Nahum 3

1 Ter vunu ilyuci i uwotsongusu mpasa, u ɗa u shaɗangi n kaɓan n ucanga u ɗa a pura̱i a asu u kuvon! 2 Pana! Mawura̱ ma kajaɓu, n mawura̱ ma nshingi ma nringongo ma adoki, n tyoku ɗa adoki a tsu suma kuzugam-kuzugam n ugba̱ɗa̱ u nringongo ma adoki! 3 Ayuwi adoki aꞌa̱ri a uyan kuvon, iburundu iꞌa̱ri ulaɗa nsari dem ma̱ri a ulaɗa! Aza ɗa a kuwusa̱ alya pini ushani. ikyamba ya akushe, i wura ta̱ ukece, ama aꞌa̱ri a uta̱ɗa̱tsa̱ a ikyamba i akushe. 4 Gba̱ nala gita̱ ta̱ an u wokoi Niniba kashankala, kashankala ka shinga ka nala ka ka revei mayinsa̱ka̱, anuku a tsukunu, uza u ɗa u yinsa̱i kakuma̱ ka ama n tsishankala tsu ne a woko agbashi, ama kpam n tsuboci tsu ne. 5 Magono ma Zuba ma Ucira Gba̱ u danai, «Ma yan ta̱ tsilala n avu. Ma filikpa̱ ta̱ mafatari ma vunu n pala upetiwaꞌeshi a vunu. Kakuma̱ ka ama a ka wene vu ta̱ kataɓa kpam tsugono tsa wene ta̱ uwono u vunu. 6 Ma tsunku va̱ ta̱ ili i icaɗi, n yan ka vu ili iꞌya bawu i gain, n gonuko vu ili i magori. 7 Gba̱ uza ɗa baci dem u wene vu, wa suma ta̱, aku u dana, <Niniba u woko ɗe kakpongo, ya wa sa̱ka̱ yi?> An te ma tsa̱ra̱ uza ɗa wa ta̱na̱sa̱ vu katakasuvu?» 8 Avu vu la ilyuci i Tebesu ɗa, u ɗa wa̱ri a ikengi i Aga̱ta̱ a Nilu, u ɗa mini ma kyawain? Aga̱ta̱ a ɗa asu u ka̱ngu u ne, mini kpam kasaga ka ne. 9 Kushu n Masar ɗa ucira u ne u ɗa bawu wa̱ri n utyoku, aku Putu n Libiya alya aɓa̱ngi a ne. 10 Gba̱ n nala a banka yi ta̱ tsuwula̱ a uyamba u tsumoci. Hal gba̱m a gbashangusi mmuku n kenu n ne a nsandu ma ure gba̱. A varanku ta̱ azapige a ne uruta̱, aku a sa̱ra̱sai gba̱ azapige a ne n ikani. 11 Avu dem Niniba va so ta̱ vu gutukpa; va zama ta̱ asu u ɗa va kpawan aku vu boli asu u ɗa va kpawan a asu u utokulalu u vunu. 12 Gba̱ ilyuci i vunu iꞌya a kanzai n asaga a pige aꞌa̱ ta̱ yavu nɗanga n kapopi n ilimaci i kagita̱ i le; aꞌayin a ɗa baci a za̱nga̱ta̱i iꞌya, ilimaci i le i tsu rukpa̱ ta̱ a una̱ a aza ɗa a ka takuma. 13 Weɓele asoje a vunu, a woko ɗe yavu aka! Itsutsu i iyamba i vunu a giduwa̱ ta̱ iꞌya cika adama atokulalu a vunu; akina kpam a ka lya ta̱ nɗanga ma uguramgbana ma itsutsu i vunu. 14 Kene mini kpaci a ka kyawan vu ta̱ n kuvon, yan ucira u ɗa va ka̱ngu kaci ka vunu! Doku ucira u asaga a vunu, deshinku cin tsi vu yain aɓuku, aku vu fuɓuso a ɗa adama a kuma! 15 Gba̱ n nala, akina a ɗa a ka runukpa vu; burundu kpam u wuna vu tyoku u acu u ɗa wa lya vu. Vu doku ta̱ kakuma̱ ka vunu yavu acu, vu yain kpam kakuma̱ yavu abaruma! 16 Vu doku ta̱ kakuma̱ ka aza a tsilaga tsu vunu hal gba̱m a lai atala a zuba, shegai aꞌa̱ ta̱ yavu acu a ɗa a tsu takuma ili gba̱ aku kpam a imkpa a laza. 17 Awundi a vunu aꞌa̱ ta̱ yavu acu, azapige a vunu aꞌa̱ ta̱ yavu kakuma̱ ka acu aza a ɗa a rukpusa̱i a asaga aꞌayin a kuta̱nu, shegai kaara ka wuta̱ baci a tsu imkpa ta̱, kpam vuma reve asu u ɗa a banai wa. 18 Avu magono ma Asiriya, aliniki a vunu a ka gbaɗiga ɗe azapige a vunu a vakusu ɗe a ka wunvugusa. Ama a vunu a wacuwa ɗe a nsasa kpam uza wa̱ la wa ɓolomgbono le wa. 19 Ili iꞌa̱ la ya zuwa usa̱n u vunu u yain shana wa; usa̱n vunu wa ta̱na̱ wa. Gba̱ uza ɗa baci dem u panai ukuna u wacinsa u vunu wa ɓasa ta̱ akere adama a maza̱nga̱, kpaci ya bawu u panai ikyamba a tsicingi tsu vunu tsa bawu tsa̱ri n utyoku?