SOLOMONO 6

1 ÃÌ  wandari maru bedaru bolangua howa í̠ hulu wandari bayaore bedegoni. ÃÌ naga yamali ibu ani piyabe. Iname í̠ biamogo bialu tayabia holoma̱ya ibu hariga ogoha piya lalu langibe. 2 I̱naga yamali ibuni mabuni ira nga biaga ale bu kagoha pu ka. Ibu mabuha ibunaga nogo memeru tani nelo halu palawaya bayale dedaru do mogo bialu ka. 3 I̱naga yamali ibu i̱naga halu i̱bi nde ibunagaore bedogoni. Palawaya kago dombeneha howa ibugua ibunaga nogo meme tani nelo haru kagoni. 4 I̱naga yamali í̠ baya burugule Yarusaleme tano alebi Tisa tano hameleore ngago alebi kegoni. ÃÌ  baya buruguleore ami agaliru wai bule lowa pelagi yalu tidiyu ibirago hondowa mitangi bu wiagadagua ngogoni. 5 ÃÌ na i̱ de handaya haabo kegome i̱ minu yani haradagua bidego í̠ handa taraha. ÃÌ naga mandari kerume nogo meme wabuni tidu yalu Gileada hari bareni mali lima daliape hene mbauleda. 6 ÃÌ naga neru nogo sibi karunaga irini áyu dege wayawaya bini peleore hagadagua í̠naga ne peweleda. ÃÌ naga ne mbira honda nabi bibahende bayaleore tigabi dege hai harua. 7 Labolabome í̠naga dengui buyi kegoyu i̱na í̠naga wanakui honani ale hendedo. 8 Kini ibu wali dewa dabu bila. Pira waragaria (60) dabu berolono bini biralu pira halira (80) one wabuni mende biralu wandari maru mini nalenebi bira dege biniru ani bila. 9 I̱ nde one mbiraore hangu gubalini howa berelalu ibu i̱naga yamaliore ega malibu ale bayaleore bedagoni. Ibu ai̱yahanda ibu wane mbiraore ogoni dege gubalini haga berenego i̱na ibuhondo turuho ko. Wali bibahende biru ngarumebi ibu de hondowa ibunaga mini mo yaraga haga. Kini one biru ngarumebi ibu one wabuni mende bedarumebi tigua iba gana lalu ibu mini yaraga haga. 10 Egerebagi ni tagira ibiraligobi dumbiyalu wálo yalu ibiragoni aibe. Ibunaga wanakui do mbarale ni tagira ibule howa dorone tagira ibagagobi ibalu ege do mbarale daganegobi halu bida. Ami agalirume wai bule lowa humbi demborerebi yalu tidiyu ibirago de hondowa mitangi bu wiagadagua i̱na ibu de hondowa mitangi biaho ngogoni. 11 I̱ mabuha dalipe howa ira lini bayale dagane bu karu dombeneha íbu ko. Dindi uliniha ira bayale do ngoria bialu anda harago hondole íbu ko. Gerebi yuni gahenge mabirago handalu ira marume palawaya tara tara nga biagane ale do ngarubi hondole íbu halu bido. 12 I̱naga yamali-o í̠na i̱naga bu mo durula harigoni. I̱na manda bialu hewaria agali mbirame karisini howa nogo hosime gililo yalu pelo poa hagadagua kogoni. 13 Sulama wandari-o mali lia mali lia ina de hondoloma̱ya í̠na mali lia. Wandarime ladai binigo ogo Irane aginaga wali agali bu karunaga deni i̱na mali luliya tí hondoa kamibe.