସି ସନିୱାଲେ ସିସୁର୍ ମନ୍ଦିର୍ତି ମେଡ଼େଇଲୁକୁ ୱିଜୁ ତର୍ନି ଉଣ୍ତିଙ୍ଗ୍ ୱାନି ଲାକ୍ତୁ ୱାତାର୍ ।
2 ଜିସୁ ଇର୍ହାନ୍, “ଇଲେଇ ଗିଦେ ଇୟାୱିଜୁ ସୁଡ଼ୁଜିନିଦେର୍ । ନାନ୍ ମିଙ୍ଗିଁ ସତ୍ ଇଜିନା, ଇୟା ମନ୍ଦିର୍ତି ଉନ୍ଡ୍ରି କାଲୁ ଆଇ କାଲୁ ମୁସ୍କୁ ତେବାଉ, ୱିଜୁ ବୁମିଦୁମିସାନେ ।”
3 ଜିସୁ ଜିତ ଗରନ୍ ମୁସ୍କୁ ବାସ୍ତି ମାରିଇୱାଲେ ସିସୁର୍ ୱାନି ଲାକ୍ତୁ ନେସ୍ଇୱାଜା ୱାଜି ୱେନ୍ବାତାର୍, “ଇୟାୱିଜୁ ଏସ୍କାଙ୍ଗ୍ ଗଟାନାତ୍, ଆକା ମାଙ୍ଗିଁ ଇନିଆ । ଇନିକା ଗଟାତିଙ୍ଗ୍ ମାପ୍ ନେସ୍ନାପ୍ ଜେ ନିନ୍ ୱାନି ବେଡ଼ା ଆତାତ୍ନି ମାରି ଇୟା ଜୁଗ୍ସେସ୍ ଆନାତ୍ ।”
4 ଜିସୁ ୱାରିଙ୍ଗ୍ ଇର୍ଆନ୍, ଜାଗାର୍ତା ମାନ୍ଡ୍ରୁ । ଏନ୍ ଏଣ୍ତେସ୍ ମିଙ୍ଗିଁ ବାୟା କିଏନ୍ ।
5 ଗାଦିଲୋକ୍ ନା ଦର୍ ଆସ୍ସି ୱାଜି ଇନାର୍, ନାନ୍ ନେ କ୍ରିସ୍ତ ଅର୍ତ ମସିହ । ଇକା ଇନ୍ଞ୍ଜି ୱାର୍ ଗାଦିଲୋକାଙ୍ଗ୍ ବାୟାକିନାର୍ ।
6 ମିର୍ ଲାକ୍ତୁ ସାଲାତିମାନି ଜୁଦ୍ତି ଆଉଲି ୱେନିଦେର୍ ମାରି ଆକ ସାଲାତିମାନି ଜୁଦ୍ତି କାବୁର୍ ୱେନିଦେର୍ । ମାତର୍ ତିଲାମାଟ୍ । ଇୟାୱିଜୁ ପୁରା ଗଟାନାତ୍, ମାତର୍ ଇୟାତାନି ଅର୍ତ ଆଏତ୍ ଜେ ଜୁଗ୍ ସେସ୍ଆନି ଦିନ୍ ଲାକ୍ତୁ ।
7 ଦେସ୍ ଦେସ୍ତି ଲୋଇ ଜୁଦ୍ ସାଲାନାତ୍, ଉନ୍ଡ୍ରି ରାଜି ଆଇ ରାଜି ମୁସ୍କୁ ଡାକ୍ନାତ୍ । ୱିଜୁ ତରିନ୍ ଉନ୍ଣ୍ତେ ତିନ୍ଡ୍ରେଙ୍ଗ୍ ପୁଟ୍ଏତ୍ ମାରି ବୁମିକମ୍ପ ଆନାତ୍ ।
8 ମାତର୍ ଇୟାୱିଜୁ ଜନମ୍କିନି କାସ୍ଟୁଦି ଆରାମ୍ ମାତର୍ ।
9 ମିର୍ ଆସାୟ୍ଆଜି ଦୁଃକ୍କାସ୍ଟୁ କିନି ଉଣ୍ତିଙ୍ଗ୍ ସର୍ପେ କିନାର୍ ମାରି ମିଙ୍ଗିଁ ସାୟାମାର୍ଗା ଡାକ୍ନାର୍, ନାବାନ୍ ବିସ୍ବାସ୍ କିତିମାନି ଉଣ୍ତିଙ୍ଗ୍ ମିର୍ ୱିଜେରି ଲୋକାଦି ମାଣାନ୍ କାଡ଼ାଇଆନିଦେର୍ ।
10 ନାସ୍ତିୱାଲେ ଗାଦିଲୋକ୍ ୱାରି ବିସ୍ବାସ୍ ଆରାକିନାର୍, ନିଜେନିଜେଦିଙ୍ଗ୍ କାଡ଼ାଜିସାଜି ନିଜେନିଜେଦି ଉଣ୍ତିଙ୍ଗ୍ ଆସିସ୍କିଆୟ୍ଆନାର୍ ।
11 ନାସ୍ତିୱାଲେ ଗାଦିଲୋକ୍ ବଣ୍ତ ବାବବାଦିଦିର୍ ୱାଜି ଲୋକାଙ୍ଗ୍ ବାୟାକିନାର୍ ।
12 ମାରି ଅଦାର୍ମୁ ନାଣ୍ତ ଆତାତ୍ଆକା ଏସାଲୋକା ମାପୁରୁଙ୍ଗ୍ଁ ଜିବନ୍ନୋନିକା ସିତିଡ଼ିଆନାତ୍ ।
13 ମାତର୍ ଏନ୍ ସାରାସାରି ୱେନ୍କା ସାନ୍ଦି ସାସ୍ଆସ୍ସି ତେବାନାନ୍, ୱାନ୍ ରକିୟା ପଇନାନ୍ ।
14 ମାପୁରୁଦି ରାଜିଦି ବିସୟ୍ତାନ୍ ନେଗିକାବୁର୍ ୱିଜୁ ଲୋକାଦି ଲାକ୍ତୁ ସାକି ସିଦେଙ୍ଗ୍ ଇୟା କାବୁର୍ ସାରାଦୁନିଆଦି ୱିଜୁ ତରିନ୍ ପ୍ରଚାର୍ ଆନାତ୍ । ତାନେୱେନ୍କା ଜୁଗ୍ସେସ୍ ଆନାତ୍ ।
15 ମିର୍ ଏସ୍ତିୱାଲେ ବାବବାଦି ଦାନିୟେଲ୍ ମାଣାନ୍ ୱେର୍ଇଆତି ନାସ୍ଟୁକିନି କାଡ଼୍ନି ତାନେଙ୍ଗ୍ ମନ୍ଦିର୍ ପବିତ୍ର ବାଡିଦୁ ନିନିମାନିକା ସୁଣିଦେର୍ । ଇୟାତାନି ଅର୍ତ ଇନିକା, ପଡ଼ାଜ ବୁଜାଦୁ ।
16 ନାସ୍ତିୱାଲେ ଆମାଲୋକ୍ ୱିଜେରେ ଜିହୁଦା ଗାଡ଼୍ତୁ ମାନାର୍, ୱାର୍ ଗରନ୍ ମୁସ୍କୁ ଉରୁକ୍ସି ସଲିର୍ ।
17 ଆମାକାର୍ ସାତ୍ ମୁସ୍କୁ ମାନାର୍, ୱାର୍ ଇଲୁ ଲୋଇ ସାମାନ୍ପତର୍ ଅତେଙ୍ଗ୍ ଇଜି ଆଡ୍ଗି ୱାଜି ୱେଡ଼ା ନାସ୍ଟୁ କିମାକିନ୍ ।
18 ଆମାକାର୍ କିଡ଼ିଇଦୁ ସୋଲ୍ସି ମାନାର୍, ନିଜେଦି ସାଦର୍ ତାତେଙ୍ଗ୍ ଇଜି ଡ଼େସି ସଲ୍ମାକିନ୍ ।
19 ନାସ୍ତିୱାଲେ ପଟାଦୁମାନି ଆଇମାଲୋକ୍ ମାରି ଇସ୍ରି କଡ଼ରିଙ୍ଗ୍ ଆସ୍ସି ପାଲ୍ ଉଟ୍ପିସ୍କିନି ଆଇସିକା ଅବସ୍ତା ଏସ ତାଗ୍ଇକା ଆନାତ୍ ।
20 ମାପୁରୁଙ୍ଗ୍ ପାରାତାନା କିଜିମାନ୍ଡ୍ରୁ, ପିନିକାଡ଼ାଦୁ ସିଲିତିଙ୍ଗ୍ ରମ୍ନିନାଣ୍ତିଆଙ୍ଗାଁ ମିଙ୍ଗିଁ ଏଣ୍ତେସ୍ ଉରୁକ୍ସି ସନ୍ଡ଼୍ରେଙ୍ଗ୍ ପଡ଼ାଏତ୍ ।
21 ନାସ୍ତିୱାଲେ ଇୟାୱାଜା ନାଣ୍ତକାସ୍ଟୁ ଗଟ୍ନା ଜେ, ଦୁନିଆଦି ତିଆର୍ଆତିମାଣାନ୍ ନେର୍ ସାନ୍ଦି ଗଟାଏତ୍, ମାରି ଏସ୍କାଙ୍ଗ୍ବା ଗଟାଏତ୍ ।
22 ମାତର୍ ଇୟା ଦୁଃକ୍ତି ବେଡ଼ାଦିଙ୍ଗ୍ ମାପୁରୁ ଉଣା କିତାମାନାନ୍, ଆକା ଆଇତିମାରିଙ୍ଗ୍, ମାରି ଏନ୍ ଜିଜ ମାନ୍ଏତାନ୍ମାନ୍ଦି । ମାତର୍ ୱାନି ଆସ୍କିତିମାନି ଲୋକାଙ୍ଗ୍ ରକିୟା କିଦେଙ୍ଗ୍ ଇଜି ମାପୁରୁ ଆୟା ସମୟ୍ତିଙ୍ଗ୍ ଉଣା କିତାମାନାନ୍ ।
23 ନାସ୍ତିୱାଲେ ଜଦି ଏନ୍ ମିଙ୍ଗିଁ ଇନ୍ନାନ୍, ଇବେନୁ କ୍ରିସ୍ତ ମାନାନ୍ ସିଲିତିଙ୍ଗ୍ ଆବେନ୍ ୱାନ୍ ମାନାନ୍; ଆକା ବିସ୍ବାସ୍ କିମାଟ୍ ।
24 ଇରିଙ୍ଗ୍ ଆପ୍ଣାଦିଙ୍ଗ୍ କ୍ରିସ୍ତ ସିଲିତିଙ୍ଗ୍ ବାବବାଦି ଇନାୟ୍ଆଜିମାନି ବଣ୍ତବାବବାଦିର୍ ନାସ୍ତିୱାଲେ ତର୍ଆୟାଆନାର୍ । ୱାର୍ କାବାଆନିକା ମାରି ତିଲାନିପାଣି ତର୍ସି ମାପୁରୁଦି ଆସ୍କିତିମାନି ଲୋକାଙ୍ଗ୍ ବାୟାକିନାର୍ ।
25 ୱେନ୍ଡ୍ରୁ ! ଆୟା ସମୟ୍ ୱାନି ଆଗ୍ଡ଼ିନେ ନାନ୍ ମିଙ୍ଗିଁ ଇୟାୱିଜୁ ମାଟା ୱେର୍ତା ସିଜିନା ।
26 ମାରି, ସୁଡ଼ୁଦୁ, ୱାନ୍ ବାଲିରାଜିଦୁ ମାନାନ୍, ଲୋକୁ ଜଦି ମିଙ୍ଗିଁ ଇୟା ମାଟା ଇନାର୍, ଆବେନୁ ସୋଲ୍ମାଟ୍ । ମାରି ସୁଡ଼ୁଦୁ, ଇବେନୁ ୱାନ୍ ବାକ୍ରା ଲୋଇ ମାର୍ଗିତାମାନାନ୍, ଜଦି ଇକା ଇନାର୍, ୱାରିଙ୍ଗ୍ ବିସ୍ବାସ୍ କିମାଟ୍ ।
27 ମିର୍ସିନିକା ଏଣ୍ତେସ୍ ୱେଡ଼ାସନି ତରିଟାନ୍ ନି ୱେଡ଼ାଆର୍ନିତର୍ନି ସାନ୍ଦି ବାଦଡ଼୍ତିଙ୍ଗ୍ ଜାୟ୍ କିନାତ୍, ଆୟାୱାଜା ମନୁସ୍ୟପୁତ୍ରଦି ୱାନିକା ଗଟାନାତ୍ ।
28 “ଏମେମାନୁ ସାତିମାଡ଼ା ମାନାତ୍, ଆୟାବାନୁ ଡେଗେଙ୍ଗ୍ ଉନ୍ଡ୍ରେମାନୁ ଉଣ୍ତାନେ ।”
29 “ଆୟା ଦୁଃକ୍କାସ୍ଟୁଦି ବେଡ଼ା ୱିଜିନି ବେଡ଼ାଦୁ ୱେଡ଼ା ସିକାଟି ଆନାତ୍ ମାରି ଲେଜୁ ମାରି ଜାୟ୍ ସିଏନ୍, ମାରି ସୁକେଙ୍ଗ୍ୱିଜୁ ବାଦଡ଼ତାନ୍ ଆର୍ନେ ମାରି ବାଦଡ଼ତି ସାକ୍ତିୱିଜୁ ଇନିଙ୍ଗାଁଆନିଆ ଆନେ ।
30 ତାନେୱେନ୍କା ମନୁସ୍ୟପୁତ୍ରଦି ସିନେଙ୍ଗ୍ ବାଦଡ଼ତୁ ତର୍ନେ ମାରି ମନୁସ୍ୟପୁତ୍ର ମେଗେମାଳାଦାନ୍ ପେରି ସାକ୍ତିଦାନ୍ ମାରି ଗୌରବ୍ଦାନ୍ ୱାଜିମାନିକା ସୁଡ଼ୁଜି ଦୁନିଆଦି ୱିଜୁ ବାସାଦି ଲୋକୁ ଆଡ଼ାବାନାର୍ ।
31 ବାଜାମରି ଆନାତ୍ ମାରି ପୃତିବିଦି ଉନ୍ଡ୍ରି କନାଦାନ୍ ଆଇ କନା ସାନ୍ଦି ସାରିବେଡ଼ିତିଦାନ୍ ୱାନି ଆସ୍କିତିମାନି ଲୋକାଙ୍ଗ୍ ଉଣ୍ତା କିଜ ତାନି ଉଣ୍ତିଙ୍ଗ୍ ମନୁସ୍ୟପୁତ୍ର ୱାନି ଦୁତ୍କାଙ୍ଗ୍ ପୋକ୍ନାନ୍ ।”
32 “ତଗା ମାରାନ୍ତାନ୍ କାତା ଅଜାଦୁ, ଏସ୍ତିୱାଲେ ତାନି କମେଆଙ୍ଗ୍ଁ ଆକୁ ପାସ୍ରିକା ମାରି କଡ଼୍କିକା ଆଜି ପୁନି ଆକୁ କାୟାନାତ୍, ନାସ୍ତିୱାଲେ ଜେଟାପ୍ ଲେଞ୍ଜୁ ଲାକ୍ତୁ ୱାତାନି ଇଜି ମିର୍ ନେସ୍ସିନିଦେର୍ ।
33 ଆୟାୱାଜା ମିର୍ ବା ଇୟାୱିଜୁ ଗଟ୍ନେଙ୍ଗ୍ ସୁଡ଼ୁତିଙ୍ଗ୍, ମନୁସ୍ୟପୁତ୍ର ସେର୍ଲା ଲାକ୍ତୁ ଇତାନ୍ ଇକା ଇଜି ମିର୍ ନେସ୍ତୁ ।
34 ନାନ୍ ମିଙ୍ଗିଁ ସତ୍ ଇଜିନା, ମାନ୍ତୁଇଡିଦୁ, ଇଲେଇ ଜିବନ୍ମାନି ଲୋକା ମାଣାନ୍ ୱିଜେରେ ସାନି ଆଗ୍ଡ଼ି ଇୟାୱିଜୁ ବିସୟ୍ ଗଟାଏତ୍ ।
35 ବାଦଡ଼ ନି ପୃତିବି ମାରାଗ୍ନାତ୍; ମାତର୍ ନା ବାକ୍ୟ ଏସ୍କାଙ୍ଗ୍ ମାର୍ଗେଏତ୍ ।”
36 “ମାତର୍ ଆୟା ଦିନ୍ ବା, ଆୟା ବେଡ଼ା ଏସ୍କାଙ୍ଗ୍ ୱାନାତ୍, ଏନ୍ ୱେର୍ତେଙ୍ଗ୍ ଆଟ୍ଏନ୍ । ନିଜେ ମାପୁରୁଦି ମାରିନ୍ ନି ଦୁତ୍କୁ ବା ଆୟାମାଟା ନେସେଉ, କେବଲ୍ ବୁବା ମାପୁରୁ ନେସ୍ନାନ୍ ।
37 ନୋହଦି ବେଡ଼ାଦୁ ଏଣ୍ତେସ୍ ଗଟାତା ମାର୍ହାତ୍, ମନୁସ୍ୟପୁତ୍ରଦି ୱାନି ବେଡ଼ାଦୁ ଆୟାୱାଜା ଗଟାନାତ୍ ।
38 ଗାଲିପିରୁଦି ଆଗ୍ଡ଼ିରି ବେଡ଼ାଦୁ ନୋହଦି ଜାହାଜ୍ତୁ ଡ଼ୁଗୁନି ଦିନ୍ ସାନ୍ଦି ଲୋକୁ ଉଣିତିନିକା ମାରି ମେମାରି ନି ଆଇମା ପେଡ଼ିଆନି ୱିଜୁପାଣିଦୁ ଦାନ୍ଦା ଆତାମାର୍ହାତ୍ ।
39 ଗାଲିପିରୁଦୁ ୱାର୍ ଦେଲ୍ଜିସନି ସାନ୍ଦି ଇନିକା ଗଟାଜିନାତ୍ ନେସ୍ତେଙ୍ଗ୍ ଆଟ୍ଏଜି ମାର୍ହାର୍ । ମନୁସ୍ୟପୁତ୍ର ୱାଜିନି ଦିନ୍ତୁ ବା ଟିକ୍ ଆୟାୱାଜା ଆନାତ୍ ।
40 ଆୟା ସମୟ୍ତୁ କିଡ଼ିଇଦୁ ପାଣି କିଜିମାନି ରିଏରି ମେମାରିରି ମାଣ୍କୁ ଅରେନ୍ୱାନିଙ୍ଗ୍ ଅଆୟ୍ଆନାତ୍ ମାରି ଆଇ ଅରେନ୍ ୱାନିଙ୍ଗ୍ ଡ଼ିସ୍ନାସିନାର୍ ।
41 ରୁଣ୍ତି ଆଇମେକ୍ ଜାତାଦୁ ନୁର୍ଜିମାନେ, ଅରେତ୍ତାନିଙ୍ଗ୍ ଅଆୟ୍ଆନାତ୍ ମାରି ଆଇତାନିଙ୍ଗ୍ ଡ଼ିସ୍ନାସିନାର୍ ।”
42 ମାରି, ଜାଗାର୍ତା ମାନ୍ଡ୍ରୁ, ଇରିଙ୍ଗ୍ ମି ପ୍ରବୁ ଆମା ନାଣ୍ତିଙ୍ଗ୍ ୱାନାନ୍, ଆକା ମିର୍ ନେସ୍ଇଦେର୍ ।
43 ମାତର୍ ଇକା ନେସ୍ସୋ ମାନ୍ଡ୍ରୁ, ଏସିୱାଲେ ଡଙ୍ଗାଁର୍ଏନ୍ ଡ଼ୁଗୁନାନ୍ ନେସ୍ତିମାରିଙ୍ଗ୍, ଇଲୁମାଲିକ୍ ଜାଗାର୍ତାଦାନ୍ ମାନ୍ଞ୍ଜି ଡଙ୍ଗାଁର୍ଏନ୍ତିଙ୍ଗ୍ ଇନ୍ଡ୍ର ଡ଼ୁଗିସିତେଙ୍ଗ୍ ସିଏନ୍ ।
44 ମିର୍ ବା ୱିଜୁଦିନ୍ ଜାଗାର୍ତା ଆଜମାନ୍ଡ୍ରୁ, ଇରିଙ୍ଗ୍ ଆମା ବେଡ଼ାଦୁ ମିର୍ ୱାନିଙ୍ଗ୍ କାପ୍କିଇ ମାନିଦେର୍ ଆୟା ବେଡ଼ାଦୁ ମନୁସ୍ୟପୁତ୍ର ୱାନାନ୍ ।
45 “ଏନ୍ ଆର୍ତିଙ୍ଗ୍ ବିସ୍ବାସ୍ ନି ବୁଦିଦି ସାକର୍ ? ଆମାୱାରି ମୁସ୍କୁ ମାଲିକ୍ ଆଇ ସାକର୍କାଙ୍ଗ୍ ଟିକ୍ ବେଡ଼ାଦୁ କାଦି ସିନି ବଜୁ ସିନାମାନାନ୍ ।
46 ମାଲିକ୍ ଆଇଦେସ୍ତାନ୍ ଡ଼େସିୱାନିୱାଲେ ଆୟା ସାକର୍ ଜଦି ବିସ୍ବାସ୍ତାନ୍ ୱାନି ପାଣି ଟିକ୍ କିଜିମାନାନ୍, ସୁଡ଼୍ଜି ୱାନ୍ ଏସ ୱେଡ଼ିକା ଆନାନ୍, ୱାନ୍ ଦନ୍ୟ !
47 ନାନ୍ ମିଙ୍ଗିଁ ସତ୍ ଇଜିନା, ମାଲିକ୍ ନିଜେଦି ୱିଜୁ ସମ୍ପତିଦି ଦାଇତ୍, ସିନି ଉଣ୍ତିଙ୍ଗ୍ ଆୟାୱାଜା ସାକର୍ତିଙ୍ଗ୍ ଆସ୍ କିନାନ୍ ।
48 ମାତର୍ ଆୟା ତାଗ୍ଇ ସାକର୍ ଜଦି ଅବିସ୍ବାସ୍ କିଜି ମାଲିକ୍ ୱାନିକା ୱେଡ଼ା ଆନାତ୍ ଇଜି ଅଡ଼୍ବିନାନ୍ ମାରି
49 ତଡ଼୍ ସାକର୍କାଙ୍ଗ୍ ଡାକ୍ତେଙ୍ଗ୍ଆସ୍ସି, ମାରି ମଦୁଆରି ୱାଲେ ଉନ୍ଣ୍ତେଙ୍ଗ୍ ତିନ୍ଡ୍ରେଙ୍ଗ୍ ବାସ୍ନାନ୍ ।
50 ସାକର୍ କାପ୍କିଇୱାଲେ ବେଡ଼ାଦୁ ଦାପ୍ରେ ଅର୍ଲେନ୍ ଏସ୍ତିୱାଲେ ମାଲିକ୍ ଡ଼େସି ୱାନାନ୍, ଆୟା ନାଣ୍ଡିଙ୍ଗ୍ ମାରି ୱେଡ଼ା ସାକର୍ ନେସ୍ଏନ୍ ।
51 ମାଲିକ୍ ୱାନିଙ୍ଗ୍ କୟ୍ଜି ମକା ମକା କିଜି କପଟିରିୱାଲେ ୱାନି ବାଗ୍ ଟିକ୍ କିନାନ୍, ଆବେନ୍ ଆଡ଼୍ବାନିକା ନି ପାଲୁକୁ କାତ୍ରେକିନାନ୍ ।