1 Yahaya 1

1 Uza Éa tun caupa wa̱ri pini a kagita̱ ki, aya uza Éa tsu pana̱kai kpam tsu wenei. Tsu wene yi ta̱ n aêeshi a tsunu, tsu sawa yi kpam n akere a tsunu. Aya Yesu Kirisiti Kawauwi Udani u uma. 2 Uza Éa u tsu na̱ka̱ uma, u tuwa̱ ta̱ ara tsunu! Tsu wene yi ta̱, kpam tsa tonuko Éa̱ ili iêya tsu wenei vi. Gogoâna ukuna u uma u Éa bawu wa kotso u na u Éa wa̱ri n Tata vi kpam u tuwa̱ tsu vi, u Éa tsa tonuko Éa̱. 3 Iêya tsu wenei kpam tsu panai iêya tsa tonuko Éa̱, tsa̱ra̱ eÉa̱ dem i tsa̱ra̱ urongo u kaÉolo n a̱tsu u nala vi. KaÉolo ka tsa̱ri n u Éa n Tata n Maku ma ne Yesu Kawauwi. 4 Koronku Éa tsa koronku Éa̱ ili i na yi tsa̱ra̱ i shaÉangu n maza̱nga̱ kaÉolo n a̱tsu. 5 Udani u Éa tsu panai ara Yesu Kawauwi u Éa na, kpam u Éa tsa tonusuko Éa̱: Kashila̱ ka katyashi, kpam wa̱ri n karimbi wa, ko kenu. 6 Tsu da baci tsa̱ n uma kaÉolo n eyi, kpam tsu lyai kelime n urongo n uma u tsunu a asuvu a karimbi, aza a kaÉan a Éa tsa̱ri, tsa tono ukuna u mayun wa. 7 Shegai tsa rongo baci a asuvu a katyashi tyoku Éa Kashila̱ ka rongo a katyashi, tsa rongo ta̱ la vi kaÉolo n atoku. Kpam mpasa n Maku ma ne Yesu n wulukpe ta̱ unyushi u cingi u tsunu. 8 Tsu da baci tsa̱ n unyushi u cingi wa, kaci ka tsunu ka tsa yinsa̱, kpam ukuna u mayun wa̱ri a asuvu a tsunu wa. 9 Shegai tsu dana baci unyushi u cingi u tsunu, wa cimbusuka̱ tsu ta̱. Kpaci Kashila̱ ka tsu shaÉangu ta̱ kazuwamgbani ka ne, wa yan ta̱ ili iêya iêa̱ri mai. Wa wulukpe tsu ta̱ a asuvu a ukuna u cingi u Éa tsu yain. 10 Tsu da baci tsu yan unyushi u cingi wa, Kashila̱ ka tsa isa̱ uza u kaÉan. Kpam tsa wenike kadyanshi ka ne a asuvu a atakasuvu a tsunu wa.