PESALEM 99

1 Apômtau kêtu kiŋ. Tenteŋlatu têtênêp tauŋ êndu-êndu. Nê lêpôŋ kêkô kerub nêŋ magê ŋaô e nom kôjô-kôjôgeŋ. 2 Apômtau kêtu ŋac kapôêŋ aŋga Sion. Eŋ ŋatau kêlêlêc tenteŋlatu samob su. 3 Lau samob sêlambiŋ ênê ŋaê towae to ŋaclai kaiŋ teŋ gebe eŋ ŋac dabuŋ. 4 O kiŋ toŋaclai, aôm têmtac gêwiŋ biŋgêdêŋ. Aôm kôwaka ŋagôliŋ gêdêŋ sa ma kômêtôc biŋ kêtu katô aŋga Jakobnê. 5 Atoc Apômtau, aêacnêŋ Anôtô sa ma au taôm naanêc taoŋ, taŋ akaiŋ kêka tôŋ naŋ, gebe eŋ ŋac dabuŋ. 6 Mose agêc Aron têtu ênê dabuŋwaga, ma Samuel gêmoa gêwiŋ êsêac, taŋ aweŋ gêôc ênê ŋaê naŋ. Êsêac aweŋ gêjac eŋ, tec eŋ kêkêŋ taŋa êsêac. 7 Eŋ gêmoa tao ŋalêlôm ma kêsôm biŋ gêdêŋ êsêac. Êsêac sêmasaŋ ênê biŋsu to biŋ, taŋ eŋ kêjatu gêdêŋ êsêac naŋ. 8 O Apômtau, aêacma Anôtô, aôm kôkêŋ taŋam êsêac. Aôm Anôtô kôsuc êsêacnêŋ biŋ ôkwi ma gôjac êsêac kêtu sêgôm kesoŋa. 9 Atoc aêacnêŋ Apômtau Anôtô sa ma au taôm naanêc ênê lôc dabuŋ ŋalabu gebe aêacnêŋ Apômtau Anôtô eŋ ŋac dabuŋgoc.