MADIU 6

1 Tígua Ngode Datagaliwabe mitangi bialu mana beramiligo wali agali karume tí de hendelonaga ndo ti kagoria howa nabilimu. Mana ogoni wali agalinaga deni howa birimiyagua tí Aba dahuliya andaga kagome tíhondo emena ngulene nawulebira. 2 Mbirali buru pale kagohondo mbirale mbira mirimiyagua mine halu marume de hendelo lowa namilimu. Wali agali maru tombene hondo kihe karume ngoai hagane andahabi hariganibi ani biaga ka. Tigua wali agali marume ti mini yaraga helonaga biaga ka. I̱na tíhondo henene larogo o biarume tinaga emena mulene winigo áyu dege mo yai ka laro. 3 Tígua mbirali buru pale kago biamogo bule lowa tínaga nenegeru tí heba mandagi hagago manda nabilo o halu bilimu. 4 Ani birimiyagua tíni hangu hangume manda bu holeberami. Tí Aba tíni hangu hanguore howa beramiligo ibugua de handaya ho howa tíhondo emena ngulebira. 5 Tí kamiru hangu hangume Ngode Datagaliwabehondo bi lalu howa wali agali maru tombene hondo kihe karume biagadagua tígua nabilimu. Wali agali maru karume ti de hendelo lowa tigua ngoai hagane andahabi hariganibi heyu howa Ngode Datagaliwabehondo bi laga ka. I̱na tíhondo henene larogo o biarume tinaga emena mani mulene winigo áyu dege mo yai ka. 6 Ani biagadagua ndo tí hangu hangume Ngode Datagaliwabehondo bi lole howa tíninaga anda hobane mbiraha anda puwa panga paya tagi howa tí Aba tínaga deme nahandabehe kamigo ibuhondo bi lalimu. Ani laramigola tí Aba ibugua tíni hanguore howa beramigo de hondo kagome tíhondo emena ngulebirago ani bilimu. 7 Tígua Ngode Datagaliwabehondo bi lalu howa wali agali maru Ngode Datagaliwabe mitangi nabiaga karume bi dewa nagaloneru lagadagua nalalimu. O biarume bi lu laabo haragome hale holebira manda biaga kago 8 tigua lagadagua nalalimu. Mbirale buru pale kamigonaga tígua Abahondo bi naledemiore ibugua ala manda biai ho ka. 9 Ngode Datagaliwabehondo bi ogodagua lalu lolene nga. Ina Aba dahuliya andaga kegoni. ÃÌ  mini baya gibiore ngego mo yaraga helobi 10 í̠naga Handame Ho Holene ibilobi hamelo ko. ÃÌ na hamelo kego dahuliya andagaha karume biagadagua ina dindini kamarumebi buluma̱ya biamogo bibe. 11 Tomo áyu nolene buru pale kamago noloma̱ya ngibe. 12 Marume inahondo ko birago bia dai nabi waharamalidagua í̠na iname ko birimago domo wahabe. 13 Ina kamagoria ba hondolene hongohe nangelabe. Dama Heyolabeme ina ko mo bia holigo í̠na haru habe. 14 Wali agali marume tíhondo ko biyaru bia dai nabi waharimiyagua tí Aba dahuliya andaga kagome tígua ko birimiru nde domo waholebira. 15 Anigo wali agali marume tíhondo ko biyaru mitangi bu wiaabo halu wa naharimiyagua nde tígua ko birimiru tí Abahanda domo wa naholebira. 16 Tígua Ngode Datagaliwabe mitangi bialu tomo nane howa wali agali maru tombene hondo kihe karume dengui darabini ale howa hagadagua nahalimu. Wali agali o biarume tomo nane agua biagada lelo tigua tinaga tingini wayawaya nabi haga ka. I̱na tíhondo henenore larogo tinaga emena mani mulene winigo áyu dege mo yai kagoni. 17 Ani bidago tígua tomo nane howa tínaga dengui wayawaya bialu mandari perebi bialu halimu. 18 Ani buleberamigo irane wali agali maru karume tí handalu tomo nane kamigo manda nabilonaga bilimu. Tí Aba tínaga deme nahandabehe kamigo ibu hangu manda bulebira. Ani manda bialu tí hanguore howa beramiligo ibugua de handaya ho howa tíhondo emena ngulebira. 19 Tígua dindini howa mbirale homogo holenenaga mo mogobu wia nabilimu. Dindi ogoriani bombome nalubi hagua bialubi pagealime ohalu anda ibuwa page bialu mo ko hagagoria do holene nawi. 20 Ani biagagoria ndo dahuliya andagani bombome nanaga ngagoriabi hagua nabiagagoriabi pagealime anda naibagagoriabi mbirale homogo holenenaga mo do halimu. 21 Mbirale homogo holenenaga mo do ho ngagoria tínaga gubalini íbu haabo holebira. 22 De libu tingininaga lamu hale ale ka. Tínaga de bayale kayagua tínaga tinginiha wá haame holebira. 23 Anigo tínaga de ko hayagua tingini arumahe holebira. Tínaga tinginiha wá holene kago hundiyagua aruma taraorehe holebira. 24 Mbiralime anduane kiranaga garabaya biabe ale bia haga habe nahe ka. Ibugua anduane mendego handabe manga halu mendego gubalini holebira. Ani bialu howa anduane mendegome bi larago hale halu bialu mendegome larago hale halu mo waholebira. Tígua Ngode Datagaliwabenaga biabebi muninaga biabebi kirabali gi tale bu howa bibe naheore kamigoni. 25 Irane ogonigo i̱na tí langerogo tígua tomo ibabi nalu holenenagabi tingini aga bu holenenagabi burupadamigo agua buledabe lowa mini dege dindi ho nahalimu. Tomo bagi hene lowa wali agali holenego duniniore ndobe. Aga bagi hene lowa tingini duniniore ndobe. 26 Ega yagalo yu ibaga bialu poraru de handaramine. Ega uruni ti tomo egene nahangaga widi kago gandulowa do hagane andahabi nawiaga. Ani nabi kagola tí Aba dahuliya andaga kago ibugua egaru de handaya ho kagoni. Ega uruni emene niraore lowa wali agali tí duniniore kamigoni ndobe. 27 Tí kamigoni mbiralime dindini holenenaga mini dege dindi ho hayagua dindini haabo habehedabe. 28 Aga agi bu holedabe lalu mini dege dindi ho holene aginagabe. Palawaya aleru minana anda howa lini dedago agua anda halu haradabe mitangi bidaba. Tigua tini biabe nabiagabi tininaga yári bule lowa agabi nawabiaga ka. 29 Anigo i̱na tí langerogo Kini Solomono ibunaga mbirale dewaorewi howa aga baya bu haga henego palawayanaga yári baya gibiore bidagobi ndo bu haga hene. 30 Ngode Datagaliwabehanda datani minana anda halu karuni mo yári bia haga ka. Datani uruni áyu kago yawi agalime ganda lowa irani delolebira. Ngode Datagaliwabe ibugua o biaru mo yári bia hagadagua tí kamirubi aga bilimulo ngulebira ndobe. Tígua mini mbiraore emene wu kamigo agi bulenaga wu kamibe. 31 Anigo tígua tomo iba nolenebi aga bulenebi agiha howa ibulubadabe lowa mini dege dindi ho nahalimu. 32 Mana urunibi wali agali Ngode Datagaliwabe mitangi nabiaga karume mini dege dindi ho ka. Tí Aba dahuliya andaga kago ibugua tí mbirale uru ale bibahende buru pale kamilo manda bu ka. 33 Ani mitangi bilimulo ndo Ngode Datagaliwabehanda Handame Ho Kagonagabi ibugua tí bilimulo hame ledagonagabi tígua duninida lowa mitangiore bialu haramigola ibugua uruni bibahende ngaru tíhondo ngiai holebira. 34 Anigo tígua yawinagabi áyu mini dege dindi ho nahalimu. Horo yawi haragola ibuni mini dege dindi ho holenenaga karulape wulebirago áyunaga mini dege dindi ho holene ngagoria marubi mo wia tago bia holene nawi.