JUAN 9

1 Jɨaɨruido ie llofueoicaiganodɨcaɨ dɨga Jesús macaria, uisɨnidɨmɨena cɨode. Iese nanomona jaca naimɨedɨ jeicɨga. 2 Jesúmo jɨcanotɨcaɨ: âLlofueraɨma, ¿bue ñellena naimɨedɨ iese jeicɨga? ¿Nɨe isoide ra ie moo jetajamona, naimɨe iese jeicɨga? ¿Nɨe isoide ra ie ei jetajamona, naimɨe iese jeicɨga? Caɨmo llono. 3 Jesús uai ote: âNaimɨe jeacɨno fɨnua muidonañede. Ie moo muidonañede. Ie ei muidonañede. Jaca bue jetajamona, iese comuiñede. Jusiñamui uai siñonana comɨnɨ uiñollena, iese jeicɨga. 4 Nia userena jira, cuena oretatɨmɨe ie jitailla rafuena fɨnoacadɨcaɨ. Raɨre jitɨrenite. Ie mei bu jaca maɨjɨnite. 5 Enɨruemo cue nia ia, comɨnɨ comecɨaɨna llɨgaiñotɨcue. âIese Jesús llote; iadedɨ jɨaɨe rafuena ñaɨte. Naimɨe nia fiodaiñenia, Jusiñamui rafuena llocana naimɨe jaillana ñaɨte. Ie fiodaillɨrui jai iaɨre iacanana ñaɨte. Comecɨaɨna llɨgaiñuana llote, jeacɨno oni jaillena. 6 Iena lluanona enɨruena tuajano, enɨrue ɨdɨaɨ fɨnuanona, uisɨnidɨmɨe uisɨna naie enɨrue dɨga rɨgɨnote. 7 Raite: âSiloé railla joraibɨmo mai noisai âraite. Siloé oni dobaiñuamona: “Oretarabɨ”. Ie jira naimɨe noisaide. Uisɨ jai cɨodemo, abɨdo bite. 8 Billa mei, naimɨe ecɨmo itɨno, jɨaɨ naimɨena cɨocabidɨno dɨga, naimɨe jilluana coninɨri siadotɨmacɨ: â¿Buuta naimɨedɨ? Bene ucube jɨcallena raɨcabidɨmɨe isoide. 9 Jɨaɨno raitɨmacɨ: âJɨɨ, naimɨe. Jɨaɨno raitɨmacɨ: âIeñede. Naimɨena eruaɨde isoide. Naimɨe dɨnena raite: âUisɨnidɨmɨedɨcue; iadedɨ jai cɨodɨcue. 10 Naimɨemo jɨcanotɨmacɨ: â¿Nɨese jai birui cɨodɨo? 11 Uai ote: âJesús raillamɨe enɨrue ɨdɨaɨ fɨnuano, cue uisɨna rɨgɨnote. Cuemo llote: “Siloé railla joraibɨmo noisai”. Ie jira noisaidɨcue. Jai cɨodɨcue. 12 Jɨcanotɨmacɨ: â¿Nɨnomo ite nai Jesús? Naimɨe uai ote: âUiñoñedɨcue. 13 Navui uisɨnidɨmɨe jai jillua mei, fariseuaɨ dɨne comɨnɨ naimɨena uitɨmacɨ. 14 Sábadoruimo Jesúdɨ naimɨena jillotaja jira, 15 fariseuaɨ naimɨemo jɨcanotɨmacɨ: â¿Nɨesenamona jai cɨodɨo? Uai ote: âJesús raillamɨe enɨrue ɨdɨaɨ fɨnuano, cue uisɨna rɨgɨnote. Ie mei Siloé railla joraibɨmo noidɨcue. Iemona jai cɨodɨcue. 16 Fariseuaɨmona jɨaɨno raitɨmacɨ: âSábadoruimo bimɨena Jesús jillotaja jira, caɨmona jai maɨjɨde isoide. Jesús maɨjɨa jira, Jusiñamuimona naimɨe biñede. Jɨaɨno raitɨmacɨ: â¿Nɨese jearede ra fɨnouidɨmɨedɨ uisɨnidɨmɨena jillotate? âIe jira daje isoi comecɨaɨna facañedɨmacɨ. 17 Ie jira navui uisɨnidɨmɨemo dane jɨcanotɨmacɨ: âNaimɨe ona jillotaja jira, ¿nɨese odɨ Jesúna raitɨo? Uai ote: âNaimɨedɨ Jusiñamui uai lloraɨma. 18 Naimɨe moo, naimɨe ei iaɨmaiaɨmo nia jɨcanoñenia, judíuaɨ illaɨcomɨnɨ nai ɨima jaca cɨoiñenano ɨɨnosɨñede. Ie jira iaɨmaiaɨna uaiduanona, 19 jɨcanotɨmacɨ: â¿Bimɨedɨ omɨco jito? ¿Naimɨe jaca uisɨnino jeicɨga? 20 Uai otɨiaɨmaiaɨ: âJɨɨ, bimɨe coco jito. Jaca uisɨnino jeicɨga. Iena uiñotɨcoco. 21 Nɨese jai naimɨe uisɨna cɨuana uiñoñedɨcoco. Bu naimɨena jilloitajana jɨaɨ uiñoñedɨcoco. Naimɨemo jɨcano. Naimɨedɨ jai eimɨesa. Dama ie facaina jai ñaɨte âuai otɨiaɨmaiaɨ. 22 Bie rafue nia suiñenia, judíuaɨ illaɨcomɨnɨ navui llotɨmacɨ: “Jesúdɨ caɨ Jilloitaraɨma bu lloia, caɨ ofiracomo naimɨena fo billana rairuitɨcaɨ”. Iena jacɨruillanona, 23 llotɨiaɨmaiaɨ: “Naimɨe jai eimɨesa. Naimɨemo jɨcano”. 24 Ie jira illaɨcomɨnɨ dane naimɨena uaiduano, llotɨmacɨ: âJusiñamuimo iobillacɨnona feca. Jesúmo fecañeno. Naimɨe jearede rafuena fɨnouidɨmɨena uiñotɨcaɨ. 25 Uai ote: âNaimɨe jearede rafuena fɨnouillana uiñoñedɨcue. Daje rafuena uiñotɨcue. Navuidɨ cɨoiraɨnidɨcue. Birui jai cɨodɨcue. Iena uiñotɨcue. 26 Jɨcanotɨmacɨ: â¿Nɨesede ra dɨga fɨnuamona odɨ uisɨna cɨodɨo? ¿Nɨese ona jillotate? 27 Uai ote: âOmoɨmo jai llotɨcue; iadedɨ cacaiacaiñedomoɨ. ¿Bue ñellena omoɨmo dane lloitɨcue? ¿Ie llofueganona jaiacadomoɨ? 28 Rɨire uai otɨmacɨ: âNaimɨe ie llofuegamɨedɨo. Caɨdɨ Moisés mɨcorɨ ie llofueganodɨcaɨ. 29 Jusiñamui Moisés mɨcorɨmo jaie lluana uiñotɨcaɨ; iadedɨ bimɨena uiñoñedɨcaɨ. Naimɨe nɨnena billana jɨaɨ uiñoñedɨcaɨ. 30 Nai ɨima uai ote: âJadi, naimɨe nɨnena billana uiñoñedomoɨ; iadedɨ cuena jillotate. 31 Jusiñamuidɨ jearede rafuena fɨnodɨno ñaɨa uaina cacarefiñede. Naie isoidɨno siño rafuena fɨnoñenana uiñotɨcaɨ; iadedɨ Jusiñamuidɨ naimɨena sedadɨmɨe ñaɨa uaina cacade. Ie jitailla rafuena fɨnodɨmɨe ñaɨa uaina cacade. Naie isoidɨno siño rafuena fɨnuana uiñotɨcaɨ. 32 Enɨrue fɨnua facaisemona jaca buna uisɨnino jeicɨgamɨena jilloitañede. 33 Jesúdɨ Jusiñamuimona biñedɨmɨedena, jaca buena fɨnonide. 34 Uai otɨmacɨ: âJamai caɨ naɨraɨ imɨedɨo. ¿Nɨese caɨna llofueitɨo? Ie jira naimacɨ ofiracomona naimɨena jino dotadɨmacɨ. 35 Uisɨnidɨmɨena jino dotajana fɨdɨanona, Jesús naimɨena jenode. Baillano, jɨcanote: â¿Omoɨ comɨnɨna Jilloitaraɨmana ɨɨnotɨo? 36 Uai ote: â¿Bumai naimɨe? Cuemo llono, naimɨena cue ɨɨnollesa. 37 Jesús uai ote: âNaimɨena cɨodɨo. O dɨga ñaɨte. Cue. 38 Caiñɨcɨ ɨfodo raɨnadajanona, iobillacɨnona fecallena, uai ote: âNama, jai o uaina ɨɨnotɨcue. 39 Jesús uai ote: âUisɨnidɨno cɨoitallena, enɨruemo bitɨcue. Jai uisɨna cɨodɨno uisɨna cɨoitañellena bitɨcue. âIese Jesús raite; ia naimacɨ comecɨaɨna ñaɨte. Jesús “Jai maraiñedɨcaɨ” raitɨnona jillotajaɨbite. Jesús “Jai maredɨcaɨ” raitɨnomo ite jeacɨno naimacɨ uiñollena bite. 40 Naimɨe ecɨmo ite fariseuaɨ iena cacajano, jɨcanotɨmacɨ: â¿Uisɨnidomoɨ caɨna raitɨo? 41 Jesús uai ote: âUisɨnidɨno isoi itomoɨna, omoɨmo ite jeacɨno omoɨ muidonañede; ia “Jai cɨodɨcaɨ” omoɨ railla jira, omoɨmo ite jeacɨno omoɨ muidona. Iese raite; ia naimacɨ comecɨaɨna ñaɨte. Jeacɨno naimacɨmo illana naimacɨ uiñoiacaiñena jira, iese ñaɨte. Naimacɨ jeacɨno oni dotajana jitaiñedɨmacɨ.