तीतुस 2

¹ लेकीन नी ईत्‍ता मातगोळ अनतोग जो सही सिद्धांतगोळ लायक आव.

² मतलब हाळाबाट मंळसा शालीन, सचेत अदिक खुद नियंत्रित ईरूल, अदिक विश्वास दा मजबूत, प्यार अदिक धैर्य पुर्ण सहनशील ईरूल.

³ हांगा हाळामुंड आर्तेर्द चाल-चलन पवित्र लॉकुर घाई ईरूल; आंदुर निंदक आगबाळुल तथा अंगुर शयद या याल्ला अन्द लत आंदरी ईरबाळुल लेकीन वळ्लीद मातगोळ कल्सावळ्तेर ईरूल.

⁴ ताकी आंदुर हारोदोर आर्तेर इक चेतावनी कोळ्त ईरूल कि तान गांडुर से अदिक चिकोर से प्यार ईटुल;

⁵ अदिक खुद नियंत्रित, पवित्र, अदिक मान्ना अन्द वळ्लीद व्यवस्था माळावळ्त, अदिक तान गांड्ड उन हात्‍ती ईरावळ्त ईरूल, ताकी यावारा भी परमेश्वर उन दी टु बरावाळा वचन इन अपमान ईला माळुल.

⁶ हिंग अच हारोदोर मंळसागोळी भी समझुसतोग कि खुद नियंत्रित आगुल.

⁷ सप्पा मातगोळ दा तान तान इक वळ्लीद आचरण इन नमुना माळ. नीन शिक्षा दा सफाई, गंभीरता,

⁸ अदिक हिंग सच्चाई सिकुल कि यावारा अदुर्द आलोचना माळ सकबाळुल, ताकी नीन विरोधी लज्जित आगुल यतिकी आंदुर हात्‍ती नीन विरोध दा अनली येनु ईरतीदील.

⁹ दासगोळी समजुस कि तान-तान स्वामी इन सांगुळ ईरूल, अदिक सप्पा मातगोळ दा आंदरी खुश ईटुल, अदिक तिर्गकु जवाब कोळबाळुल;

¹⁰ काळ्लपनी अदिक चालाकी माळबाळुल, लेकीन हर प्रकार देल पुरा विश्वासी होळुल कि आंदुर सप्पा मातगोळ दा नाम उद्धारकर्ता परमेश्वर उन बारा दा शिक्षा अन शोभा वाळुसुल.

¹¹ यतिकी परमेश्वर उन अद अनुग्रह प्रगट आद, जो सप्पा मंळसागोळ्द उद्धार इन कारण आद,

¹² अदिक अद अनुग्रह नामी कल्सतद कि नाव अभक्ति इन जीवन अदिक सांसारिक अभिलाषागोळी त्याग्स बुटेव अदिक खुद नियंत्रित, अदिक पवित्र अदिक भक्तिमय जीवन ईद दुनिया दा माळेव.

¹³ अदिक धन्य आर आ आशा अन्द मतलब तान महान परमेश्वर अदिक उद्धारकर्ता यीशु मसीह अन्द महिमा अन्द प्रगट आगोद हादी काईत ईरूल.

¹⁴ याव तान तान इक नाम साटी कोट बुट्टुन कि नामी सप्पा प्रकार इन अन्याय देल बीळसुस बुळुल, अदिक नामी आऊंदा पवित्र लॉकुर माळुल अदिक वळ्लेव-वळ्लेव क्याल्सागोळ दा ईरूल.

¹⁵ तान पुरा अधिकार इन सांगुळ ई मातगोळ कल्स, ह्यांग नी तान विरोधीगोळी दनकुसत्या अदिक प्रोत्साहित माळत्या. ताकी याऊ नीनी तुच्छ सम्सबाळुल.