Ndị Hibru 8

1 Isi-oku rị ihiẹnni ẹnyi rị e ku wụ nị ẹnyi nwọn nwan ụdị onyẹ-isi nchụ-ẹjan hụn rị oche ẹka-nni ukpo Osolobuẹ imẹ elu-igwee, ebẹhụ ọghọ kachanrịnnị rị— 2 hụn rị a rụn Ebẹhụ Kachanrịn Nsọ imẹ Ọdụ-ofufe hụ wụ nke ezigbo ẹ hụn rị elu-igwee, Ọdụ-ofufe hụ hụn Osolobuẹ lẹ enwẹn ẹ mẹmẹ, ẹlẹ hụn ịhịan gi ẹka mẹmẹ. 3 Ihiẹn haịn wẹ gi e tumẹ onyẹ-isi nchụ-ẹjan ọwụlẹ wụ kẹni ọ yesọnmẹ oyiye, a chụsọnmẹ ẹjan. Ya wụ nị o k’e nwẹzịrịrị ihiẹn onyẹ nchụ-ẹjannị ẹnyi rị e ku oku e ye. 4 Omẹni elu-ụwa k’ọ rị, o ke wụ onyẹ nchụ-ẹjan kaka—ebe o mẹ ni ndị nchụ-ẹjan hụn a chụ ẹjan kẹ Iwu Mozizi dọn ku hụ a. 5 Ebẹhụ wẹ nọ e fe ofufe hụn rị elu-uwa yihụ nke ezigbo ẹ hụn rị elu-igwee eyi, onyinyọn ẹ rọ. Makẹni, ogẹn hụ Mozizi gi jẹnkọ d’a rụn Ọdụ-ofufe hụ, Osolobuẹ nọ gba a mkpịnsịn-ẹka, sị a, “Hụnkwọ a nị ị rụn ihiẹn ile n’o yi hụn wẹ ghọsị ị elu-ugu." 6 Kanị, Jesu e nwẹhẹngụọ ọrụn ka nke wẹ mma, ebe o mẹ ni ọ wụ onyẹ e dọnzi ẹgbata imẹ nkwerigbama hụn ka nke wẹ mma—nkwerigbama Osolobuẹ tumẹ, kwesọnmẹ nkwa ka mma. 7 Makẹni, omẹni ya wụ nkwerigbama ibuzọ zuchanrịn oke, o k’e nwọn mkpa ọ rị nị Osolobuẹ k’e webanhan nke ẹbụọ. 8 Kanị Osolobuẹ hụn ihiẹn rịlẹni mma imẹ ndị nke ẹ, makẹni ya wụ nkwerigbama ibuzọ ezuchanrịnnị oke, ‘ya haịn o gi sị, “Di-nwọnni-ẹnyi sị, ‘Lee ẹ, ogẹn lala, hụn m k’e gi tumẹ nkwerigbama ọhụn ẹgbata mmẹ lẹ ndị Izrẹlụ lẹ Juda; 9 ọ rịkọ kẹ nkwerigbama hụ mmẹ lẹ ndị nẹdi wẹ kanị nwọn, ụhụọhịn hụ m kwọndọn wẹ ẹka gha alị Ijiptu dupụha wẹ. Makẹni edọnmẹni wẹ nkwerigbama m— ‘ya haịn m gi la wẹ tọ.’ Ya kẹ Di-nwọnni-ẹnyi ku. 10 ‘Di-nwọnni-ẹnyi sị, ọnwan wụ nkwerigbama hụ hụn m jẹnkọ d’e tumẹ ẹgbata mmẹ lẹ ndị Izrẹlụ, o mẹgụụ: m jẹnkọ d’e bu iwu m rị ichẹn-ichẹn che imẹ uche wẹ, de wẹ ye imẹ obi wẹ. M k’a wụ Osolobuẹ wẹ, a wụrụ wẹ ndị nke m. 11 Ẹlẹzi hụn ịhịan k’a kuzimẹ ibe ẹ, mọbụ gwama ibe ẹ, “Marịnkwọ Onyẹ-nwọnni-ẹnyi.” Kaka! Makẹni, wẹ ile jẹnkọ d’a marịn m; gha onyẹ kachanrịn ntịn imẹ wẹ d’e ru onyẹ kachanrịnnị. 12 Makẹni, m k’e mẹ ni wẹ omikẹn, gbagharị wẹ eje-ihiẹn ndị wẹ mẹ; a nyanhankọzị m njọ ndị hụn wẹ mẹsọnmẹ.’ “ 13 Hụnnị ọ rị nwan e ku oku nkwerigbama ọhụn, ya wụ n’o mẹgụọ nke mbụ wụrụ nwan ihiẹn-akan; bụ omẹni ihiẹn wụ ihiẹn-akan bụ ọ hụ a kawaye ẹgẹdi, ya wụ nị ogẹn ẹ e d’a gụụ.