प्रकाशितवाक्य 9

¹ याग पाचवा स्वर्गदूत तुरही ऊरदुन, रा ना स्वर्ग टु पृथ्वी मा ऊंद तारा बिळतेला नोळदीन, अदिक अदरी अथाह अधोलोक इंद चाबी कोटकु आत.

² अद अथाह अधोलोक इक तेरूत, अदिक कुंड दा टु धोळ्द भट्टी घाई धुंगा येळ्त, अदिक कुंड इन धुंगा देल सुर्य अदिक वायु अंधारकाय आगेदव.

³ आ धुंगा दा टु पृथ्वी मा हत्‍तीफाफा होट्टव, अदिक अवरी पृथ्वी इन चेळगोळ घाई शक्ति कोटकु आत.

⁴ अऊर से अंदकु आत कि ना पृथ्वी इन काड्डा अक, ना यातोदारा हरयाली इक, ना यातोदारा मार्र इक नुकसान पोहचुसेत, सिर्फ आ मंळसागोळी नुकसान पोहचुसेत यार ह्याणा मा परमेश्वर उन मोहर हैलेच.

⁵ अवरी लॉकुरी कोंद बुळोद रा ईला लेकीन अईद तिंगुळ ताका पीळा कोळोद अधिकार कोटकु आत: अदिक आंदुर पीळा हिंग ईरोद ह्यांग चेळ उन डंक होळदुर देल मंळसा अक आगतद.

⁶ आ दिनगोळ दा मंळसागोळ मृत्यु उक ढुंढस्यार अदिक आंदरी मृत्यु सिकतीदील; अदिक सायोद लालसा माळ्यार, अदिक मृत्यु आंदुर से दुर ओळीत.

⁷ आ हत्‍तीफाफागोळ्द आकार लळाई इन साटी तयार माळ्द घ्वाळागोळ घाई ईरव, अदिक अऊर ताल्लागोळ मा व्हान्ना अन्द मुकुट ईरव; अदिक अऊर मार्रगोळ मंळसागोळ घाई ईरव.

⁸ अऊर चुटगोळ आर्तेर चुटगोळ घाई अदिक हल्ल हुल्ल इन हल्लगोळ घाई ईरव.

⁹ अव लोवा घाई झिलम हाक्‍कु ईरव; अदिक अऊर पिक्‍कागोळ्द शब्द हिंग ईरोद जसा रथ अदिक हापाळ सा घ्वाळागोळ्द जो लळाई दा ओळताव.

¹⁰ अऊर्द पुसटी चेळगोळ घाई ईरव अदिक अऊर दा डंक ईरव, अदिक अवरी अईद तिंगुळ ताका मंळसागोळी दुख पोहचुसोद जो शक्ति सिकीत, अद अऊर्द पुसटीगोळ दा ईरोद.

¹¹ अथाह अधोलोक इन स्वर्गदूत अऊर मा राजा ईरोन; आऊन हेसुर इब्रानी दा अबद्दोन, अदिक यूनानी दा अपुल्लयोन आद.

¹² पयला विपत्‍ती नष्ट आगेत, नोळी, ईग इदुर बाद्दा येढ्ढ परेशानीगोळ मात्‍त बरव आव.

¹³ याग सहावा स्वर्गदूत तुरही ऊरूदुन रा व्हान्ना अन्द वेदी जो परमेश्वर उन मुंद आद अदुर गॉट्टागोळ दा टु ना हिंग शब्द केळदीन,

¹⁴ मतलब यावारा सहावा स्वर्गदूत से, यार हात्‍ती तुरही ईरोद, अनेत्यान, “आ नाकु स्वर्गदूतगोळ इक जो धोळ गांगा फुरात इन हात्‍ती कटकु आर, खोल्स बुळ.”

¹⁵ आ नाकु स्वर्गदूत खोल्सकु आदुर जो आ समय, अदिक दिन, अदिक तिंगुळ, अदिक साल इन साटी मंळसागोळ्द ऊंद तिहाई भाग इक कोंद बुळली तयार माळकु आगिदुर.

¹⁶ अऊर्द फौज इन सवारगोळ्द गिनती ईप्पत करोळ ईरोद; ना अऊर्द गिनती केळदीन.

¹⁷ नानी ई दर्शन दा घ्वाळागोळ अदिक अऊर्द हिंग सवार कांळ्सदुर यार झिलमगोळ बेक्‍की, अदिक धूम्रकान्त, अदिक गन्धक घाई ईरोद, अदिक आ घ्वाळागोळ्द ताल्ला हुल्ल इन ताल्ला घाई ईरव; अदिक अऊर बाय दा टु बेक्‍की, धुंगा अदिक गन्धक होळतोगोद.

¹⁸ ई मुरू महामारीगोळ्द मतलब बेक्‍की अदिक धुंगा अदिक गन्धक देल, जो अऊर बाय दा टु होळतोगोद मंळसागोळ्द ऊंद तिहाई कोंदकु आत.

¹⁹ यतिकी आ घ्वाळागोळ्द सामर्थ्य अऊर बाय अदिक पुसटीगोळ दा ईरोद; इदुरसाटी कि अऊर पुसटीगोळ हावगोळ घाई ईरव, अदिक आ पुसटीगोळ्द ताल्ला भी ईरव अदिक ईऊर देला अव दुख पोहचुसतोगव.

²⁰ मिग्द मंळसागोळ जो आ मरी देल सायली ईरोर, तान कयगोळ्द क्याल्सा देल, मन तिर्गुसदुर, कि दुष्टआत्मागोळ्द, अदिक व्हान्ना अदिक बेळ्ली अदिक पीतळा अदिक कल्ल अदिक हुळ्ली इन मूर्तीगोळ्द पुजा माळबाळुल जो ना नोळ सकताव, ना केळ सकताव, ना नळु सकताव;

²¹ अदिक जो रक्ता, अदिक जादू टोना, अदिक व्यभिचार, अदिक काळ्लपनी आंदुर माळीदुर, अदुर देल मन तिर्गुसिदिल.