Yakubu 2

1 Ama a va̱, Asheku a tsunu Yesu Kirisiti Kawauwi uzapige u Éa. Kotsu i takpana una̱ka̱ tsupige wa, iêa̱ baci upityanangi n eyi. 2 Tyoku u naha, a dana uza roku u tuwa̱ a asu u kaÉolo ka Ée n aminya a shinga a ikebe, aku u ukai kpam nkawani n zinariya a ajubu. Pini nala, uza roku kpam u tuwa̱i uza u unambi u ukai aminya a Éa bawu a gain. 3 Aku i na̱ka̱i vuma Éa u ukai aminya a shinga yi tsupige i tonuko yi, “Asu u ndishi u Éa na.” Aku i tonuko uza u unambi vi, “Shamgba dan,” ko kpam, “Dusuku a iyamba evu n aêene a va̱." 4 I yan baci nala, ya wenike Ée la vi kuÉyangi a asu u ama a re a na yi, kpam i yan ta̱ dere tyoku Éa uza u afada uza Éa wa̱ri n uyawunsa u cingi a katakasuvu ka ne. 5 Ama a va̱ aza Éa ma ciga cika, zuwai atsuvu a Ée mai. Mayun Éa Kashila̱ ka Éanga̱sai aza a unambi a woko aza a utsa̱ri a asuvu a upityanangu. Kpam u Éanga̱sa le a woko aza Éa a ka lya agadu a tsugono tsa u zuwamgbanai wa na̱ka̱ aza Éa a ka ciga yi. 6 Gba̱ n nala, i goroi aza a unambi yi! Shegai aza a utsa̱ri yi alya a ka sukuta̱ Éa̱ a rono Éa̱ kpam ubana a kuwa ku afada. 7 Alya kpam a tsu dana ukuna u cingi a kala ka Yesu Kirisiti Kawauwi kpam n ka a ka isa̱ Éa̱. 8 Ya yan ta̱ ili i shinga ya kirana baci n mele ma tsugono ma ma̱ri a Tagara̱da u Kashila̱, “Ciga uza u karen u vunu tyoku Éa va ciga kaci ka vunu." 9 Shegai ya tono baci n ama tyoku Éa i wene le, unyushi u cingi u Éa ya yan, kpam mele ma varangu Éa̱ ta̱ aku i woko aza a unyushi. 10 Uza u tono baci Mele ma Kashila̱ ka na̱ka̱i, aku u koÉoi ma te, vuma u nala vi u koÉo Ée gba̱ Mele mi. 11 Kashila̱ ka ka danai, “Kotsu vu vaku n uka u uza roku wa,” aya dem u danai, “Kotsu vu wuna uma u vuma gbani wa.” Adama a nala, ko vu vaku baci n uka u uza wa, aku vu wunai uma u vuma gbani, vu woko Ée uza Éa u koÉoi gba̱ Mele ma Kashila̱. 12 Adama a nala, yanyi kadyanshi n i yanyi yavu a ka ciga a yanka Éa̱ afada n mele ma ma tuko utsa̱ra̱ u kaci. 13 Ya pana baci iyali i aza roku wa, eÉa̱ dem Kashila̱ ka pana Éa̱ iyali wa. Shegai ya pana baci iyali i aza roku, Kashila̱ uza u iyali, iyali i ne ya lya ta̱ kaci ka afada. 14 Ama a va̱, ndya kalen ka uza wa dana u pityanangu ta̱ bawu u wenikei manyan? Ucun u upityanangu u nala wa wauwa uza wa. 15 A dana vu wene uza roku uza Éa u ka̱na̱ ta̱ u tsa̱ra̱ ilikulya ko kpam aminya a uêuka. 16 Aku vu dana, “U yan tsu ben, Kashila̱ ka zuwuka vu una̱ u shinga,” i tonuko yi kpam Kashila̱ ka tuko vuma u nala vi ilikulya ko aminya, eÉa̱ kpam i na̱ka̱ vuma u nala vi ilikulya ko aminya wa. Ili i shinga i eni iêya ukuna u nala wa yanka yi? 17 Nala dem upityanangu utyoku u ne, bawu wa wala̱ka n manyan, upityanangu u nala vi kakushe ka. 18 Uza roku wa fuÉa ta̱ u weci mu, “Avu va̱ n upityanangu?” Aku n wushunku yi, “Ma̱ ta̱ n manyan.” Pini nala, aku n tonuko yi, “Wenike ve upityanangu u vunu vi bawu manyan, mpa kpam n wenike Éa̱ upityanangu u va̱ n manyan ma ma yan." 19 I wushuku ta̱ an Kashila̱ ka te ka, u gan ta̱. Shegai ko ityoni i cingi i wushuku ta̱ n ukuna u nala vi, adama a nala a tsu pana ta̱ uwonvo cika hal n a jeki ikyamba. 20 Katengeshi ka vuma, ndya i zuwai va ciga uza roku u wenike vu an upityanangu wa̱ baci manyan wa, upityanangu u nala vi u gbani u Éa? 21 Pana na, akaya a tsunu Ibirahi, u zuwa ta̱ Kashila̱ ka panai kayanyan an u zuwai maku ma ne Ishaku a asuÉara̱kpa tsa̱ra̱ u yain uÉara̱kpa n eyi. 22 Gogoâna vu wene tyoku Éa upityanangu u Ibirahi n manyan ma u yain a wala̱kai kaÉolo wa. U wenike ta̱ an upityanangu u ne u maci u Éa a asu u ili iêya u yain. 23 A shaÉangu ta̱ udani u Éa a danai a Tagara̱da u Kashila̱ an a danai, “Ibirahi pityanangu ta̱ n Kashila̱, kpam Kashila̱ ka pana yi kayanyan hal u gonuko yi u woko vuma u maci.” Ili iêya i zuwai a ka isa̱ Ibirahi kaje ka Kashila̱ iêya gai la vi. 24 Gogoâna i wene ta̱ an tsu wokoi dere a kapala ka Kashila̱ adama a ili iêya tsa yansa, shegai adama a upityanangu u Éa koshi wa. 25 Nala dem, Raha kashankala ka, u zuwa ta̱ Kashila̱ ka panai kayanyan an u na̱ka̱i aza a ukyawunsa uyamba a asu u ukpawan, kpam u wutukpa̱ le n kaban a ilinuku. 26 Ikyamba iêa̱ baci bawu kuvi, ikyamba i nala yi kakushe ka, kpam upityanangu u Éa bawu wa yan ili, u lamgbana n kakushe wa.