2 Yahaya 1

1 Mpa Yahaya makoshi, ma korongu ukanikorongi u na ubana a asu u uka u Éa Kashila̱ ka Éanga̱sai na̱ mmuku n ne. Ma ciga Éa̱ ta̱ n ukuna u mayun. Mpa ma ciga Éa̱ utyoku u va̱ wa. Gba̱ aza Éa a revei ukuna u mayun a ka ciga Éa̱ ta̱ dem. 2 Tsa ciga Éa̱ ta̱ adama a ukuna u mayun u Éa wa̱ri a asuvu a tsunu, kpam wa rongo ta̱ a asuvu a tsunu bawu utyoku. 3 Kavasu ka va̱ ka, Kashila̱ Tata n Maku ma ne Yesu Kirisiti Kawauwi a ka woko tsu ta̱ ukuna u shinga kpam a pana tsu asuvayali! A̱sa̱ka̱ a na̱ka̱ tsu ndishi n shinga, n ukuna u mayun, n uciga. 4 N pana ta̱ kayanyan cika an n panai a da mmuku n vunu n roku ma tono ta̱ ukuna u mayun, tyoku Éa Tata u danai tsu yain. 5 Uka, n koronku vu tsa̱ra̱ n tonuko vu ili i savu i roku wa. Tonuko Éa ma tonuko vu i cigi atoku a Ée. Ili i kagita̱ iêya a tonuko tsu tsu yain iêya gai la vi. 6 Uciga u Éa na: tsu pana udani u Kashila̱. Kpam tun a kagita̱ u tonuko tsu ta̱ tsu cigi atoku. 7 Awenishiki a kaÉan a Éa pini ushani a ka kyawunsa a likimba. Ala̱pa̱nsi a na yi a ka dansa ta̱ mayun Éa Yesu Kawauwi wa̱ri n ikyamba i vuma wa. Aza a kaÉan a Éa, kpam atokulalu a Kawauwi. 8 Kotsu vu kirana. Vu kirana baci wa, va namba ta̱ gba̱ iêya vu yain manyan a kaci ka ne ki. Shegai vu kirana baci, va wusha ta̱ katsupi ka malen ma manyan ma vunu gba̱. 9 Uza Éa baci dem u kpa̱Éa̱i ushamgba a asuvu a uwenishike u Yesu, aku u doki ko u wuta̱i pini, wa̱ri n Kashila̱ wa. Shegai uza Éa baci shamgbai pini a uwenishike vi, wa̱ ta̱ n Tata vi n Maku mi. 10 Uza roku tuwa̱ Éa̱ baci wa wenishike ukuna u Éa bawu wa̱ri u Kawauwi, kotsu i banka yi a kuwa ku Ée ko i dana̱sa yi wa, ko kenu. 11 I yan baci nala, u woko Ée yavu i Éolomgbono Ée kaci n eyi a asuvu a manyan ma cingi ma ne. 12 Ma̱ ta̱ n ili ushani iêya ma ciga n tonuko vu, shegai ma ciga n korongu iêya a tagara̱da wa. N zuwa ta̱ uma tsa Éa̱ra̱kpa̱ wa tsa gawunsa ta̱. Pini nala, aku tsu dansa aêeshi aêeshi tsa̱ra̱ tsu yain maza̱nga̱. 13 Mmuku ma uma̱ku u vunu aza Éa Kashila̱ ka Éanga̱sai ma sukunku vu idyani.