IBA GANA 57

1 Ngode Datagaliwabe-o í̠na i̱hondo dara howa biamogo bibe. ÃÌ na i̱ handayaho habelo í̠ni keria eberogoni. Ega bawalime igini babaganeha tongo bidagola bayale biragadagua i̱ í̠niha kogola bayale holebero. Dalu puyabubi timbuniore ibagadagua i̱ mo ko holene íbu ngago ereba hai helonaga i̱ í̠ni andaneha haabo holebero. 2 I̱na Ngode Datagaliwabe Daligaorene Daliga kagohondo i̱ biamogo bia lole olalu haabo haruli. Ibugua mbirale bibahende i̱ha tubagiho kogo damene ngiai haga ka. 3 Ibugua dahuliya andagaha howa i̱naga bi larogo hale halu i̱ pele ngulebira. Ibugua agali i̱ mo ko hole karu bope hai holebira. Ngode Datagaliwabehanda ibunaga gubalini haabo holenebi mini bilinahe holenebi i̱ walia halu ibugua i̱ yu wahalu napolebiraore. 4 Laiono gabuame wali agali bo nole nendebu hagadagua i̱ koria waitigirume ho mabu bu kagoni. Tinaga ne timu yandareru ale taraore ho ka. Tinaga hége wai biaga ayu tibu ne gadele ale ho ka. 5 Ngode Datagaliwabe-o í̠ni timbuniore dunini kego wali agali handai helo hari daligani mo walia habe. Dindi bibahendeha í̠naga wá holenebi mini lene holenebi panigi mo walia ho ngelabe. 6 Waitigi bu karume i̱ delo gono wia do ho kagome i̱ genda timbuni yu kogoni. Tigua hariga i̱ polenego uli tombo wu kagoha gabua pilagadagua i̱ pilelo winigo uli ogoniha tini pilai haya. 7 Ngode Datagaliwabe-o i̱na mini bilinahe howa í̠hondo mini mbiraore hongohe wu kogonigo i̱na iba ganaru lalu í̠naga mini yaraga halu holebero. 8 I̱ni padogoria heyuwa i̱na ngida aleru barogome ni tagira ibilo mo heya holebero. 9 Anduane Homogo-o i̱na dindi tara tara ngaruha pu howa í̠hondo ka̱i̱ laabo holebero. Hameigini tara tarabu karuha pialu i̱na í̠naga mini yaraga hama polebero. 10 Anduane Homogo-o í̠naga gubalini haabo holene emene ndoore hari daliga elahe wu kegoni. ÃÌ naga mini bilinahe ngego timbuni yangale howa hari mindini elahe wu kegoni. 11 Ngode Datagaliwabe-o í̠ni timbuniore dunini kego wali agalime handai helo hari daligani mo walia habe. Dindi bibahendeha í̠naga wá holenebi mini lene holenebi panigi mo walia ho ngelabe.