MINI GIGABI 5

1 I̱ igini-o i̱na bi larogo bayuwa hale habe. I̱na mini bayale gigabi wulenebi manda bulenebi í̠hondo ngule hame ledo. 2 Ogonigo í̠na mana tigabi bialu howa í̠naga bi larego bibahende agali manda bayalewime laradagua bulebere. 3 Wali mana ko biaga bedago ibugua í̠ haru pole lowa dimagoli bi dewa laabo haragome í̠naga bu bamulebirago de hondo habe. 4 ÃÌ na ibunaga bi layago hale halu biriyagua mani handalu keria mbirale kaubi wiagagobibi ayu tibu alemebi í̠ nogoba haragola tandaga biraligobi bulebira. 5 Wali ogonibigome í̠ haru halu homene dinini pu hagaha haru tagira polebira. 6 Ibu haabo holenenaga hariga tigabi pedagoria napiaga beda. Ibu hariga ko pedagoha pialu haruda manda nabi howa pupebe dege biaga beda. 7 I̱ igini-o ai i̱na bi larogo bayuwa hale halu embeda nahabe. 8 Wali ogonibi bedagoria habagi howa kaundia habe. Ibu anda haneni ge bolanguabi heba nahabe. 9 ÃÌ  mini bayale wirigo yu waholenego dege de hondo habe. Wali biagonaga anda haneni bolangua hariyagua agali ko karume í̠hondo dara naholebiraore ndobe. ÃÌ  igiri daliahe keore bo waholebira. 10 ÃÌ naga mbirale biabe erekuibi bialu bayale mo wereru agali marume mo yalu pialu tinaga holebira. 11 Waragome í̠ minaragola kuni hangu wulebere. Ani bialu homole wuwa dagiani paluwa dugu taraore bialu wulebere. 12 Ani wuwa í̠na ogodagua lolebere. I̱ luluyu kogo i̱na mine halu agali marume i̱ mo tiga nabilarugoni irane aginagabe. 13 I̱naga lawai hagame bi layago hale nahe tingi halu donge harugoni. 14 Ãyu i̱ wali agali bibahende deni ko hai kogoni, lalu lolebere. 15 ÃÌ  agali mendealinaga iba uli ngagoha napobe. Agali mbirame iba uli ibuninaga ngagoha nalu hagadagua í̠ one mbiraore ogonila mandagi halu ibu hangu gubalini holene nga. 16 Wali í̠ one ndoru baba waneigini hono wima ibaga biriyagua mani waneigini urunime í̠ biamogo nabulebira. Ani manda buwa í̠ onela hangu í̠naga waneigini hono wulene nga. 17 Wali kayu dewa yalu waneigini hono wereruni wali biaru ti aria ho tago holebirago ani bulene nawi. 18 Ngode Datagaliwabehanda í̠ oneore mo turu halu biamogo binigo beda. ÃÌ  one ibu í̠naga iba uli ale bedago í̠na ibuhondo turuho holene nga. 19 Ibu bayaleore biruwa ibunaga mana bayaleore biragome í̠ mo turu helo. Ibugua í̠ gubalini hayago ogoninaga í̠na ibu mitangi bialu gubalini haabo habe. 20 I̱ igini-o í̠na wali mendehondo gubalini holene irane aginagabe. ÃÌ na agali mende oneme bi laragome í̠naga mini daraga bilo kego aginagabe. 21 Anduane Homogo ibugua mbirale bibahende í̠na beregoni manda biai halu í̠na hariga poregohabi handai haga ka. 22 Agali mana ko biaga kagonaga mana ko biragome ibuni gono wiaga. Ibugua ko biyagome gono wiyagoha ibuni do wiaga. 23 Agali ogonibi ibuninaga mini haru nahaga howa ibugua lulume biagadagua biaabo haragome ibuni bo homelaga.