Yohannisni Raa'i 2

1 Efesonki betekiristanini Ha’oosi wosiyak ekka yira wosuwa: «Han naafun baakuraasikitonon hoi’ta kushubaassi epha barkinnawa warqeni meqireziisikitoni ganeyaassi kutife barkinna makte wosiya. 2 Wostoneeson; kaboneesonnawa fakineesonna arifawungwa; dey manguni meyanon beleshki biira aane beye; wosini meya sinnoy inno wosi yisefe baassotin tu’nira eshinynya sineten dantamato arifawungwa. 3 Fakiyak chimneesonnawa ta sunaasik shanaason oomtonoy ephphetooneesonna arifawungwa. 4 Sinuntano ta neen isa wee’ona wuza faarwa; esiis dey zeemoti keeshtanneeson beyitwa. 5 Awune fa tega dimaastan gandetamato yaadatowa; harmira zeemoti zagit faata baron zaguwa. Sinuntano es baron zuutira zagu shakaatane ta neeki yoonar; harmu shakaatane meqirezineeson es dimbaastan kabguna. 6 Sinuntano ma’a wuzne faarwa; esiis dey ta oomtefana Niqolawini meeni wostooson ne dey oomtetwa. 7 «Ayyana betekiristaniisikitok makefana baron odoba feenay odowowa! ‹Neebere meroni barik Ha’oosi gennetiissi fa kaani i’oosi gaananon muunak zaguna.› 8 «Semerneski betekiristanini Ha’oosi wosiyak ekka yira tichuwa: «Han bar tesuniisnawa koi’niisna; dey kitifaat kitun kabire hayew sina barkin makte wosiyawa. 9 Shananeesonnawa tukamneesonna arifan; sinuntano ne otumwa; Ayhud sinnoy inno Ayhud yisefe sexanani maabara sina baasso sunneeson mangsisetemato arifan. 10 Neyista kar’ni shanaason digotaatawa; ese nitto fattantotik nittoossin isa isaasin daabulos taatoni keer gednir; asir wona shana ephphatoosotir; hamma kituta kar’ata kabaneen amanamto sin; kaani wossumaason neek imana. 11 «Ayyanaas betekiristaniisikitok makefana baron odoba feena bar odowowa! Neebere meroni bar hepsani kituusik aafa miir’amona wuza. 12 «Pergamonki betekiristanini Ha’oosi wosiyak ekka yira tichuwa: «Han bar kadba heppik koogto siifoson kushubaassi epha barkin makter; 13 Ne sexanani zigimoos faana dimaasta fooneeson arifan; sinuntano sunnaason zaggira ephitwa; taak fa amantoneeson aane mormowe. Amanamto zaalta sina Antiphas sexana faafana nitto katamaassi wortena kabaasiknu taak fa amantoneeson aane beye. 14 Sinuntano neekik isa isa oomtena wuza faaserwa; esiis dey Bala’amni assuuson epho isa isa asuni meya nitto ganeyaassi feeseterwa; es Bala’am Israelni daraas koo’lok imte muuson meesere gerkesere tuusa’sonek Balaqnin kiiti asuwa. 15 Esiisimato Niqolawini meeni assuuson ephpheteese asuni meya nitto ganeyaassi feeseter. 16 Es bari boor’a harmuwa; es baron shakaatane taptera neeki yaara noononaassin kesfa siifone fa kaamaasik baassotin neebona. 17 «Ayyanaas betekiristaniisikitok makefana baron odoba feena bar odowo; neebere meroni barik aachera fa mannaason imana; gaddo suna barista tichchena foro shu’a dey barik imana; es baron aruniis ephni barteno oom oonu aafe. 18 «Tiyatronki betekiristanini Ha’oosi wosiyak ekka yira tichuwa: «Han wosiyaas geeni winone fa aafba faana barkinnawa kawo geesi girira kesa naasini bittane fa wochoba faana Ha’oosi Naanikinna makter. 19 Wostoneeson, keeshtanneeson, amantoneeson, Ha’oosik fa wostoneeson, fakiyak chimneeson arifawungwa; zeemoti wostoneestan hashti bar arkir sinnamato arifawungwa. 20 Sinuntano neekin isa isa oomtena wuza faarwa; Esiis dey ‹Ta raajju› yifa mashkasu Eelzabelnon beleshki biyaat beyneeswa; bar ta wostinynyaasakito gerkesoneknawa koo’loosik imte muuson muusonekna assira baassotin daagsi. 21 Harmunak barik wona imin; sinuntano bar gerkesbaassin harmira wolunak aane sholowa. 22 Es bari boor’a shanani kuphoosta ha’una; barneen ane gerkesefe baasso es mangu wostobesiissin harmu shaksefaatene akama faya shana baassosta teshshona. 23 Naanggotbaason dey kituk ke’una; betekiristaniisikito dey zuutira asuni meeni nibaasonnawa safaraasonna tu’nifees ta sinnamato arsona; isarniti isarnitiisik wostontiisimato kaasuna. 24 «Tiyatronuk feese nittoknawa es mangu assuuson ephphetoonoy nitto zuuttamnitiise; esiisimato dey isa isa meya: ‹Sexanaasi chima aacho chowawa› yisefe baassok zoonustonoy nittok ooma ba’a aafa wossuna wuza. 25 Sinfanaknu ta yoona kabaneen nittokik fa baron mai’sira ephti. 26 Neebere meroni barik; wostonaason wostere koi’ba kar’ni barik darani meyanon ha’suna hugna imanawa. 27 ‹Bittani haaroosik baassotin ha’suna; hoocho kodanimato zagire ki’e eesuna› Es ha’suni hugnaas ta Abataaskin ephna barne faarwa. 28 Wonni maskoosin dey barik imana. 29 «Ayyanaas betekiristaniisikitok makefana baron odoba feena bar odowowa.»