IBA GANA 86

1 Anduane Homogo-o i̱na bi larogo hale howa ladai bibe. I̱ hongo nahe howa i̱ni biamogo bibe naheore kogo í̠na i̱ biamogo bibelo hamelo ko. 2 I̱na í̠ talima ibalu haga kogonigo i̱ homoligo pele ngialu abale gi mibe. I̱ í̠naga biabe biahaga howa í̠hondo mini mbiraore wu kogonigo í̠nime i̱ pele ngibe laro. 3 I̱naga Anduane Homogo í̠ni hangu kego í̠na i̱ dara howa biamogo bia habe laro. Egerebagi alendobi bibahendengi howa i̱na í̠hondo bi laabo haruli. 4 Anduane Homogo-o i̱na í̠hondo bi laabo haga kogonigo í̠naga biabe biahaga i̱ kogo mo turu habe. 5 ÃÌ ni bayale biaga howa iname ko birimaru domo wahaga ke. Wali agali í̠hondo bi laga karu tihondo í̠na gubalini timbuni haabo ho kegoni. 6 Anduane Homogo-o i̱naga bi larogo bayuwa hale haore bibe. I̱ biamogo bia lalu í̠ olalu kogo hale habe. 7 I̱ biamogo bia larogola í̠na i̱ biamogo biaga kego mitangi bialu i̱ genda yu kongi biamogo bia lalu í̠nihondo bi laruli. 8 Anduane Homogo-o í̠ni ale mende naheore bibahende bolangua haiheore kegoni. Biabe í̠na biriligodagua bulene agali mbira naheore. 9 Hameigini tara tara í̠nime wabu helariru bibahendeme í̠nihondo ge duli hanga hole ibuwa tigua í̠ timbuniore kego lalu í̠ninaga mini yaraga halu holebira. 10 ÃÌ ni hanguore hongo timbunihe howa mbirale baya gibi tara tara ngaru í̠nime biaga kegoni. Ngode Datagaliwabe henene í̠ni hanguore kegoni. 11 Anduane Homogo-o mana i̱na bialu holiya hamelo kego biawai habe. I̱na horo bibahendengi mini bilinahe howa í̠na laredagua bialu holiya ani biawai habe. I̱naga mini í̠ha paga howa í̠naga biabe biaabo halu holiyabi í̠na i̱ biamogo bigi bibe. 12 Anduane Homogo i̱naga Ngode Datagaliwabe-o i̱naga miniha howa í̠naga mini yaraga haabo holebero. Ngode Datagaliwabe í̠ timbuniorebi mini lenebi kego, lalu i̱na wali agali karuhondo lamiaabo holebero. 13 Bibahendengi í̠na i̱hondo gubalini ho haabo kegoni. ÃÌ nime i̱ homolilono pele ngialu haru dai birigome i̱ homalu humbirini andaga nape kogoni. 14 Ngode Datagaliwabe-o wali agali minehe bu karume i̱la wai bule íbu kagoni ndobe. Agali ko mendeali kago dara nahaga karume i̱ homelo bo wahole bialu kagoni. Uruni tigua í̠naga bi hale habe manga haga kagoni. 15 Tigua ani biagagoyu Anduane Homogo í̠na dara holene irane nawini dara holene timbuni í̠ha to̱ledagome keba abale nahaga kegoni. ÃÌ na ina gubalini timbuniore ho howa bi ledego lone lo iriari nabiagaore í̠ mini bilinahe kegoni. 16 ÃÌ na i̱ koria dai bialu dara habe. I̱ ai̱yahanda biabe biaga wiyadagua bialu kogonigo i̱ mo hongo halu pele ngibe. 17 Anduane Homogo-o í̠naga mana bayaleore biaga ngego i̱hondo walia habe. I̱ waitigi bu karume manane ogoni de hondowa í̠nime i̱ biamogo bialu mo hongo ho heledagonida lo manda bialu tini taga timbuniore ho holebirago helo ani bibe.